Kwamamaza

APR FC na Rayon Sports mu ihurizo ku munsi wa gatatu wa shampiyona

Yanditswe kuya 28-10-2016 saa 11:04' na Manzi Rema Jules


Shampiyona y’icyiciro cya mbere mu Rwanda, Azam Rwanda Premier League irakomeza kuri uyu wa Gatanu hakinwa imikino y’umunsi wa gatatu, aho mu mikino ikomeye APR FC icakirana na Mukura VS uyu munsi, Rayon Sports ikazakira AS Kigali ku Cyumweru.

APR FC na Rayon Sports ntizitwaye neza ku munsi wa kabiri wa shampiyona kuko APR FC yanganyije na Gicumbi FC igitego 1-1, Rayon Sports nayo inganyiriza i Rusizi na Espoir FC 0-0.

APR FC irakira Mukura VS y’i Huye nayo itaritwaye neza ku mukino uheruka itsindwa n’Amagaju mu rugo igitego 1-0, kuri uyu wa Gatanu tariki 28/10/2016 kuri Stade ya Kigali saa kumi n’ebyiri.

Iyi kipe y’Ingabo z’Igihugu irakina uyu mukino idafite rutahizamu Twizerimana Onesme urwaye, ndetse na myugariro Usengimana Faustin ushidikanywaho kubera imvune y’ino afite.

Gusa yagaruye abakinnyi barimo Rugwiro Herve, Habyarimana Innocent na Irambona Fabrice bari bamaze iminsi bafite imvune, mu gihe muri Mukura VS ifite ikibazo cya Hakizimana Kevin urwaye na Ngama Emmanuel wahagaritswe kubera imyitwarire mibi ariko ikaba yagaruye rutahizamu Ndayishimiye Christophe.

Mukura VS iraba ihura na rutahizamu wayitsindiye ibitego byinshi umwaka ushize, Muhadjili Hakizimana kuri ubu wamaze kwerekeza muri APR FC amaze gutsindira ibitego bibiri mu mikino ibiri harimo kimwe rukumbi cyahesheje iyi kipe inota rimwe imbere ya Gicumbi FC ku mukino uheruka.

APR FC ifite akazi gakomeye ko kwikura imbere y’ikipe ya Okoko wayitsindiye i Kigali umwaka ushize w’imikino ibitego 2-0, bya Yussuf Habimana na Christophe Ndayishimiye.

Ku ruhande rwa Rayon Sports yananiwe gutsindira i Rusizi, umutoza Masoudi Djuma agatunga agatoki ikibuga, kuri iyi nshuro iraba yagarutse kuri Stade ya Kigali aho yanyagiriye Police FC ibitego 3-0 ku munsi wa mbere ufungura shampiyona.

Nyuma y’imyitozo bamaze icyumweru bakora, Masoudi yatangaje ko uretse myugariro Ange Mutsinzi Jimmy udahari kuko ari mu bizamini, abandi bakinnyi batari bagaragaye i Rusizi barimo Manzi Thierry, Mugheni Fabrice, Muhire Kevin na Senyange Yvan bamaze kugaruka mu myitozo.

Andi mahirwe meza kuri iyi kipe ni uko yagaruye rutahizamu Mussa Camara wari wavunikiye ku mukino wa gicuti wahuje iyi kipe na AS Kigali, amaze kuyitsinda ibitego bibiri wenyine byatandukanyije impande zombi kuri uwo mukino.

Rayon Sports ifite umukoro wo gutsinda Eric Nshimiyimana n’abasore be itigeze itsinda umwaka ushize kuko mu mukino ubanza yatsinzwe 2-1 i Muhanga mu mukino wo kwishyura banganya 1-1.

Imikino yose iteganyijwe ku munsi wa gatatu wa shampiyona:

Kuwa Gatanu, tariki 28 Ugushyingo 2016

APR FC vs Mukura VS (Stade ya Kigali, 18:00)

Kuwa Gatandatu, tariki 29 Ugushyingo 2016

Sunrise Fc vs Marines Fc (Kicukiro, 15:30)

Bugesera Fc vs Espoir Fc (Bugesera, 15:30)

SC Kiyovu vs Gicumbi Fc (Mumena, 15:30)

Pépinière Fc vs Kirehe Fc (Ruyenzi, 15:30)

Ku Cyumweru, tariki 30 Ugushyingo 2016

Etincelles vs Musanze Fc (Umuganda, 15:30)

Amagaju Fc vs Police Fc (Huye, 15:30)

Rayon Sports vs AS Kigali (Stade ya Kigali, 15:30)

Muhadjili Hakizimana (ibumoso) araba ahura n'ikipe ya Mukura VS yahozemo
Usengimana Faustin (iburyo) ashobora kutagaragara ku mukino wa Mukura VS
Mussa Camara wavunikiye ku mukino wa gicuti na AS Kigali yamaze kugaruka
Mugheni Fabrice(iburyo) nawe ari mu bakinnyi bakomeye ba Rayon Sports batari bakinnye umukino uheruka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved