APR FC na AS Kigali zifitanye umubano udasanzwe ziracakirana mu mukino w’umunsi

Yanditswe na Philbert Girinema
Kuya 6 Mutarama 2017 saa 08:34
45 31

Si ibintu byari bisanzwe muri shampiyona y’u Rwanda kubona aho ikipe igura umukinnyi mwiza, watsinze ibitego byinshi kurusha abandi ndetse washakishwaga n’amakipe menshi yamara kumusinyisha igahitamo kumutiza mukeba ikagerekaho na rutahizamu wayihekaga.

Ibi byagaragaye bwa mbere muri uyu mwaka ubwo AS Kigali yatangazaga ko ishaka gukora amateka ikanabiragaza isinyisha umwe mu bakinnyi beza muri shampiyona y’u Rwanda, Muhadjili Hakizimana washakishwaga na APR FC, Rayon Sports na Police FC ariko yamubona igahita imutiza APR FC ikanagerekaho rutahizamu Twizerimana Onesme wari wayitsindiye ibitego 13.

Kugeza kuri uyu munsi wa 12 wa shampiyona 2016/2017, Muhadjili ni umwe mu bakinnyi barimo gufasha APR FC cyane kuba ihagaze ku mwanya wa kabiri nubwo atari ku muvuduko wo gutsinda nk’uko byari bimeze umwaka ushize ari muri Mukura VS yarangije atsindiye ibitego 16.

Gusa umubano w’ikipe y’Ingabo z’Igihugu n’uw’iy’Umujyi wa Kigali ntiwagaragariye kuri aba bakinnyi babiri gusa kuko APR FC nayo yohereje abagera kuri batanu muri AS Kigali barimo Ndoli Jean Claude, Mubumbyi Barnabe, Ntamuhanga Tumaine Tity, Ndahinduka Michel uzwi nka Bugesera na Nshutinamagara Ismael Kodo.

Ni ubwa mbere aya makipe agiye guhura ahanganye muri shampiyona kuva ubu bufatanye mu gutizanya abakinnyi butangiye gusa mu mikino itegura shampiyona mu irushanwa ryari ryateguwe na AS Kigali, aya makipe yombi yarahuye APR FC itahana intsinzi ku bitego bitatu kuri bibiri harimo bibiri bya Muhadjili Hakizimana watsindaga ikipe yamutije.

Muhadjili Hakizimana ni intizanyo ya AS Kigali muri APR FC

Icyitezwe n’abakunzi b’umupira w’amaguru kuri uyu wa Gatandatu, ni ukureba aba bakinnyi bahanganye n’amakipe wakwita ko ari ababyeyi ariko uyu mukino ukanakomezwa no kuba aya makipe yombi ahanganiye igikombe dore ko APR FC ari iya kabiri n’amanota 27 irusha AS Kigali ya kane amanota ane.

Umutoza wa APR FC, Jimmy Mulisa avuga ko uyu mukino uzaba ukomeye cyane by’umwihariko abafana bazaryoherwa kuko ari amakipe abiri akina umukino mwiza kandi akunda gushaka ibitego.

Ati “AS Kigali ni ikipe ikomeye, uyu mukino uzaba ukomeye hari ibyo maze iminsi mbona mu bakinnyi banjye. Abavunitse barimo kugaruka n’abandi urabona ko bameze neza.”

“AS Kigali ifite abakinnyi beza bafite inararibonye ikagira umutoza mwiza umaze kumenyera shampiyona, wakinnye umupira kandi ufite byinshi azi. Kuri njye ndabona uzaba ari umukino mwiza ku bafana bacu bazaza kuwureba.”

APR FC izakina uyu mukino igomba kwihorera kuri AS Kigali yayipfubirije ibirori iyitsinda ibitego 2-1 ku mukino usoza shampiyona y’umwaka ushize ubwo yari igiye kwishimira igikombe yari yaramaze kwegukana abafana bagataha batishimye kuko bashakaga kucyegukana ariko banatsinze.

Mu mikino itanu iheruka guhuza aya makipe, APR FC yatsinze kabiri, AS Kigali itsinda rimwe indi mikino ibiri zirayinganya.

Imikino izaba kuwa Gatandatu no ku Cyumweru irabanzirizwa n’undi ugomba kuba kuri uyu wa Gatanu aho Espoir FC y’i Rusizi iheruka gutsindwa na APR FC, isura Kiyovu Sports yahagaritse umuvuduko wa Police FC iyitsinda 2-1. Umukino uza kubera ku Mumena saa 15:30.

Kugeza ku munsi wa 12 shampiyona iyobowe na Rayon Sports ifite amanota 29 ikurikiwe na APR FC ifite 27, AS Kigali 23 mu gihe Police FC iza ku mwanya wa kane n’amanota 21.

Uko imikino y’umunsi wa 12 ihagaze

Kuwa Gatanu tariki ya 6 Mutarama 2017

- Kiyovu vs Espoir (Mumena, 15h30)

Kuwa gatandatu tariki ya 7 Mutarama 2017

- APR FC vs AS Kigali (Stade de Kigali, 15:30)
- Bugesera vs Kirehe (Nyamata, 15:30)
- Amagaju vs Musanze (Nyamagabe, 15:30)
- Police vs Sunrise (Kicukiro, 15:30)

Ku cyumweru tariki ya 8 Mutarama 2017

- Etincelles vs Marines Fc (Stade Umuganda, 15:30)
- Rayon Sports vs Pépinière (Stade de Kigali, 15:30)
- Gicumbi vs Mukura VS (Stade de Gicumbi, 15:30)

APR FC yiteguye guhangana n'abahoze ari abakinnyi bayo
Umutoza wa APR FC, Jimmy Mulisa avuga ko uyu mukino uzaba ukomeye ndetse ko abafana bazaryoherwa
Mubumbyi Barnabe (wambaye umuhondo) agiye kongera guhura n'ikipe yahozemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE