Barcelona yanyagiye Chelsea ikatisha itike ya ¼ cya Champions League

Yanditswe na IGIHE
Kuya 15 Werurwe 2018 saa 08:18
Yasuwe :
1 0

FC Barcelona yanyagiye Chelsea FC yo mu Bwongereza ibitego 3-0 mu mukino wo kwishyura wa 1/8 cy’irushanwa rihuza amakipe yabaye aya mbere iwayo ku mugabane w’u Burayi, UEFA Champions League, wabereye ku kibuga cya Camp Nou ku mugoroba wo ku wa Gatatu, tariki ya 14 Werurwe 2018.

Amakipe yombi yari yanganyije igitego 1-1 mu mukino ubanza wabereye mu Bwongereza, yagombaga kwisobanura ngo hamenyekane igomba gukomeza mu kindi cyiciro.

Barcelona yakiniraga imbere y’abafana bayo 97 183 yatangiye umukino yotsa igitutu ikipe ya Antonio Conte yatangiye umukino yirinda kwinjizwa igitego hakiri kare.

Chelsea itahiriwe n’urugendo yagiriye muri Espagne ku munota wa gatatu gusa w’umukino, Lionel Messi yahaye ibyishimo abafana atsinda igitego cya mbere ndetse ku munota wa 20 afasha Ousmane Dembele kubona icya kabiri.

Amakipe yombi yagiye kuruhuka Barcelona iri imbere n’ibitego bibiri, ndetse mu gice cya kabiri, Messi yarangije icyizere cy’abafana ba Chelsea cyo gukomeza atsinda igitego cya gatatu cyabonetse ku munota wa 63.

Lionel Messi yanditse amateka yo gutsinda ibitego 100 mu mikino ya Champions League, amateka yari yihariwe na Cristiano Ronaldo.

Barcelona yasezereye Chelsea iyitsinze ibitego 4-1 mu mikino yombi.

Mu wundi mukino wabaye ikipe ya Bayern Munich yo mu Budage yasezereye Besiktas, ku giteranyo cy’ibitego 8-1 mu mikino yombi.

Amakipe yose yakomeje mu cyiciro cya ¼ cy’irangiza arimo Barcelona, Sevilla na Real Madrid zo muri Espagne, Bayern Munich yo mu Budage, Liverpool na Manchester City zo mu Bwongereza, AS Roma na Juventus zo mu Butaliyani. Biteganyijwe ko tombola y’uburyo amakipe azahura izakorwa kuri uyu wa Gatanu.

Messi yafunguye izamu ryari ririnzwe na Courtois ku munota wa gatatu w'umukino
Messi yagoye cyane ba myugariro b'ikipe ya Chelsea
Messi yahawe ikaze nk'umwami i Camp Nou
Messi yongeye gushimangira ko ari umukinnyi mwiza ku Isi
Ousmane Dembele ni we watsinze igitego cya kabiri ku munota wa 20
Messi na bagenzi be bishimira igitego cy'intsinzi
Messi yujuje ibitego 100 mu mikino ya UEFA Champions League
Abafana ba FC Barcelona bishimiye intsinzi babonye mu buryo bworoshye
Marcos Alonso yagerageje uburyo bwashoboraga kuvamo igitego ariko umupira ugonga izamu
Olivier Giroud (ibumoso) na Antonio Rüdiger barebanye nyuma yo kubura amahirwe yo gutsinda igitego
Eden Hazard na bagenzi be bari bacitse intege nyuma yo gutsindwa na FC Barcelona
Cesc Fàbregas (ibumoso) yari yasubiye ku kibuga yahozeho. Aha yarebanaga na Ngolo Kante bakinana muri Chelsea
Antonio Conte utoza Chelsea asuhuza Lionel Messi nyuma y'umukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza