Kwamamaza

Champions League: Arsenal na PSG zakomeje, Manchester City yishyira mu mazi abira

Yanditswe kuya 24-11-2016 saa 10:54' na Manzi Rema Jules


Mu mikino ihuza amakipe yabaye aya mbere iwayo ku mugabane w’u Burayi, umukino w’umunsi wari wahuje Arsenal na Paris Saint Germain zanganyije, ariko zibona itike yo gukina 1/8, naho Manchester City mu Budage inanirwa gutsinda Borussia Moenchengladbach amahirwe yo gukomeza mu cyiciro gikurikiraho iyoboye itsinda arayoyoka.

Mu gihe hasigaye gukina umukino wa nyuma w’imikino y’amatsinda kugira ngo amakipe yose azerekeza muri 1/8 amenyekane, mu mikino yabaye kuri uyu wa Gatatu, tariki 23 Ugushyingo 2016, hagaragayemo gutungurwa ku makipe akomeye yanahabwaga amahirwe yo kwitwara neza.

Ku kibuga Emirates, Arsenal yari yakiriye Paris Saint Germain isabwa kuyitsinda kugira ngo yizere kuzayobora itsinda A kuko zombi zanganyaga amanota 10, ariko ntibyayihiriye kuko umukino warangiye ari ibitego 2-2.

Uyu mukino wagaragayemo amahane hagati ya rutahizamu Edson Cavan na Aaron Ramsey, n’ibitego bibiri byitsinzwe kuri buri kipe.

Edinson Cavani niwe wafunguye amazamu ku munota wa 18, kiza kwishyurwa kuri penaliti na Olivier Giroud utagisiba gutsinda uko ahawe amahirwe yo kujya mu kibuga, ku munota wa 45 nyuma y’ikosa ryari rikorewe Alexis Sanchez.

Mu gice cya kabiri, Arsenal yarushijwe cyane PSG igera imbere y’izamu inshuro nyinshi ariko Cavan ananirwa kubyaza umusaruro amahirwe yabonaga biza no gukora ku ikipe ye ubwo Marco Verratti yitsindaga ku munota wa 60 nubwo bitatinze ngo na Alex Iwobi yitsinde igitego cyo ku nganya byatumye umukino urangira ari 2-2.

Mu Budage, Manchester City yari yasuye Borussia Moenchengladbach isabwa kuyitsinda cyangwa kunganya kugira ngo ihite ibona itike ya 1/8 bidasubirwaho.

Mu gihe habura umunsi umwe ngo imikino yo mu matsinda irangire, Manchester City yatakaje icyizere cyose kuko FC Barcelona iyiri imbere iyirusha amanota ane, bivuze ko izahura n’imwe mu makipe azaba yabaye aya mbere mu yandi matsinda.

Moenchengladbach niyo yafunguye amazamu ku munota wa 23, itsindiwe na Raffael ariko mbere yo kujya kuruhuka, David Silva ku mupira yahawe na Kevin de Bruyne yishyura icyo gitego.

Mu gice cya kabiri nta gitego cyongeye kugaragara ahubwo amakarita abiri y’imituku ku mpande zombi niyo yakiranze, Lars Stindl wa Moenchengladbach niwe wabanje kuyihabwa ku munota wa 51 ku ikosa yari akoreye Nicolas Otamendi ariko ku wa 63 Fernandinho nawe ahabwa ikarita y’umuhondo ya kabiri yabyaye umutuku, nyuma y’ikosa yakoreye Raffael nawe asohorwa mu kibuga.

Bayern Munich itozwa na Carlo Ancelotti, yari yasuye FC Rostov inahabwa amahirwe menshi yo kuyitsindira ku kibuga cyayo. Byaje kuyihira ifungura amazamu ku munota wa 35 ku gitego cya Douglas Costa ariko mbere yo kujya kuruhuka Serdar Azmoun yahise acyishyura.

Mu gice cya kabiri, Bayern yahise itsindwa icya kabiri na Dmitry Poloz, ariko nayo kiza kucyishyurwa na myugariro Juan Bernat, gusa ku munota wa 69 Christian Noboa wa Rostov, yatsinze icya gatatu umukino urangira iyi kipe y’ubukombe mu Budage itakaje amanota atatu itsinzwe ibitego 3-2.

Amakipe amaze kubona itike ya 1/8 bidasubirwaho ni Arsenal, Paris Saint Germain, Manchester City, FC Barcelona, Atletico Madrid, Bayern Munich, Monaco, Borussia Dortmund, Real Madrid, Leicester City, Juventus na Sevilla.

Indi mikino yose yabaye

Arsenal 1-1 Paris Saint Germain
Ludogorets Razgrad 0-0 FC Basel
Besiktas 3-3 Benfica
SSC Napoli 0-0 Dynamo Kyiv
Borussia Moenchengladbach 1-1 Manchester City
Celtic 0-2 Barcelona
FC Rostov 3-2 Bayern Munich
Atletico Madrid 2-1 PSV Eindhoven

Cavani (wambaye 9) yafunguye amazamu hakiri kare atsindira PSG igitego cya mbere
Sanchez (wambaye umutuku) ni we wakoreweho ikosa ryabyaye penaliti yafashije Arsenal kwishyura igitego yari yatsinzwe
Uyu mukino waranzwe no gushyamirana ku bakinnyi
Olivier Giroud yafashije Arsenal kwishyura igitego yari yatsinzwe na Cavani
Veratti (wambaye 6) nawe yitsinze afasha Arsenal gutsinda igitego cya kabiri
Iwobi (wambaye 17) yitsinze igitego gituma Paris Saint Germain ibona inota rimwe
Igitego cyo kwishyura cya PSG cyaturutse kuri Lucas Moura mbere y'uko Iwobi acyitsinda
Raffael niwe wafunguye amazamu muri uyu mukino atsindira Borussia Moenchengladbach
David Silva(ibumoso) yafashije Manchester City gukura inota rimwe mu Budage
Fernandinho(wicaye) yahawe ikarita itukura nyuma yo gukora ikosa ryamuhesheje umuhondo wa kabiri
Messi nawe yafashije Barcelona kugura amanota atatu muri Écosse
Suarez yongeye kugira amahirwe yo guhura na Brendan Rodgers wamutoje muri Liverpool

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved