Kwamamaza

Champions League: Real Madrid yarokokeye ku mahirwe, Leicester City yandika amateka mashya

Yanditswe kuya 23-11-2016 saa 10:05' na Manzi Rema Jules


Mu mikino ihuza amakipe yabaye aya mbere iwayo ku mugabane w’u Burayi, Real Madrid yarokowe na Karim Benzema mu minota ya nyuma, mu mukino wayihuzaga na Sporting CP, naho Leicester City yo ikomeza intego yayo yo kudatsindwa muri iri rushanwa yitabiriye ku nshuro ya mbere ihita inabona itike yo kujya mu cyiciro gikurikiyeho.

Real Madrid irimo kurwanira kuyobora itsinda na Borussia Dortmund, yari yasuye Sporting CP muri Portugal mu mukino utari wohoshye, wagaragayemo ishyaka ku ruhande rwa Cristiano Ronaldo wari wasubiye ku kibuga Estadio Jose Alvalade yakuriyeho mbere yo kwerekeza muri Manchester United.

Nubwo uyu rutahizamu wa Real Madrid na Portugal nta gitego yatsinze muri uwo mukino, yagize uruhare mu gitego cya mbere cyatsinzwe Raphael Varane ku munota wa 29 w’umukino, amuha umupira wakivuyemo.

Igice cya mbere cyarangiye ari 1-0. Mu gice cya kabiri, Sporting CP yari iri gushaka kwishyura igitego yatsinzwe, yaje kubona ikarita itukura yahawe Joao Pereira ku munota wa 64.

Nubwo yari isigaye ifite abakinnyi 10 gusa, ku makosa y’ubwugarizi bwa Real Madrid, Adrien Silva yaje kubona igitego cyo kwishyura ku munota wa 80 cyashyize Zidane n’abasore be ku gitutu cyo kuba batakaza amanota yo kuri uwo mukino, kugeza ku munota wa 87 ubwo Karim Benzema wari winjiye mu kibuga asimbuye, yabonaga igitego cya kabiri cyahesheje iyi kipe ifite igikombe cy’iri rushanwa giheruka amanota atatu.

Mu Bwongereza, uko Leicester City yatunguranye umwaka ushize yegukana igikombe cya shampiyona ntawayihaga amahirwe, ni nako ikomeje kubikora muri Champions League ku nshuro ya mbere iyitabiriye, kuko yakoze amateka yo kubona itike ya 1/8 bwa mbere mu mateka yayo ndetse inabigeraho itaratsindwa na rimwe cyangwa ngo inganye.

Nubwo muri shampiyona idahagaze neza, iyi kipe itozwa na Claudio Ranieri, ni nayo yari isigaye itarinjizwa igitego, agahigo kakuweho na Jose Izquierdo wa Club Brugge watsinze igitego kimwe cyazaga gisanga bibiri bya Leicester City byari byatsinzwe na Shinji Okazaki na Riyad Mahrez.

Ibirori bidasanzwe byari ku kibuga Signal Iduna Park cya Borussia Dortmund yo mu Budage, yari yakiriye Legia Warszawa yo muri Pologne.

Uyu mukino wabonetsemo ibitego byinshi kuko mu minota 45 y’igice cya mbere wari umaze kugaragaramo ibitego birindwi harimo bitanu bya Dortmund.

Mu gice cya kabiri amakipe yombi yakomeje gusatirana bikomeye ndetse umukino urangira Dortmund itsinze ibitego 8-4, harimo bibiri bya Shinji Kagawa wahoze ukinira Manchester United na bitatu bya Marco Reus.

Uko imikino yose yo ku wa Kabiri yarangiye:

CSKA Moscow 1 - 1 Bayer Leverkusen

Monaco 2 - 1 Tottenham Hotspur

Borussia Dortmund 8 – 4 Legia Warszawa

Sporting CP 1 - 2 Real Madrid

FC Koebenhavn 0 - 0 FC Porto

Leicester City 2 - 1 Club Brugge

Dinamo Zagreb 0 - 1 Lyon

Sevilla 1 - 3 Juventus

Imikino iteganyijwe kuri uyu wa Gatatu

Arsenal vs Paris Saint Germain

Ludogorets Razgrad vs Basel

Besiktas vs Benfica

SSC Napoli vs Dynamo Kyiv

Borussia Moenchengladbach vs Manchester City

Celtic vs Barcelona

FC Rostov vs Bayern Munich

Atletico Madrid vs PSV Eindhoven

Raphael Varane (ibumoso) niwe watsinze igitego cya mbere cya Real Madrid
Sporting CP yishyuye igitego yari yatsinzwe bishyira igitutu ku bakinnyi ba Real Madrid
Gareth Bale yavunikiye muri uyu mukino
Cristiano Ronaldo wari wasubiye ku kibuga yakuriyeho nta gitego yabonye muri uwo mukino
Zinedine Zidane utoza Real Madrid yari yagize ubwoba ko ikipe ye igiye gutakaza amanota nyuma yo kwishyurwa igitego
Kalim Benzema niwe warokoye Real Madrid mu minota ya nyuma ayitsindira igitego cy'intsinzi
Shinji Okazaki niwe watsindiye Leicester City igitego cya mbere
Riyad Mahrez niwe washimangiye intsinzi ya Leicester City ihita inabona itike ya 1/8
Dortmund yatsinze itababariye Legia Warszawa ibitego umunani
Marco Reus yatsinze ibitego bitatu muri uyu mukino
Monaco yo mu Bufaransa yatsinze Tottenham ibitego 2-1
Nyuma yo gutsindwa, Tottenham yahise isezererwa ikazahita ijya muri Europa League

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved