CAF yemeje ko Rayon Sports ikomeza idakinnye na Onze Créateurs

Yanditswe na Manzi Rema Jules
Kuya 17 Werurwe 2017 saa 02:26
Yasuwe :
0 0

Rayon Sports ihagarariye u Rwanda mu mikino Nyafurika, CAF Confederation Cup, yakomeje mu kindi cyiciro nyuma yuko Ishyirahamwe ry’Umupira w’Amaguru muri Afurika, CAF, risohoye itangazo rikuraho umukino wo kwishyura wagombaga kuyihuza AS Onze Créateurs de Niaréla yo muri Mali kuri Stade Amahoro kuri uyu wa Gatandatu, tariki ya 18 Werurwe 2017.

Uyu mwanzuro wafashwe nyuma yuko FIFA ifatiye ibihano Mali byo kutitabira imikino mpuzamahanga kubera uruhare rwa Leta y’iki gihugu mu kwivanga mu mupira w’amaguru.

Kuwa Kane FIFA yasohoye itangazo rivuga ko nyuma y’icyemezo cya Leta ya Mali cyo guhagarika abayobozi 19 ba FEMAFOOT, nayo ihagaritswe mu bikorwa byose by’umupira w’amaguru ndetse n’amakipe agihagarariye mu marushanwa mpuzamahanga, kugeza igihe ibihano bizakurirwaho nkuko biteganywa n’ingingo ya 13 y’amategeko y’iri shyirahamwe.

Nkuko byemejwe n’Umunyamabanga Mukuru wa CAF, Hicham El Amrani abinyujije mu itangazo yashyizeho umukono rigashyikirizwa FERWAFA, yagize ati “ Twamenyeshejwe na FIFA ko Ishyirahamwe ry’Umupira w’Amaguru muri Mali ryahagaritswe mu bikorwa byose by’umupira w’amaguru. Kubera iyo mpamvu amakipe ahagarariye Mali mu marushanwa mpuzamahanga ntiyemerewe gukina imikino yayo mu mpera z’iki cyumweru. ”

Imikino yagombaga guhuza amakipe abiri yari ahagarariye Mali muri iri rushanwa, ariyo AS Onze Créateurs de Niaréla na Djoliba FC yakuweho ndetse ahita asezererwa.

AS Onze Créateurs yari yatsinze Rayon Sports igitego kimwe ku busa cya Boubacar Samassékou ku mukino ubanza wabereye i Bamako muri Mali yageze mu Rwanda ku gicamunsi cyo kuri uyu wa Kane, aho yiteguraga gukina umukino wo kwishyura; mu gihe Djoliba FC yagombaga guhura na Al Masry yo mu Misiri.

Rayon Sports ihagarariye u Rwanda ikomeje gutera intambwe iyiganisha mu mikino y’amatsinda aho isabwa gutsinda ikipe bazahura mu cyiciro gikurikiraho, izava mu zizaba zasezerewe mu mikino ya CAF Champions League.

Umukino ubanza uzahesha Rayon Sports kwandika amateka mashya mu Rwagasabo izawukina hagati ya tariki ya 7 na 9 mu gihe uwo kwishyura uteganyijwe hagati ya 14 na 16 Mata 2017.

Ku nshuro ya mbere, amakipe azagera mu mikino y’amatsinda muri iri rushanwa rimaze imyaka 14 rikinwa muri Afurika yavuye ku munani agera kuri 16 muri uyu mwaka.

Itangazo ryashyizwe hanze na CAF rikuraho umukino wagombaga guhuza Rayon Sports na Onze Créateurs
Ishyirahamwe ry'Umupira w'Amaguru mu Rwanda ryahise ryemeza ko Rayon Sports yakomeje mu kindi cyiciro kiyiganisha mu matsinda
Rayon Sports yakomeje mu cyiciro gikurikiraho muri CAF Confederation Cup

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza