Kwamamaza

Bombori bombori muri Rayon Sports: Minaert hagati ya Skol, Gacinya na Kimenyi

Yanditswe kuya 3-11-2016 saa 15:29' na Jah d'eau DUKUZE


Amakuru ava imbere mu ikipe ya Rayon Sports, avuga ko kuri ubu hari umwuka utari mwiza hagati y’ubuyobozi bw’ikipe y’umupira w’amaguru ndetse na bamwe mu bayobozi b’umuryango, ahanini ku bijyanye no kwemeza uwayobora iyi kipe.

Kutumvikana ku buyobozi bwa Rayon Sports FC, byatangiranye na komite nshya y’umuryango yatowe tariki ya 3 Mata 2016, aho aba basanze hari byinshi bitagenda neza mu buyobozi bw’ikipe yabo y’umupira w’amaguru, ni ko gutekereza uburyo baganira n’abayobora iyi kipe barangajwe imbere na Gacinya Denis.

Amakuru agera ku IGIHE ariko n’uko nyuma yaho nta kinini gihindutse ku miyoborere ya Rayon Sports FC, byatumye Umuryango uhita ufata icyemezo cyo gukuraho abayobozi b’iyi kipe.

Ikibazo cya Gacinya n'ubu ntikirabonerwa umuti muri Rayon Sports

Komite y’umuryango wa Rayon Sports yacitsemo ibice kubera Gacinya Denis

Ku ikubitiro, Komite y’Umuryango wa Rayon Sports, yari yumvikanye ko basezerera Gacinya Denis na Komite ye nyuma yo kubona amakuru atari make y’ikoreshwa nabi ry’umutungo, aho kenshi iyi kipe yisangaga ifite ibirarane by’abakinnyi n’abatoza, nyamara hari ahantu hatandukanye yagakwiye kuba iri gukura amafaranga.

Ibintu byaje kuba bibi kurushaho kandi ubwo abakinnyi bayo babiri, Davis Kasirye na Ismaily Diarra, bagurishwaga maze amafaranga baguzwe ntavugweho rumwe.

Intangiriro y’ibibazo byo mu buyobozi bw’Umuryango wa Rayon Sports ariko yaje kuva ku kutumvikana igihe cya nyacyo cyo gukuraho Gacinya Denis ndetse n’uzamusimbura.

Amakuru IGIHE ifitiye gihamya, avuga ko bamwe mu bagize komite bari bifuje ko Gacinya Denis na bagenzi be basezererwa mu ikipe kuko hari ibintu byinshi bicaga, mu gihe ikindi gice kirimo na Perezida Kimenyi Vedaste, cyaje kubyanga kivuga ko igihe kitaragera.

Uku kwisubiraho kwa Kimenyi Vedaste ushyigikiwe na Visi Perezida wa mbere ushinzwe ubukungu Muhirwa Prosper , kwababaje abandi bayobozi bayoboranaga mu muryango batiyumvishaga impamvu bakomeza gutegereza ko ibintu bipfa kurushaho. Aba, bakaba barimo uwari Umunyamabanga Mukuru w’Umuryango wa Rayon Sports Ange Claudine Musabende, Umubitsi Habarugira Vital na Visi Perezida wa mbere ushinzwe imiyoborere Rudasingwa Jean Marie Vianney bahisemo kwegura.

Nubwo ubwegure bw’aba bayobozi butari bwemerwa burundu n’Umuryango, umwe mu bari imbere mu Ikipe ya Rayon Sports yadutangarije ko aba bababajwe cyane n’icyemezo cya Kimenyi ndetse atubwira ko ubuyobozi ubundi bufite uburenganzira bwo gusezerera abayobozi b’ikipe isaha iyo ari yo yose. Uyu yagize ati “Iyo urebye muri sitati y’ umuryango, usanga bariya bayobozi (b’ikipe) ntaho banditse. Ni nka Komisiyo, Umuryango ufite uburenganzira bwo kubasezerera uramutse ubyifuje. Ni byo byendaga gukorwa rero."

SKOL Irifuza ko Ivan Minaert yakwegurirwa Rayon Sports

Tariki ya 15 Gicurasi 2014, uruganda rwenga inzoga rwa SKOL, rwasinyanye amasezerano y’ubufatanye na Rayon Sports yagombaga kumara imyaka itatu. Kuri gahunda, Rayon Sports yagombaga kubona ibihumbi 50 by’ama-Euro mu mwaka wa mbere, 60 mu wa kabiri ndetse na 72 mu wa gatatu. Ibi bikaba bivuze ko aya masezerano agiye kurangira Rayon Sports ibonye angana na 169 900 243Frw.

Hejuru y’aya mafaranga, uruganda rwa Skol rwagiye rufasha Rayon Sports mu bindi bitandukanye, birimo kwakira iyi kipe no gutanga uduhimbazamusyi ku mikino itandukanye.

Amakuru agera ku IGIHE ariko, avuga ko abayobozi b’uru ruganda na bo bari mu batarishimiye uburyo amafaranga akoreshwa muri Rayon Sports, cyane cyane ku bibazo bidashira biyihoramo bigatuma ititwara neza mu mikino ya shampiyona. Ibi ngo bikaba biri mu byatumye bakomeza guseta ibirenga mu kongera amasezerano mashya n’iyi kipe, dore ko asanzwe arangirana n’intangiriro z’umwaka utaha.

Ivan Wulffaert wa SKOL arifuza impinduka mu buyobozi bwa Rayon Sports

Kuri iki, umwe mu begereye Umuyobozi wa SKOL Ivan Wulffaert, yadutangarije ko Wulffaert yaba yarahaye icyifuzo umuryango wa Rayon Sports, ko yareka gukomeza gushyiraho abayobozi kuko ari abafana , ahubwo ikazana umuntu umwe w’inzobere ikamuha akazi ko gukurikirana ikipe burundu, akaba ari na we ubazwa ubuzima bwose bw’ikipe.

Iki gitekerezo kikaba cyarumviswe neza n’Umuryango wa Rayon Sports, ni ko kuzana Ivan Minaert ngo abe yahabwa iyi kipe nyuma yo kubigirwaho inama na Skol.

Mu gihe ibiganiro byari bigeze kure ariko ngo Ivan Minaert yegurirwe Rayon Sports, ndetse hategerejwe ko ubuyobozi bw’umuryango bweguza komite isanzwe ya Rayon Sports FC, ni bwo Kimenyi Vedaste uyobora umuryango yaje kwisubiraho, atangaza ko atahita asezerera Gacinya. Impamvu yaba yaramuteye gufata iki cyemezo ntabwo iramenyekana, gusa byatumye komite ye icikamo ibice ndetse batatu baregura.

Mu kiganiro aherutse kugirana na IGIHE, Ivan Jacky Minaert, yari yatangaje ko akivugana na Rayon Sports gusa ko ibiganiro n’iyi kipe nubwo byakwanga ngo nta gahunda afite yo kuva mu Rwanda. Yari yagize ati “Ndi mu biganiro na Rayon Sports, nshaka kubanza kureba niba bikunda. Gusa nintanumvikana nayo sinzasohoka mu Rwanda, sinshaka kujya gukorera hanze babimenye.”

Ivan Minaert yashoboraga gusimbura Gacinya ku buyobozi bwa Rayon Sports FC

Rayon Sports kugeza ubu iri ku mwanya wa kabiri muri shampiyona n’amanota arindwi nyuma y’umunsi wa gatatu. Iyi kipe, ikaba iri bwerekeze i Rubavu mu mpera z’icyumweru mu mukino utoroshye igomba kwisobanuriramo na Marines yakundaga kuyigora hambere.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved