Chelsea FC yegukanye igikombe cya Shampiyona y’u Bwongereza (Amafoto)

Yanditswe na IGIHE
Kuya 13 Gicurasi 2017 saa 09:12
Yasuwe :
1 0

Chelsea FC yatsinze West Bromwich Albion F.C igitego kimwe ku busa mu mukino wabereye ku Kibuga cya The Hawthorns, ku mugoroba wo kuri uyu wa Gatanu, tariki ya 12 Gicurasi 2017, ihita yegukana igikombe cya shampiyona y’u Bwongereza ya 2016/2017.

Ni umukino w’umunsi wa 36 muri iyi shampiyona ibura iminsi ibiri ngo isozwe. Chelsea FC yashinzwe mu 1905 yanditse amateka mashya yegukana igikombe cya gatandatu muri Shampiyona.

Igitego rukumbi cyatsinzwe n’Umubiligi Michy Batshuayi ku munota wa 82 w’umukino nicyo cyashimangiye bidasubirwaho ko iyi kipe yo mu Majyepfo y’u Bwongereza ariyo yegukanye igikombe.

Chelsea FC ifite amanota 87 yamaze gushyira ikinyuranyo hagati yayo na Tottenham Hotspur F.C iyikurikiye ifite 77, aho iyirusha agera ku icumi mu gihe isigaje imikino itatu.

Chelsea isigaje gukina na Watford ndetse na Sunderland ku mukino uzabera i Stamford Bridge kuya 21 Gicurasi ari nawo munsi bazashyikirizwa igikombe.

Umutaliyani utoza Chelsea, Antonio Conte n’abakinnyi b’iyi kipe baraye mu byishimo bihambaye nyuma yo kwitwara neza kuri uyu mukino wabahaye igikombe.

Umutoza Antonio Conte abaye Umutaliyani wa kane utwaye Shampiyona y’u Bwongereza nyuma ya Carlo Ancelotti, Roberto Mancini na Claudio Ranieri.

Ni nawe mutoza wa kane utwaye igikombe mu mwaka wa mbere ageze muri iyi shampiyonja, amateka yari afitwe na Jose Mourinho na Carlo Ancelotti babikoreye i Stamford Bridge ndetse na Manuel Pellegrini wagitwaranye na Manchester City.

Iyi kipe y’Umuherwe Roman Abramovich, yegukanye shampiyona y’Abongereza ku nshuro ya gatandatu harimo iyo mu 1954–55; 2004–05; 2005–06; 2009–10; 2014–15 na 2016–17.

Chelsea niyo kipe ya mbere itwaye igikombe kuwa Gatanu, amateka yaherukaga gukorwa na Arsenal mu 1989 i Anfield.

Amafoto agaragaza uko abakinnyi ba Chelsea FC bishimiye igikombe baherukaga mu 2014:

Byari ibyishimo ku bakinnyi ba Chelsea ubwo bageraga mu rwambariro nyuma y'umukino
Abakinnyi ba Chelsea bishimiye intsinzi baryamye hasi mu kibuga
Thibaut Courtois (hagati) agiye kuryama hagati ya Willian na Eden Hazard (iburyo bwe), mu gihe Marcos Alonso (ibumoso) yarambaraye hasi
Antonio Conte ashimira abafana ba Chelsea nyuma y'umukino
Antonio Conte yishimiwe bikomeye n'abakinnyi bamujugunya mu kirere
Abafaransa Kurt Zouma na N'Golo Kanté bishimira igikombe cya mbere cya shampiyona batwaranye na Chelsea FC
Umuzamu Asmir Begovic n'undi mukozi w'ikipe bategerereje Conte mu rwambariro
Bahita bamumenaho Champagne
Michy Batshuayi watsinze igitego cyahesheje Chelsea FC igikombe
Myugariro wa Chelsea John Terry yishimiye gutwarana n'ikipe ye igikombe cya gatanu muri English Premier League
N'Golo Kante umwe mu bakinnyi bitwaye neza muri shampiyona y'u Bwongereza uyu mwaka
Uhereye ibumoso: Cesar Azpilicueta, Gary Cahill na David Luiz bari bayoboye bagenzi babo mu kwishimira igikombe
Conte bamusutseho Champagne aratota ndetse Diego Costa ayimunywesha ku ngufu
Costa, David Luiz, Eden Hazard na Willian bishimira intsinzi
Eden Hazard na Pedro bari basazwe n'ibyishimo
John Terry ateruwe na bagenzi be
Nyuma yo kuva muri FC Barcelona, Pedro yatwaye igikombe cya Shampiyona ari kumwe na Chelsea
Rutahizamu Diego Costa yishimira intsinzi, aha yari akikijwe na John Terry, Willian na Azpilicueta
The Blues niyo yegukanye igikombe cya shampiyona nyuma yo gutsinda West Brom 1-0
Severino da Silva ubyara Willian yarebye umukino, anishimira kubona umwana we atwara igikombe cya kabiri muri Chelsea
Umuzamu wa Chelsea Thibaut Courtois na Cesc Fabregas bifata selfie
Frank Lampard yishimiye ko ikipe yahozemo yatwaye igikombe cya shampiyona
Conte yasangiye icyo kunywa n'Umutoza wa West Brom Tony Pulis (uwa kabiri uturutse iburyo) n'Umunyamakuru wa Sky Sports, Geoff Shreeves

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza