Champions League: Tottenham yatitije Real Madrid, Liverpool na Manchester City zishimisha abafana

Yanditswe na Manzi Rema Jules
Kuya 18 Ukwakira 2017 saa 07:50
Yasuwe :
0 0

Mu mikino ihuza amakipe yabaye aya mbere iwayo ku mugabane w’u Burayi, Tottenham Hotspur yo mu Bwongereza yaraye isuye Real Madrid kuri uyu wa Kabiri ihakura inota rimwe; Liverpool inyagira Maribor ibitego birindwi ku busa mu gihe Manchester City yakuye amanota atatu kuri Napoli bigoranye.

Iyi mikino yakinwaga ku munsi wa gatatu wo mu matsinda kuva kurya E kugera kuri H. Umukino w’ishiraniro wari utegerejwe na benshi wagombaga guhuza Real Madrid ifite ibikombe bibiri bya UEFA Champions League biheruka, mu rugo i Santiago Bernabeu yakiriye Tottenham, imwe mu makipe akomeje kwigaragaza nubwo itarabasha kwegukana ibikombe.

By’umwihariko amaso menshi yari kuri rutahizamu Harry Kane bimaze iminsi bivugwa ko umwaka utaha ashobora kwerekeza muri Real Madrid. Nubwo nta gitego yabashije gutsinda, uyu mukinnyi yigaragaje azonga ubwugarizi bwa Madrid ndetse iyo bitaba ku buhanga bw’umunyezamu, Keylor Navas, yari gufungura amazamu mu munota 20 ya mbere.

Amakipe yombi yagabanye amanota nyuma yo kunganya igitego kimwe ku kindi. Tottenham niyo yafunguye amazamu kare ku munota wa 28 ku gitego cyitsinzwe na myugariro Raphael Varane ku kazi gakomeye ka Harry Kane na Serge Aurier.

Cyaje kwishyurwa kuri penaliti na Cristiano Ronaldo mbere y’iminota ibiri ngo amakipe yombi ajye kuruhuka nyuma y’uko Aurier yateze Toni Kroos mu rubuga rw’amahina.

Mu gice cya kabiri amakipe yombi yakomeje gusatirana ntiyabasha kubona ibindi bitego. Ni umukino wari uryoheye ijisho ahanini kubera uburyo abatoza bakina umukino ufunguye w’imipira yihuta cyane.

Mu wundi mukino wari ukomeye cyane, Manchester City y’umutoza Pep Guardiola iyoboye urutonde rwa Shampiyona mu Bwongereza, yari yakiriye Napoli nayo iyoboye urutonde mu Butaliyani.

Mu munota 15 gusa Manchester City yari imaze gutsinda ibitego ku busa bya Raheem Sterling ku munota wa cyenda na Gabriel Jesus kuwa 13 ariko Napoli nayo yigaragaje cyane ibona penaliti ku munota wa 38 itewe na Dries Mertens umuyezamu Ederson Moraes ayikuramo gusa iyi kipe yasatiraga bikomeye yaje kubona indi penaliti mu gice cya kabiri noneho Amadou Diawara ayitera neza arayinjiza umukino urangira ari ibitego 2-1.

Liverpool yo yatanze isomo kuri Maribor iyitsinda ibitego birindwi ku busa iyisanze iwayo harimo bibiri bya Roberto Firmino, bibiri bya Mohamed Salah ibindi bitsindwa na Philippe Coutinho, Alex Oxlade-Chamberlain na Trent Alexander-Arnold.

Kuri uyu wa Gatatu harakinwa imikino yo kuva mu itsinda A kugera kuri D aho imikino ikomeye irimo uza guhuza Benfica na Manchester United, Barcelona na Olympiacos kimwe na Chelsea iraba yakiriye AS Roma.

Imikino yabaye kuri uyu wa Kabiri n’uko yarangiye:

-  Maribor 0 - 7 Liverpool

-  Spartak Moscow 5 - 1 Sevilla

-  Feyenoord 1 - 2 Shakhtar Donetsk

-  Manchester City 2 - 1 SSC Napoli

-  Monaco 1 - 2 Besiktas

-  RasenBallsport Leipzig 3 - 2 FC Porto

-  APOEL Nicosia 1 - 1 Borussia Dortmund

-  Real Madrid 1 - 1 Tottenham Hotspur

Imikino itegerejwe kuri uyu wa Gatatu

-  Benfica vs Manchester United

-  CSKA Moscow vs Basel

-  Anderlecht vs Paris Saint Germain

-  Bayern Munich vs Celtic

-  Qarabag FK vs Atletico Madrid

-  Chelsea vs Roma

-  FC Barcelona vs Olympiacos

-  Juventus vs Sporting CP

Harry Kane yokeje igitutu Varane kugeza yitsinze
Abakinnyi ba Tottenham bishimira igitego cyari kimaze kwitsindwa na Varane
Cristiano Ronaldo niwe wishyuye igitego kuri Penaliti
Yishimira igitego yari amaze gutsinda
Harry Kane yarase igitego cyari cyabazwe
Benzema yateye umutwe umuzamu Hugo Lloris awukuzamo ikirenge
Sterling yishimira igitego cya mbere cya Manchester City
Gabriel Jesus yaboneye City icya kabiri
Umuzamu wa Manchester City yakuyemo Penaliti ya Dries Mertens
Amadou Diawara niwe watsindiye Napoli igitego kuri Penaliti
Abakinnyi ba Liverpool bishimira intsinzi y'ibitego birindwi
Roberto Firmino yatsinze ibitego bibiri
Alex Oxlade-Chamberlain yatsinze igitego cya mbere kuva yagera muri Liverpool

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza