APR FC yongeye guhirwa n’iminota ya nyuma inganya na Police 2-2

Yanditswe na Jah d’eau Dukuze
Kuya 23 Ukuboza 2016 saa 08:01
Yasuwe :
0 0

Igitego Habimana Hussein yitsinze ku munota wa 87 gitumye APR FC ikura inota rimwe kuri Police mu mukino wabonetsemo ibitego bine byose byaturutse ku makosa akomeye y’ab’inyuma b’aya makipe.

Uyu mukino w’umunsi wa 10 wa shampiyona waberaga kuri Stade ya Kigali, watangiye amakipe yombi asa nk’ayigana, gusa APR FC aba ari yo ibona amahirwe ya mbere y’umukino nubwo Issa Bigirimana yagiye ayahusha nkuko amaze kubimenyereza abakunzi b’iyi kipe y’ingabo z’igihugu.

Issa yahushije amahirwe yabazwe

Igitego cya mbere cy’umukino cyaje kuboneka aho benshi batakekaga, myugariro wa Police Jean Paul yaterekeye umupira umunyezamu we Nzarora Marcel mu rubuga rw’amahina, maze uyu awufatisha amaboko aho kuwuteresha akaguru. Coup Franc yavuyemo, ni yo Muhadjili yashyize mu nshundura Police FC igipanga urukuta.

Nyuma yuko igice cya mbere kirangiriye ari igitego 1-0, Police FC yatangiye igice cya kabiri iri hejuru nkuko imaze kubimenyerwaho. Iki gitutu cy’ikipe ya Seninga Innocent, ntabwo cyaguye neza ba myugariro ba APR FC, dore ko Herve Rugwiro yaje guhagarara nabi mu kibuga, Danny Usengimana akamutsindana igitego ku munota wa 47 gusa.

Uyu Herve Rugwiro, ni na we waje gukorera ikosa Danny Usengimana hafi y’umurongo w’urubuga rw’umunyezamu, maze Coup Franc ivuyemo Muvandimwe Jean Marie, uhagaze neza muri iyi minsi, akaza kuyirenza urukuta rwa APR FC ukaruhukira mu izamu rya Emery Mvuyekure wahoze muri iyo kipe.

Mu gihe byagaragaraga ko Police FC igiye gutahana amanota atatu yose ukurikije ibyaberaga mu kibuga, APR FC yaje kwishyura igitego ku munota wa 87, ni ku mupira waterewe ku ruhande na Imanishimwe Emmanuel, maze umunyezamu Bwanakweri wari wagiye mu kibuga asimbuye Nzarora wavunitse, akaza kuwukubita ku kaguru ka myugariro we Hussein Habimana ukaruhukira mu nshundura.

Iyi ni inshuro ya gatatu APR FC ikura amanota mu minota yanyuma, nyuma yo gutsinda Mukura ibitego bibiri muri iyi minota, ndetse na Sunrise, Rusheshangoga akayibabaza mu minota y’inyongera.

Mu yindi mikino, Hatrick ya Shaban Hussein Tchabalala, yatumye Amagaju anyagira Gicumbi 4-0, mu gihe Bugesera yihereranye Mukura ikayitsinda 2-0. Igitego cya Kambale Salita mu minota yanyuma, na cyo cyatumye Espoir inganyiriza i Rubavu 1-1. Kuri uyu wa gatandatu, Rayon Sports iri bwakire Musanze i Nyamirambo, Kiyovu yakire Sunrise ku Mumena mu gihe Marines iri kumwe na As Kigali i Rubavu.

U Rwanda na Congo basinye amasezerano yo korohereza abaturage babo kubona pansiyo badasiragiye

Amafoto:Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza