Ferwafa yahagurukiye amarozi ishyiraho n’ibihano ku bazongera kuyakoresha

Yanditswe na Philbert Girinema
Kuya 22 Ukuboza 2016 saa 10:15
Yasuwe : XX
0

Mu nama idasanzwe yahuje Ferwafa n’abayobozi b’amakipe yo mu cyiciro cya mbere yiga ku kibazo cy’ikoreshwa ry’amarozi n’ibindi bikorwa bitajyanye na ruhago bibera ku bibuga by’umupira w’amaguru, yafatiwemo imyanzuro ikomeye yo guhana ababigaragayemo.

Iyi nama yatumijwe na Nzamwita Vincent de Gaulle uyobora Ferwafa nyuma y’amarozi yavuzwe ku mukino wahuje Rayon Sports na Mukura VS i Huye kuwa Gatanu w’icyumweru gishize.

Nk’uko IGIHE yabitangarijwe n’Umunyamabanga wa Gicumbi FC wari muri iyi nama, Antoine Dukuzumuremyi, yavuze ko bamaze umwanya munini bibaza uko haboneka ibimenyetso by’amarozi basanga bidashoboka ariko bafata umwanzuro ko uzajya agaragara mu bikorwa birangaza abantu ku kibuga bitajyanye na ruhago azajya ahabwa ibihano.

Ati “Ku ikoreshwa ry’amarozi twasanze mu mategeko ya Ferwafa nta kintu kibihana kimwe no mu mategeko y’igihugu nabo ntabwo babihana ariko turavuga tuti nkatwe bo mu mupira hari ibintu bigaragara ku bibuga bitajyanye n’umupira kandi biteza umutekano muke. Hari aho usanga umutoza yanga gusuhuza undi, abakinnyi batanyura mu miryango yabugenewe binjira ku bibuga, abasuka amazi mu mazamu …ibi nibyo twizeho.”

Mu biganiro byamaze umwanya utari muto bareba ingaruka mbi iyi myumvire y’amarozi ifite ku iterambere rya ruhago mu Rwanda aho usigaye usanga byarageze no mu bakinnyi bakinana mu ikipe, umwe yavunika akavuga ngo mugenzi we niwe umuroga, abana bakiri bato bakaba bumva ko ntaho bagera bataroze n’ibindi.

Umutoza uzagaragaraho imyitwarire yavuzwe haruguru FERWAFA izajya imuhanisha kudatoza imikino ine n’amande y’amafaranga y’u Rwanda 200.000.

Umukinnyi bizagaragaraho azajya ahanishwa kudakina imikino itatu n’amande y’amafaranga y’u Rwanda 100.000Frw. Ikipe byagaragayemo inshuro eshatu izajya ikatwa amanota atatu n’amande y’amafaranga y’u Rwanda 500.000.

Ku zindi ngingo bizeho muri iyi nama zirimo ibibuga bya Gicumbi FC na Pepiniere FC byafunzwe bivugwa ko bitujuje ibisabwa ariko nyuma yo gusanga n’ibindi bikinirwaho imikino ya shampiyona harimo ibibi kubirusha, hafashwe umwanzuro ko Ferwafa yohereza intumwa zayo gusura ibi bibuga bakareba niba iby’ibanze amakipe yagombaga kuvugurura byarakozwe bikaba byakongera gukoreshwa.

Iyi nama kandi yanzuye ko abashinzwe gucuruza amatike ku bibuga bagomba kujya bagera ahabereye imikino hakiri kare kugira ngo abafana babashe kwinjira nta muvundo kuko byagaragaye ko bahagera batinze bigateza umutekano muke mu kwinjira.

Umutoza utazajya asuhuza mugenzi we azajya ahanwa
Ku mukino wa Mukura na Rayon Sports niho ikibazo cy'amarozi cyagaragaye cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza