Ferwafa ntiyishimiye isezera rya Pepiniere, irifuza ko abakinnyi bakinira aheza-Mugabe

Yanditswe na Jean de Dieu Dukuze
Kuya 28 Ukuboza 2016 saa 08:30
Yasuwe : XX
0

Ishyirahamwe ry’umupira w’amaguru mu Rwanda, Ferwafa, ryahakanye ryivuye inyuma uruhare rwaryo mu kuba Pépinière yasezera mu cyiciro cya mbere, ritangaza ko guhagarika ikibuga cy’iyi kipe byakurikije amategeko gusa kikaba gishobora gukomorerwa ubwo kizaba gisuwe kuri uyu wa Kane tariki ya 29 Ukuboza.

Ibi Ferwafa ikaba ibitangaje, nyuma y’inkuru yavugaga ko ikipe ya Pépinière FC itazongera gukina mu cyiciro cya mbere mu gihe ikibuga cyayo kitemewe, kandi mpaga yatewe na AS Kigali igakurwaho.

Aganira na IGIHE ariko, ushinzwe itangazamakuru muri Ferwafa, Mugabe Bonnie, yatubwiye byinshi ku ihagarikwa ry’ikibuga cya Pépinière ndetse n’icyo Ferwafa ivuga ku isezera ryayo.

IGIHE: Kuki Ferwafa yanze ikibuga cya Pépinière kandi mbere yari yaracyemeye?

Mugabe: Mbere y’uko shampiyona itangira, Komisiyo yashizweho n’Inteko Rusange Idasanzwe ya Ferwafa yo kuwa 17-18 Nzeri 2016 yasuye icyo kibuga cya Pépinière FC kimwe n’ibindi byose byari kwakira imikino ya shampiyona y’icyiciro cya mbere.

Icyo kibuga baje kucyemeza ko cyakinirwaho imikino ya shampiyona. Ibibuga banze kandi basaba ko bikorwa n’amakipe bireba byari icya Gicumbi, Sunrise (Nyagatare) n’Amagagu (Nyamagabe). Ababikoze ku gihe bashoboye kubikiniraho aribo Sunrise n’Amagaju.

Nyuma y’umukino wa Pépinière na Police, iyi Komisiyo nk’uko isanzwe ikurikirana ibibuga byose, yongeye gusura ikibuga cya Pépinière Fc ibasaba ko bagitunganya ku buryo nibura imvura iguye cyashobora kwakira imikino ya shampiyona nta kindi kibazo kibaye kuko cyari kimaze kwangirika kandi mwese abashoboye gukurikirana umukino wabahuje na Police FC mwarabyiboneye ku cyagoye abakinnyi b’amakipe yombi kugikiniraho.

Kuwa Kane tariki 22 Ukuboza 2016, iyi Komisiyo yongeye gusura ikibuga cya Pépinière FC igiye gusuzuma niba ibyo babasabye gukora barashoboye kubikora ku buryo babemerera kwakira umukino wagombaga kubahuza na AS Kigali ariko basanze bitakozwe nk’uko babibasabye.

IGIHE: Haba hari ibaruwa Ferwafa yandikiye Pépinière FC iyibwira ibyo guhindura ku kibuga kugira ngo kizemerwe?

Mugabe: Tariki 12 Ukuboza 2016, ikipe ya Pépinière Fc yamenyeshejwe mu ibaruwa No: 853/FERWAFA/2016 , ko imikino ya ARPL yabo bakiriraga ku kibuga cya Ruyenzi igiye kwimukira ku ma Stade y’i Kigali, kubera ko ikibuga cyabo cyuzura amazi kikananyerera bikabije mu gihe imvura yaguye ari nyinshi mu gihe FERWAFA itegereje ko iki kibuga gikorwa neza ku buryo kituzura amazi ndetse ntikinanyerere. Bityo umukino wabo wabahuje na APR wahise wimurirwa kuri Stade ya Nyamirambo.

Kuwa 20 Ukuboza 2016, Pépinière Fc yandikiye FERWAFA itumenyesha ko ibyo basabwe na Komisiyo ishinzwe ibibuga babikoze bityo basaba ko umukino wabo na AS Kigali wakinirwa ku Ruyenzi. Kuwa 22 Ukuboza 2016, Komisiyo ishinzwe gusura ibibuga yongeye isura ikibuga cya Ruyenzi kugira ngo irebe neza niba ibyo babasabye babikoze nk’uko bari bamaze kubyandika mu ibaruwa yo kuwa 20 Ukuboza 2016.

Nyuma yaho Komisiyo imaze kubasura, FERWAFA yandikiye Pépinière FC ibamenyesha ko umukino w’umunsi wa 10 wa ARPL uzakinirwa kuri Stade ya Kicukiro tariki 24 Ukuboza 2016 nk’uko biri mu ibaruwa No: 877/FERWAFA/2016 yo kuwa 22/12/2016 yoherejwe kuri email y’umuyobozi wa Pépinière saa 11:56 za mu gitondo.

Pépinière FC yasubije mu ibaruwa yatugezeho tariki 23 Ukuboza 2016 itumenyesha ko batiteguye gukinira ku Kicukiro cyane ko babimenye kuwa 22 Ukuboza 2016 saa 16:45, bityo adusaba ko FERWAFA yamwemerera bagakinira ku Ruyenzi byaba bidashoboka uwo mukino bari bafitanye na AS Kigali ugasubikwa.

FERWAFA yaje gusubiza iyi baruwa ya Pépinière kuwa 23 Ukuboza 2016 mu ibaruwa No: 881/FERWAFA/2016 iyohereza kuri email y’umuyobozi wa Pépinière Fc imumenyesha ko umukino w’umunsi wa 10 uzabahuza na AS Kigali bazawukinira kuri Stade ya Kicukiro nk’uko babimenyeshjwe ku gihe mu ibaruwa No: 877/FERWAFA mu gihe tugitegereje ko ikibuga cyabo basanzwe bakiriraho imikino yabo gitunganywa neza.

Ku birebana no gusubika umukino wabo, impamvu batanze ntabwo zafatikaga ku buryo uwo mukino wasubikwa bityo tubasaba kwitabira uwo mukino kandi tubibutsa ko mu gihe baba batawitabiriye ikipe yabo izaterwa mpaga.

IGIHE: Ubundi nyuma yo guterwa mpaga ni iki kigiye gukurikira kuri Pépinière mu gihe itemerewe kwakirira ku kibuga cyayo ko yo ivuga ko itazongera gukina niba itemerewe?

Mugabe: Nyuma y’uko ikibuga cyabo gisuwe kuwa 22 Ukuboza 2016 na Komisiyo ibishinzwe, Komite Nyobozi ya FERWAFA yemeje ko ibibuga bya Gicumbi FC na Pépinière Fc byongera gusurwa kugira ngo barebere hamwe niba ibyo babasabye birimo gukorwa. Bityo Kuwa 29 Ukuboza 2016 (amakipe bireba yamaze kumenyeshwa urugendo rw’iyi Komisiyo) no kuwa 04-05 Mutarama 2017, ibi bibuga byombi bizasurwa na Komisiyo ibifite mu shingano zabyo hanyuma hafatwe umwanzuro bitewe n’uko bazaba bujuje ibyo babasabye gutunganya kuri ibyo bibuga byombi.

Iyi Komisiyo kandi izongera isure ibibuga byose mu kirihuko cy’igice cya mbere (First Leg) cya shampiyona ya ARPL kugira ngo yongere ibisuzume, ibitameze neza bongere basabe banyirabyo kubitunganya.

Ibyo kuba ivuga ko itazongera gukina niba itemerewe gukinira ku kibuga cyayo, Inteko Rusange idasanzwe yagiye gushyiraho iyi komisiyo abanyamuryango bose bahari kandi bari bafite impamvu ariyo y’uko nibura nubwo tudafite ama stade menshi ariko buri kipe yakora ibishoboka ikagerageza gutunganya cyangwa gushyira mu bikorwa ibyo izaba yasabwe na komisiyo bishiriyeho kugirango shampiyona yacu ikinirwe ku bibuga bimeze neza.

FERWAFA nta nyungu n’imwe ifite mu gihe Pépinière FC yaba itongeye gukina shampiyona, icyo twifuza n’uko abakinnyi bacu barimo kuzamukira muri aya makipe bakinira mu bihe byiza kandi binogeye buri wese kandi imyanzuro yafashwe n’Inteko Rusange tukagerageza kuyibahiriza kugira ngo dukomeze guteza imbere umupira w’amaguru mu Rwanda. Pépinière igerageje gushyira mu bikorwa ibyo isabwa niyo yabyungukiramo kurusha abandi bose.

IGIHE: Ese mpaga ya AS Kigali ishobora gukurwaho?

Mugabe: Mpaga yatanzwe hashingiwe ku matageko agenga amarushanwa ya FERWAFA.

IGIHE: Ferwafa ivuga iki ku bibuga bya Sunrise, Mumena na Kirehe na byo bijya biba bibi ku buryo bitakinirwaho umupira?

Ibyo bibuga kugeza ubu byemewe gukinirwaho nk’uko Komisiyo ibishinzwe yabyemeje kandi byakira imikino ya shampiyona nk’uko biba byateganyijwe. Iyo habaye ikibazo cy’ibiza, nk’uko mu minsi ishize haguye imvura nyishi igahagarika umukino wa Kiyovu na Musanze, umukino wimurirwa mu gihe giteganywa n’amategeko agenga amarushanwa ya FERWAFA.

IGIHE: Ese kuki byasabye gutegereza umukino wa APR ngo ikibuga cya Pépinière FC gihagarikwe?

Ntabwo umwanzuro wafashwe kubera ko umukino wa APR FC wari wegereje ahubwo umwanzuro wafashwe ku gihe nk’uko Komisiyo ibifite mu nshingano kandi isanzwe ikora akazi kayo neza yari yabigennye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza