Cristiano Ronaldo yaguzwe na Juventus kuri miliyoni £88

Yanditswe na Ishimwe Israel
Kuya 10 Nyakanga 2018 saa 07:02
Yasuwe :
0 0

Cristiano Ronaldo wari umaze imyaka icyenda muri Real Madrid yerekeje muri Juventus yo mu Butaliyani aho ashobora kuba umukinnyi wa kane uhenze mu mateka ya ruhago nyuma yo gutangwaho miliyoni 88 z’ama-pound.

Ronaldo yahuye na Perezida wa Juventus, Andrea Agnelli, ku mugoroba wo kuri uyu wa Kabiri muri hoteli yo mu Bugereki, aho ari mu biruhuko n’umukunzi we n’umuryango we.

Rutahizamu wa Portugal, Ronaldo bitaratangazwa imyaka azakinira iyi kipe yo mu Butaliyani biravugwa ko azajya ahembwa ibihumbi 500 by’ama-pound ku cyumweru.

Uyu mugabo w’imyaka 33 yatwaranye n’iyi Kipe y’Ibwami ibikombe birimo bine bya Champions League mu myaka itanu ishize na bibiri bya Shampiyona ya Espagne “La Liga”.

Mu butumwa bwe Cristiano yashimiye Real Madrid yamuhaye ibyishimo by’ikirenga mu buzima avuga ko igihe cyo kugenda cyari kigeze.

Yagize ati “Igihe kirageze ngo ntangire ikindi cyerekezo cy’ubuzima, niyo mpamvu nasabye ikipe kunyemerera nkagenda.”

Real Madrid ibinyujije ku rukuta rwayo rwa Twitter yanditse ko kuri yo Cristiano Ronaldo azahora ari umukinnyi wayo ukomeye.

Iri tangazo rigira riti “Real Madrid irashaka gushimira umukinnyi wagaragaje ko ari uwa mbere ku Isi ndetse yanditse amateka mu ikipe no mu mupira w’amaguru. Muri Real Madrid hazahora ari mu rugo.”

Ronaldo yageze muri Real Madrid avuye muri Manchester United muri Nyakanga 2009, icyo gihe yaguzwe miliyoni 80 z’ama-pound.

Cristiano asohotse muri iyi kipe nyuma y’uko uwari umutoza wayo Zinedine Zidane batwaranye ibikombe bitatu bya Champions League asezeye, agahita asimbuzwa Julen Lopetegui.

Mu bakinnyi banuganuzwe mu bashobora kumusimbura barimo Neymar ukinira Paris St Germain yo mu Bufaransa. Uyu Munya-Brazil w’imyaka 26 yanyuze muri Barcelona ahamara imyaka ine, mbere yo kugurwa miliyoni 200 z’ama-pound.

Real Madrid kandi yashatse Kylian Mbappé w’imyaka 19 wanafashije ikipe y’Igihugu y’u Bufaransa kugera mu mikino ya ½ cy’Igikombe cy’Isi kiri kubera mu Burusiya.

Cristiano yakiniye Real Madrid imikino 438, atsinda ibitego 450; mu 2013-14, yatsinze ibitego byinshi (17) nk’umukinnyi muri Champions League; atsinda 105 muri Champions League na 311 muri La Liga. Yatsinze hat-trick 44 harimo agahigo yaciye muri La Liga ko kubona 34.Yatsinze ibitego 61 mu marushanwa yose harimo 48 muri La Liga mu 2014-15.

Yatwaranye n’iyi kipe ibikombe 16 birimo bibiri bya Shampiyona ya Espagne “La Liga” mu 2011-12 na 2016-17; bine bya Champions League; bibiri bya Super Coupe ya Espagne na bitatu bya Super Coupe y’u Burayi n’ibindi bitatu bihuza amakipe y’ama-club yabaye aya mbere iwayo.

Cristiano yatwaye Ballon d’Or enye ari kumwe na Real Madrid, ziyongera ku yo yahawe mu 2008 akinira Manchester United.

Ronaldo aheruka kwegukana ibikombe bitatu byikurikiranya bya Champions League
Ronaldo ari mu kiruhuko mu Bugereki
Cristiano Ronaldo yaguzwe na Juventus yo mu Butaliyani kuri miliyoni 88 z'ama-pound
Cristiano Ronaldo yashimiye Real Madrid mu rugendo rw'imyaka icyenda bamaranye
Perezida wa Juventus Andrea Agnelli (ibumoso) yahuye na Ronaldo ku mugoroba wo kuri uyu wa Kabiri baganira ku kunoza amasezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza