Champions League: Man United iri mu bihe bibi yatomboye PSG, Klopp asubira imbere ya Bayern Munich

Yanditswe na Ngabo Roben
Kuya 17 Ukuboza 2018 saa 02:52
Yasuwe :
0 0

Nyuma yo kubabazwa na mukeba Liverpool, Manchester United yatomboye Paris Saint-Germain yo mu Bufaransa muri 1/8 cya UEFA Champions League, naho Jürgen Klopp utoza Liverpool we yatomboye guhangana na Bayern Munich y’iwabo mu Budage.

Kuri iki Cyumweru tariki 16 Ukuboza 2018 nibwo abakunzi ba Machester United baraye nabi kubera gutsindwa na mukeba wa kera Liverpool mu mukino w’umunsi wa 17 wa shampiyona y’u Bwongereza, ibitego 3-1 byatsinzwe na Sadio Mané na Xherdan Shaqiri watsinze ibitego bibiri.

Iyi nkuru mbi kuri Manchester United y’umutoza José Félix Mourinho yiyongereyeho tombola ya UEFA Champions League aho basoreje ku mwanya wa kabiri mu itsinda ‘H’ none muri 1/8 batomboye guhangana n’imwe mu makipe ahabwa amahirwe yo kwegukana iki gikombe.

Ku gicamunsi cyo kuri uyu wa Mbere nibwo hatangajwe uko amakipe 16 asigaye muri iki gikombe gihuza amakipe yabaye aya mbere iwayo azahura muri 1/8 nyuma ya tombola yabereye ku cyicaro cya UEFA i Nyon mu Busuwisi.

Iyi tombola yasize amakipe atatu yo mu Bwongereza atomboye ayo mu Budage; aho Manchester City izahangana na Schalke 04, Tottenham ihure na Borussia Dortmund naho Liverpool y’Umutoza Jürgen Klopp izahangane na Bayern Munich.

Uyu mutoza yaherukaga guhangana nayo muri Champions League ya 2013 ubwo yatsindirwaga ku mukino wa nyuma atoza Borussia Dortmund.
Umukino witezwe na benshi ni uwa Manchester United yatomboye PSG ya Neymar da Silva Santos Júnior na Kylian Mbappé Lottin.

Muri shampiyona y’u Bwongereza, Manchester United iri ku mwanya wa gatandatu irushwa amanota 19 na Liverpool iyoboye urutonde. Imaze gukina imikino 17 ariko nta gitego na kimwe izigamye kuko ibitego yinjije 29 bingana n’ibyo yinjijwe.

Irasabwa guhangana na Paris Saint-Germain yo idahagarikwa iwabo mu Bufaransa kuko iyoboye urutonde n’amanota 44 ku munsi wa 16 wa shampiyona irusha Lille iyikurikiye amanota 10 yose.

Imikino ibanza ya 1/8 iteganyijwe tariki 12 Gashyantare 2019, amakipe arwanira itike yo kugera ku mukino wa nyuma uzabera kuri Stade Wanda Metropolitano ya Atletico Madrid muri Espagne, tariki 1 Kamena 2019.

Uko amakipe yose yatomboranye muri 1/8 cya Champions League

- Schalke vs Manchester City
- Atletico Madrid vs Juventus
- Manchester United vs PSG
- Tottenham Hotspur vs Borussia Dortmund
- Lyon vs Barcelona
- Roma vs Porto
- Ajax vs Real Madrid
- Liverpool vs Bayern Munich

Mourinho utari mu bihe byiza yatomboye guhangana n'imwe mu makipe ahabwa amahirwe ku gikombe
Jürgen Klopp utoza Liverpool agiye kongera guhangana na Bayern Munich yamutsinze ku mukino wa nyuma wa Champions League
Ubwo Manchester United yaherukaga guhura na PSG yatsinzwe 2-0 muri Pre-Season ya 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza