Camara yahagurukije Aba-Rayon ubugira kabiri, ikipe yabo yanikira mukeba(Amafoto)

Yanditswe na Manzi Rema Jules
Kuya 8 Mutarama 2017 saa 06:35
39 27

Rutahizamu ukomoka muri Mali, Moussa Camara wari umaze iminsi ashyirwa mu majwi n’abafana kuba atari kubonera Rayon Sports ibitego, yahaye ibyishimo abakunzi b’iyi kipe atsinda ibitego bibiri muri bitatu batsinze Pépinière FC, bihesha ikipe ye gusiga APR FC bahanganiye igikombe amanota atanu.

Pépinière FC yakinnye uyu mukino nyuma yo kwisubiraho ku cyemezo yari yafashe cyo gusezera muri shampiyona. Iyi kipe yari imaze ibyumweru bitatu idakora imyitozo ndetse yaranasezereye abakinnyi, yagaragaje umukino mwiza mu gice cya mbere yihagararaho imbere ya Rayon Sports kirangira ari ubusa ku busa ndetse bamwe batangira kwibaza ko ishobora gutesha amanota Rayon Sports.

Gusa icyizere cyose cyayoyotse ku munota wa 55 ubwo rutahizamu Moussa Camara yafunguraga amazamu ndetse nyuma y’iminota itandatu ashyiramo icya kabiri, maze intsinzi ishimangirwa na Nahimana Shasiir watsinze icya gatatu ku munota wa 82 kiba igitego cye cya 11 mu mikino 12 ya shampiyona amaze gukina, naho Pépinière ishyiramo icy’impozamarira ku munota wa 89, birangira ari ibitego 3-1.

Umunya-Mali Camara wari umaze iminsi adatsinda ndetse igitutu ku bafana bamwitezeho byinshi kikaba cyari cyatangiye kuzamuka, yagerageje kwikosora atsinda ibitego bibiri.

Akimara gutsinda igitego cya mbere, yegereye aho abanyamakuru bafotoreraga azamura akaguru k’ibumoso yatsindishije yerekana urukweto rushya yari yambaye naho ashyizemo icya kabiri bwo azamura umupira yari yambaye, yerekana imiterere y’umubiri we yiterera mu kirere.

Nyuma yo gutsinda Pépinière FC, Rayon Sports yashyize ikinyuranyo cy’amanota atanu hagati yayo na APR FC yatakaje ku wa Gatandatu imbere ya AS Kigali, ikaba igejeje amanota 32 mu gihe APR FC ifite 27. Pépinière yo yakomeje kuguma ku mwanya wa nyuma n’inota rimwe gusa.

Mu mikino izakurikira, APR FC izasura Marines i Rubavu tariki 13 Mutarama naho Rayon Sports yakire Etincelles tariki 15 Mutarama kuri Stade ya Kigali, mbere y’uko zihura ubwazo ku wa 21 uku kwezi.

11 babanjemo ku mpande zombi

Pepiniere FC: Ahishakiye Hertier, Niyomwungeri Yves, Habamahoro Vincent, Ishimwe Kevin, Bavakure Ndekwe Felix, Mugisha Gilbert, Hakizimana Abdourkarim, Hitimana Omar, Ngiruwonsanga Jean d’Amour, Kagabo Abedi, Nahimana Abdoul

Rayon Sports: Ndayishimiye Eric Bakame, Rwigema Yves, Dominique Nshuti Savio, Manishimwe Djabel, Nzayisenga Jean D’Amour, Mugisha Francois, Kakure Mugheni Fabrice, Nova Bayama, Moussa Camara, Nahimana Shasiir, Nsengiyumva Moustapha

Nahimana Shasiir yigaragaje cyane muri uyu mukino wahuzaga Rayon Sports na Pépinière
Camara yari yagoye ba myugariro ba Pépinière. Aha yari amaze gucenga Hitimana Omar
Camara yishimira igitego cya mbere
Camara yishimiye igitego yari amaze gutsinda yereka abanyamakuru urukweto rushya yari yambaye
Abafana bari benshi ku kibuga bagiye gushyigikira Rayon Sports
Masudi Djuma asuhuzanya na Kayiranga Baptiste utoza Pépière
Abatoza ba Rayon Sports bagendaga baganira mbere y'uko umukino utangira

Amafoto: Manzi Rema Jules


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE