Ferwacy yashyikirijwe imodoka yemerewe na Perezida Kagame

Yanditswe na Manzi Rema Jules
Kuya 16 Werurwe 2017 saa 06:20
Yasuwe :
0 0

Ishyirahamwe ry’Umukino w’Amagare mu Rwanda, Ferwacy ryashyikirijwe imodoka yo mu bwoko bwa Toyota Land Cruiser ryemerewe na Perezida Kagame mu 2014, ubwo yakiraga abakinnyi bari bamaze kwegukana Tour du Rwanda ku nshuro ya mbere.

Hari mu muhango wabaye kuri uyu wa Kane tariki 17 Werurwe 2017, ku cyicaro cya Minisiteri y’Umuco na Siporo i Remera.

Minisitiri muri Perezidansi, Tugireyezu Venantie yavuze ko iyi modoka ije isanga ubundi bufasha Perezida Kagame adahwema gutera ibikorwa bya siporo kandi ko no ku bandi bazakora neza imiryango ifunguye.

Yagize ati “ Perezida wa Repubulika yantumye kubashimira uburyo mukomeje kwitanga mu marushanwa mwitabira. Intsinzi muzana ntabwo ari iyanyu gusa ni iy’igihugu kandi biragaragara mugihesha ishema muri rusange.”

“Mu muhango uheruka ubwo mwari mwegukanye ishema nk’uko mumaze kubigira umuhigo wanyu, mwatwaye Tour du Rwanda; Perezida wa Repubulika yabemereye ibikoresho bitandukanye kugira ngo murusheho kunoza umurimo wanyu.”

Minisitiri Tugireyezu yakomeje agira ati “Yabemereye amagare, ikigo cy’imyitozo cy’i Musanze n’ibindi bitandukanye birebana n’imibereho ndetse n’imodoka. Nk’uko rero imvugo ye ari yo ngiro ibindi bikoresho byose yabemereye mwarabibonye ndetse ibyinshi muranabikoresha. Inkunga yari isigaye ni imodoka ari na yo uyu munsi yadutumye kubashyikiriza.”

Minisitiri wa Siporo n’Umuco, Uwacu Julienne yashimiye Umukuru w’Igihugu ku nkunga adahwema gutera imikino, asaba abayobozi b’Ishyirahamwe ry’Umukino w’amagare n’abakinnyi, gukoresha neza amahirwe bafite bakarushaho kwitwara neza mu marushanwa bitabira no gushakira igihugu imidari.

Yagize ati “Turashimira Perezida ku nkunga adahwema gutera imikino. Nk’umuryango mugari w’amagare turabizi ko ibyo tugeraho byose ari ukubera we. Nubwo hakiri intambwe tugomba gutera, tugomba kwishimira ko Perezida wa Repubulika aduha agaciro atari mu magare gusa ahubwo no mu yindi mikino.”

Umuyobozi w’Ishyirahamwe ry’Umukino w’amagare, Bayingana Aimable, yagarutse no ku yindi nkunga y’ikigo cy’imyitozo cya Musanze Ferwacy igiye kwegukana na yo bemerewe na Perezida Kagame, kuri ubu bikaba byenda kurangira, avuga ko bizabafasha kugabanya amafaranga batangaga bahakodesha agakoreshwa mu kuzamura umukino mu zindi nzego.

Umukino w’amagare umaze gutera imbere mu gihugu ndetse abakinnyi b’Abanyarwanda bakaba ari bo begukanye Tour du Rwanda eshatu ziheruka ndetse no mu marushanwa mpuzamahanga bakaba bitwara neza.

Imodoka yo mu bwoko bwa Toyota Land Cruiser, Ferwacy yahawe na Perezida Kagame
Perezida w'Ishyirahamwe ry'Umukino w'Amagare mu Rwanda, Bayingana Aimable
Minisitiri muri Perezidansi, Venantie Tugireyezu ni we washyikirije Ferwacy iyi modoka
Minisitiri wa Siporo n'Umuco Uwacu Julienne na Minisitiri muri Perezidansi, Tugireyezu Venantie
Minisitiri wa Siporo n'Umuco, Uwacu Julienne yashimye Umukuru w'Igihugu ku nkunga adahwema gutera ibikorwa bya siporo
Minisitiri muri Perezidansi, Tugireyezu Venantie yashimiye abayobozi ba Ferwacy uburyo bitanga ariko abasaba gukomeza gukora cyane
Perezida wa Ferwacy, Bayingana Aimable ashyikirizwa imfunguzo z'imodoka na Minisitiri muri Perezidansi, Tugireyezu Venantie
Abafatanyabikorwa batandukanye ba Ferwacy bari bitabiriye uyu muhango
Amb. Munyabagisha Valens(ibumoso) uherutse gutorerwa kuyobora komite olempike, Umunyamabanga Uhoraho muri Minispoc Lt Col Patrice Rugambwa na Visi Perezida muri Komite olempike, Bizimana Festus
Areruya Joseph(iburyo), uherutse kwegukana imidari itatu muri shampiyona ya Afurika yo gusiganwa ku magare na we yari ahari
Abakinnyi b'umukino w'amagare mu makipe atandukanye na bo bari bitabiriye umuhango wo kwakira imodoka
Abakinnyi batandukanye bari baje kwakira imodoka bayifatiyeho ifoto y'urwibutso n'abayobozi bakuru

Amafoto: Manzi Rema Jules


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza