Arsenal na Chelsea zageze ku mukino wa nyuma wa Europa League, Abongereza bakora amateka (Amafoto)

Yanditswe na Eric Tony Ukurikiyimfura
Kuya 10 Gicurasi 2019 saa 07:38
Yasuwe :
0 0

Pierre-Emerick Aubameyang yafashije Arsenal kugera ku mukino wa nyuma wa Europa League nyuma yo kuyitsindira ibitego bitatu mu mukino wo kwishyura wa ½, aho yasanze Valencia iwayo, ikayitsinda ibitego 4-2 ndetse ikayisezerera ku bitego 7-3 mu mikino yombi. Ku mukino wa nyuma, Arsenal izahura na Chelsea yasezereye Eintracht Frankfurt kuri penaliti.

Mu mukino wo kwishyura wabereye kuri Mestalla Stadium kuri uyu wa Kane, Valencia yaje ishaka igitego hakiri kare, isatira Arsenal mu buryo bukomeye ndetse biza gutanga umusaruro ku munota wa 11 ubwo Kevin Gameiro yafunguraga amazamu ku mupira yahawe na Rodrigo.

Arsenal yahise ikanguka, itangira gusatira, ibona igitego cyo kwishyura ku munota wa 17 ku mupira Alexandre Lacazette yahaye Pierre-Emerick Aubameyang acika ba myugariro ba Valencia, ari inyuma gato y’urubuga rw’amahina, atera umupira umunyezamu Neto wari uhagaze ahagana imbere ntiyabasha kuwugeraho ujya mu izamu.

Nyuma y’uko igice cya mbere cyari cyarangiye amakipe yombi anganya igitego 1-1, Arsenal yatsinze igitego cya kabiri cyatsinzwe na Alexandre Lacazette ku munota wa 50, Kevin Gameiro yishyurira Valencia nyuma y’iminota umunani mu gihe Aubameyang yatsinze ibindi bitego ku munota wa 69 n’uwa 88.

Umutoza wa Arsenal, Unai Emery, benshi bahaye akabyiniriro ka ‘Mr Europa League’ nyuma yo kwegukana iri rushanwa mu 2014, 2015 na 2016 atoza Seville FC, agiye kongera gukina umukino waryo wa nyuma.

U Bwongereza, bwaherukaga kugira amakipe abiri ku mukino wa nyuma mu irushanwa nk’iri mu 1972 ubwo ryitwaga UEFA Cup, aho Tottenham yaryegukanye itsinze Wolves mu mikino ibiri bakinnye.

Undi mukino wa ½ wabaye, Chelsea yari mu rugo, yanganyije na Eintacht Frankfurt igitego 1-1 (2-2 mu mikino yombi), ikomeza kuri penaliti 4-3, aho yasanze Arsenal ku mukino wa nyuma uzaba tariki ya 29 Gicurasi 2019 i Baku muri Azerbaijan.

Ruben Loftus-Cheek yari yafunguye amazamu ku ruhande rwa Chelsea ku munota wa 28, igitego cyishyuwe na Luka Jović nyuma y’iminota ine amakipe yombi avuye kuruhuka. César Azpilicueta yahushije penaliti ku ruhande rwa Chelsea mu gihe Martin Hinteregger na Goncalo Paciencia ari bo bazihushije ku ruhande rwa Eintracht Frankfurt.

Chelsea yaherukaga ku mukino wa nyuma wa Europa League mu 2013, aho yegukanye iri rushanwa nyuma yo gutsinda Benfica yo muri Portugal ibitego 2-1, itozwa na Raphael Benitez.

Ni ku nshuro ya mbere mu mateka y’ibikombe by’i Burayi, imikino ya nyuma haba muri UEFA Champions League na Europa League, hahuriye amakipe yo mu gihugu kimwe. Muri Champions League y’uyu mwaka, Liverpool izahura na Tottenham ku mukino wa nyuma uzaba tariki ya 1 Kamena 2019 i Madrid.

Abafana ba Valencia bari baje gushyigikira ikipe yabo
Mesut Ozil acenga Francis Coquelin wigeze gukina muri Arsenal
Ahagana ku munota wa 10 w'umukino, mu kibuga hagaragayemo imipira ibiri
Kevin Gameiro afungura amazamu ku munota wa 11
Yahise aza gushimira Rodrigo wari umuhaye umupira
Aubameyang atsinda igitego cyo kwishyura muri uyu mukino
Alexandre Lacazette atsinda igitego cya kabiri cya Arsenal
Aubameyang na Lacazette bishimira igitego
Umunya-Gabon amaze gutsindira Arsenal ibitego 29 muri uyu mwaka w'imikino
Kevin Gameiro atsinda igitego cya kabiri cya Valencia
Byari ibyishimo bikomeye ku bakinnyi ba Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza