AS Kigali yaguye miswi na APR FC mu mukino wo guhatanira umwanya wa kabiri

Yanditswe na Manzi Rema Jules
Kuya 19 Gicurasi 2017 saa 07:39
Yasuwe :
0 0

APR FC ikomeje kurwanira umwanya wa kabiri nyuma ya Rayon Sports yamaze kwegukana igikombe cya shampiyona, yananiwe kwisobanura na AS Kiagli mu mukino wabereye kuri stade ya Kigali i Nyamirambo zinganya igitego kimwe kuri kimwe.

APR FC yagiye muri uyu mukino yicaye ku mwanya wa kabiri n’amanota 54 mu gihe AS Kigali yo yari ifite 48 iri ku mwanya wa kane.

Aya makipe yombi atagihatanira igikombe kuko cyamaze kubona nyira cyo, yarwaniraga amanota yayafasha kurangiza ku mwanya wa kabiri kuko uretse amafaranga azahabwa amakipe hagendewe uko akurikirana, mu gihe Rayon Sports yaba yegukanye n’igikombe cy’Amahoro ikipe yabaye iya kabiri muri shampiyona yahagararira u Rwanda muri CAF Confederation Cup.

Byatumye nta mutoza n’umwe wari woroheje kuko yaba Jimmy Mulisa yifashishije abarimo Muhadjili Hakizimana wakinaga n’ikipe yamutije APR FC ku rundi ruhande Eric Nshimiyimana na we akaba yari yitabaje abakinnyi barimo Ntamuhanga Tumaine na Mubumbyi Barnabe bakinaga n’ikipe yabatije muri AS Kigali.

AS Kigali ni yo yatangiye isatira cyane hafi ku munota wa 10 ibona koluneri ariko umuzamu Kimenyi Yves muri iyi minsi urimo kugirirwa icyizere abyitwaramo neza.

APR FC na yo yagarutse mu mukino itangira gusatira, ibona uburyo bugera kuri bubiri bwo gutsinda harimo aho Nkinzingabo Fiston yazamukanye ku ruhande yihuta, awuhereza Bigirimana Issa ateye ishoti umupira uca ku ruhande gato ry’izamu ryari ririnzwe na Bate Shamiru.

Ku munota wa 27 AS Kigali yazamukanye umupira myugariro Rugwiro akorera ikosa kuri Mubumbyi umusifuzi Uwikunda Samuel amuha ikarita y’umuhondo atanga na Coup franc muri metero nka 23.

Yatewe neza na Ndayisaba Hamidu umuzamu Kimenyi agerageje gukuramo umupira agwana na wo mu rushundura.

Aya makipe azwiho kugira ubufatanye bukomeye mu gutizanya abakinnyi, yakomeje gusatirana, APR FC ishaka igitego cyo kwishyura na AS Kigali ishaka icya kabiri cy’umutekano, gusa igice cya mbere kirangira ari igitego 1-0.

Amakipe yombi avuye kuruhuka Jimmy Mulisa yakoze impinduka akuramo Nshimiyimana Imran na Habyarimana Innocent bose bahoze bakinira Police FC, yinjiza Djihad Bizimana na Tuyishimire Eric mu rwego rwo gukomeza gusatira.

AS Kigali yaje mu gice cya kabiri ikinira inyuma bituma APR FC ibona umwanya wo gusatira, ibona uburyo butandukanye ariko Issa Bigirimana abupfusha ubusa. Mulisa yaje gusimbuza akuramo Bigirimana yinjiza Nshuti Innocent.

Mu minota ya nyuma APR FC yokeje igitutu izamu rya Bate, Innocent Nshuti atera ishoti rikomeye Bate akoze ku mupira ukubita igiti cy’izamu uragaruka ugaruka mu kibuga.

Ku mupira wari uvuye kuri koruneli mu minota y’inyongera, Nkinzingabo Fiston yateye ishoti mu kavuyo kari imbere y’izamu rya Bate umupira ujya mu rushundura umukino utangira ari 1-1.

Mu yindi mikino yabaye, Police FC yatsinze Sunrise FC 3-2, Etincelles itsinda 2-1 Marines na ho Musanze itsindirwa mu rugo n’Amagaju FC 1-2.

Indi mikino uko yarangiye

AS Kigali 1-1 APR Fc
Marines 1-2 Etincelles
Sunrise 2-3 Police
Kirehe 1-2 Bugesera
Musanze 1-2 Amagaju

Abakinnyi babanjemo ku mpande zombi:

APR FC

Kimenyi Yves, Rusheshangoga Michel, Imanishimwe Emmanuel, Rugwiro Herve, Nsabimana Aimable, Mukunzi Yannick, Nshimiyimana Imran (Tuyishimire Eric 45”), Nkinzingabo Fiston, Hakizimana Muhadjili, Habyarimana Innocent (Bizimana Djihad 45”) Issa Bigirimana (Nshuti Innocent 74”).

AS Kigali

Bate Shamiru, Iradukunda Eric, Mutijima Janvier, Bishira Latif, Kayumba Soter, Murengezi Rodriguez, Mubumbyi Barnabe, Ntamuhanga Tumaine Tity, Uwimana Emmanuel Nsoro (Sebanani Emmanuel Crespo 83”),Ndayisaba Hamidu na Nsabimana Eric Zidane.

Abakinnyi na APR FC babanje mu kibuga
Abakinnyi ba AS Kigali babanje mu kibuga
Abasifuzi n'abakapiteni ku mpande zombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza