Bwa mbere, abatoza 12 b’Abanyarwanda bagiye guhabwa impamyabushobozi za CAF zo ku rwego rwa A

Yanditswe na Manzi Rema Jules
Kuya 17 Werurwe 2017 saa 10:39
Yasuwe :
0 0

Ku wa Mbere w’icyumweru gitaha, ku cyicaro cya Ferwafa i Remera, abatoza 12 b’Abanyarwanda bazashyikirizwa impamyabushobozi zo ku rwego rwo hejuru zitangwa n’Ishyirahamwe ry’Umupira w’Amaguru muri Afurika (CAF A License) bakaba bitezweho guteza umupira w’amaguru w’u Rwanda imbere.

Mu batoza bazahabwa izi mpamyabushobozi harimo Bizimana Abdou utoza Virunga FC yo muri Congo Kinshasa, Bisengimana Justin wungirije muri Police FC, Habimana Sosthène utoza Musanze FC, Mashami Vincent utoza Bugesera FC, Mbarushimana Abdou wa AS Muhanga, Cassa Mbungo André wa Sunrise FC, Nshimiyimana Eric wa AS Kigali na Okoko Godefroid wa Gicumbi FC.

Abandi ni Bizimana Ally na Kayiranga Jean Baptiste badafite amakipe, Rwasamanzi Yves wungirije muri APR FC kimwe na Seninga Innocent utoza Police FC.

Mu batoza 17 bari batangiye aya mahugurwa abagera kuri 12 nibo gusa bashoboye kwitwara neza ndetse bemererwa guhabwa Licence A ya CAF ari na yo yitwa Caf Pro licence.

Aya masomo bahabwa abafasha kugira ubunararibonye butuma bashobora gutoza amakipe atandukanye ku mugabane wa Afurika nta nkomyi.

Aganira na IGIHE, Kayiranga Jean Baptiste yavuze ko ari igikorwa kiza ku mupira w’amaguru mu Rwanda ariko atakibona nk’ikije gucyemura ibibazo ufite mu mitoreze.

Yagize ati “Ni ibintu byiza kuko habaye amahugurwa ararangira, abari babishinzwe baratugerageza bigenda neza. Turashima Imana kuko igihe umuntu yamaze mu mahugurwa kitapfuye ubusa.”

Yongeyeho ati “Bizagira icyo bimara gusa sinavuga ko bigiye guhaza ibyifuzo by’abafana kuko aba batoza 12 sibo bahindura ibintu. Ubundi kubaka umupira bihera mu batoza bo mu cyiciro cya kabiri cyangwa mu mashuri y’abana. Byagira icyo bihindura cyane ari uko aba bo hasi na bo bahawe ubwo bushobozi ariko hakanashakwa uko muri ibyo byiciro guhangana kwiyongera, abana bakazamuka bakarishye koko.”

Aba batoza ni abakurikiye amahugurwa yamaze ibyumweru bibiri yabereye kuri FERWAFA umwaka ushize ku bufatanye bwa CAF na FIFA aho bahugurwaga n’abarimu ba CAF barimo Mukeba Joseph uturuka muri Repubulika Iharanira Demokarasi ya Congo, yungirijwe n’Umurundi Mupenda Mohsin ndetse na Antoine Rutsindura w’Umunyarwanda.

Muri rusange ni ubwa mbere abatoza b’Abanyarwanda babonye impamyabushobozi zo kuri uru rwego bakaba biyongereye ku bandi 114 bafite license C, barindwi bafite license B.

Kayiranga Baptiste avuga ko izi mpamyabushobozi zitakemura ibibazo by'imitoreze biri mu Rwanda mu gihe umupira w'amaguru udatangiriye mu bakiri bato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244