00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yasezerewe mu mikino Nyafurika

Yanditswe na Bukuru JC
Kuya 24 Ukwakira 2021 saa 10:11
Yasuwe :
0 0

AS Kigali yari ihagarariye u Rwanda mu irushanwa Nyafurika rya CAF Confederation Cup, yasezerewe itarenze ijonjora rya kabiri nyuma yo gutsindwa na Daring Club Motema Pembe ibitego 2-1 mu mukino wo kwishyura wabereye i Kinshasa kuri iki Cyumweru.

Daring Club Motema Pembe yakiniraga mu rugo, yabaye ikipe imwe rukumbi yo muri Repubulika Iharanira Demokarasi yatsinze kandi igakomeza mu rindi jonjora mu irushanwa yari isanzwemo nyuma y’uko AS Vita Club yasezerewe naho TP Mazembe ikava muri Champions League.

Iyi kipe y’umutoza Alain Landreut yongeye gutsinda ibitego 2-1 nk’uko byagenze i Kigali, ikomeza mu ijonjora rya gatatu ribanziriza amatsinda ku giteranyo cy’ibitego 4-2 mu mikino yombi.

Muri uyu mukino wabereye kuri Stade des Martyrs, Katy Katulondi yafunguye amazamu ku munota wa 27 mu gihe byasabye AS Kigali gutegereza umunota wa 43, yishyurirwa na Kwizera Pierrot.

Karim Kimvuidi yatsinze igitego cya kabiri cya DCMP ku munota wa 48, cyashyize iherezo ku cyizere cya AS Kigali yasabwaga gutsinda kugira ngo yizere gukomeza.

Mu ijonjora rya CAF Confederation Cup rikurikiraho, rizakinwa hagati ya tariki ya 26 Ugushyingo n’iya 3 Ukuboza 2021, DCMP izahura n’imwe mu makipe yasezerewe muri CAF Champions League arimo APR FC yo mu Rwanda.

Umutoza wa AS Kigali, Nshimiyimana Eric, yari yitabaje abakinnyi barimo Ntwari Fiacre, Kwitonda Ally, Ishimwe Christian, Rurangwa Mossi, Bishira Latif, Mugheni Fabrice, Kwizera Pierrot, Haruna Niyonzima, Uwimana Guillain, Shaban Hussein na Saba Robert.

AS Kigali yasezerewe muri CAF Confederation Cup itsinzwe na DCMP ibitego 4-2 mu mikino ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .