APR FC yanganyije na Kirehe FC, ikomeza gutera umugongo igikombe

Yanditswe na Jah d’eau Dukuze
Kuya 11 Werurwe 2017 saa 08:47
Yasuwe :
0 0

Ikipe ya APR FC yongeye gutakaza amanota ku mukino wa gatatu wikurikiranya, ubwo yanganyaga na Kirehe FC ubusa ku busa mu mukino w’ umunsi wa 20 wa shampiyona y’Umupira w’Amaguru mu Rwanda.

APR FC yaherukaga kunganya na Musanze FC nyuma yo gutsindwa na Gicumbi FC, yerekeje i Kirehe nta kosa yemerewe gukora imbere ya Kirehe yari ku kibuga cyayo, ahubwo isabwa gutsinda kugira ngo ikomeze kotsa igitutu Rayon Sports ya mbere.

Imvune zimaze iminsi muri iyi kipe zatumye n’ubundi Mulisa Jimmy akora impinduka, aho Ngabo Albert yagumye mu mwanya wa Rusheshangoga Michel mu gihe Imanishimwe Emmanuel yari yasimbuwe na Rutanga Eric. Ininahazwe Fabrice, yakinaga umukino we wa mbere atangira muri APR FC uyu mwaka, mu gihe Nshuti Innocent yafatanyaga na Issa Bigirimana gushaka ibitego bimaze kuba imbonekarimwe kuri iyi kipe y’Ingabo z’Igihugu.

Iminota ya mbere y’ umukino, APR FC yokeje igitutu Kirehe FC gusa kubona izamu ry’ iyi kipe yo mu Gisaka biba ihurizo.

Iyi kipe yari iri ku kibuga cyayo imbere y’abafana, byagaragaraga ko ifite ishyaka rikomeye, yashoboye kuburizamo ubusatirizi bwose APR FC yakoraga, bituma amakipe yombi ajya kuruhuka anganya 0-0.

Mu gice cya kabiri, Jimmy Mulisa yinjije mu kibuga Onesme Twizerimana na Sekamana Maxime, gusa nta kintu kinini bigeze bahindura kuri uyu mukino byaje kurangira nta kipe nimwe ibonye inshundura z’ iyindi.

APR FC nyuma yo kunganya uyu mukino bivuze ko igumye ku mwanya wa kabiri n’ amanota 40, amanota atatu inyuma ya Rayon Sports inafite imikino ibiri y’ ibirarane.

Mu yindi mikino, Cyubahiro Janvier yafashije As Kigali gutsinda Amagaju 1-0 mu gihe Kabula Mouhamed na Mugisha Gilbert batumye Pépiniére ibona amanota atatu bwa kabiri ubwo batsindaga Etincelles 2-0 mu gihe Espoir FC na Gicumbi FC banganyirije i Rusizi 1-1.

Indi mikino iteganyijwe kuri iki Cyumweru, tariki ya 12 Werurwe 2017

- Mukura VS vs Police Fc (Stade Huye)

- Marines Fc vs Bugesera Fc (Stade Umuganda)

- Musanze Fc vs SC Kiyovu (Musanze)


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza