Champions League: Paris Saint Germain yahawe isomo, Kylian Mbappé akora amateka yananiye Messi

Yanditswe na Manzi Rema Jules
Kuya 6 Ukuboza 2017 saa 08:40
Yasuwe :
0 0

Mu mikino ya nyuma y’amatsinda mu irushanwa rihuza amakipe yabaye aya mbere iwayo i Burayi yaraye ibaye kuri uyu wa Kabiri, Paris Saint Germain yahawe isomo na Bayern Munich itsindwa umukino wa mbere ariko rutahizamu Kylian Mbappé yandikisha amateka mashya atarakozwe n’ibihangange nka Messi.

Ku mugoroba wo kuri uyu wa Kabiri hakinnye amakipe ari mu matsinda kuva kuri A kugera kuri D naho amakipe yo mu matsinda kuva kuri E kugera kuri H yo agomba kwisobanura kuri uyu Gatatu.

Mu mikino yabaye, ku nshuro ya mbere kuva Champions League y’uyu mwaka yatangira, PSG yatsinzwe umukino inyagiwe na Bayern Munich ibitego 3-1.

Ni ibitego byatsinzwe na Robert Lewandowski ku munota wa munani w’umukino, Corentin Tolisso ashyiramo icya kabiri kuwa 37 n’icya gatatu kuwa 69 mu gihe icya PSG kimwe cyatsinzwe na Kylian Mbappé ku munota wa 50.

Uyu rutahizamu wigaragaje cyane umwaka ushize ari kumwe na Monaco bigatuma PSG imutangaho akayabo, igitego yatsinze cyatumye ahita yandika amateka yo kuba umukinnyi wa mbere ubashize gutsinda ibitego byinshi muri Champions League akiri muto.

Ku myaka 18, amezi 11 n’iminsi 15 amaze avutse, igitego yatsinze cyari icya 10 atsinze muri iri rushanwa undi wari warabitsinze ari muto akaba ari Karim Benzema wabikoze afite imyaka 20 amezi 10 ubwo yakiniraga Lyon, Saviola wahoze muri FC Barcelona wabikoze afite imyaka 21 n’amezi atatu naho Messi akaba yarabitsinze afite imyaka 21, amezi atatu n’iminsi irindwi.

Muri iri tsinda, hazamutse PSG ya mbere n’amanota 15 iri kumwe na Bayern Munich ya kabiri nayo ifite 15, Celtic ifite amanota atatu ijya muri Europa League naho Anderlecht irasezererwa.

Mu itsinda A, Manchester United yaraye itsinze CSKA Moscow ibitego 2-1 izamuka ari iya mbere n’amanota 15 ikurikiwe na FC Basel ifite 12, CSKA Moscow ifite icyenda ijya muri Europa League naho Benifica irataha.

Mu itsinda C, Chelsea yaraye inganyije igitego igitego kimwe kuri kimwe na Atletico Madrid izamuka ifite amanota 11 ariko ibura umwanya wa mbere wafashwe na AS Roma, Atletico Madrid ijya muri Europa League n’amanota arindwi naho Qarabag FK irasezererwa.

FC Barcelona yazamutse ari iya mbere mu itsinda D n’amanota 14 nyuma y’uko itsinze Sporting CP ibitego bibiri ku busa mu mukino wa nyuma, ikurikirwa na Juventus ifite amanota 11, Sporting CP ijya muri Europa League naho Olympiacos irasezererwa.

Imikino iteganyijwe uyu munsi

-  Liverpool vs Spartak Moscow
-  Maribor vs Sevilla
-  Feyenoord vs SSC Napoli
-  Shakhtar Donetsk vs Manchester City
-  FC Porto vs Monaco
-  RasenBallsport Leipzig vs Besiktas
-  Real Madrid vs Borussia Dortmund
-  Tottenham Hotspur vs APOEL Nicosia

Corentin Tolisso yishimira kimwe mu bitego bibiri yatsinze PSG
Lewandowski niwe wafunguye amazamu muri uyu mukino
Kylian Mbappé yaciye agahigo ko gutsinda ibitego byinshi muri iri rushanwa akiri muto
Neymar yahushije kimwe mu bitego byari byabazwe
Ntiyabashije kwiyumvisha uburyo umupira utagiye mu rushundura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza