Kwamamaza

Ferwafa yakomoreye Sunrise FC iyemerera gukinira ku kibuga cyayo cy’ibitaka

Yanditswe kuya 14-10-2016 saa 11:49' na Manzi Rema Jules


Nyuma yo kumenyesha Ishyirahamwe ry’Umupira w’Amaguru mu Rwanda, Ferwafa, ko badashobora kuvana ikipe imbere y’abafana bayo, Sunrise FC yakomorewe ku cyemezo yari yafatiwe cyo kwakirira imikino yayo yo mu rugo mu Mujyi wa Kigali, ariko isabwa gukora amavugurura y’ikibuga cyayo byihuse.

Kuwa Gatatu w’iki cyumweru nibwo Akanama kashyizweho na Ferwafa gashinzwe gusuzuma ibibuga katangaje ko icya Gicumbi FC, Amagaju FC na Sunrise FC bihagaritswe kuzakinirwaho uyu mwaka mu gihe nta gikozwe ngo bivugururwe.

Iki cyemezo nticyakiriwe neza n’abayobozi b’aya makipe bavuga ko bakimenyeshejwe mu buryo butunguranye kandi Shampiyona ibura iminsi ibiri ngo itangire.

Umuyobozi wa Sunrise FC, Ndungutse Bosco kuri uyu wa Kane yabwiye IGIHE ko batiteguye gukura ikipe i Nyagatare aho ifite abafana yanashyiriweho kugira ngo ishimishe ngo bayizane mu Mujyi wa Kigali ku Kicukiro aho yari yasabwe kujya ikinira kubera ikibuga cyayo cyo mu rugo kitari ku rwego rwo gukinirwaho Shampiyona.

Nyuma y’ibiganiro byahuje uyu muyobozi na Perezida wungirije wa Ferwafa, Kayiranga Vedaste kuri uyu wa Kane, byarangiye iyi kipe yemerewe kuzakinira ku kibuga cyayo ariko ihabwa iminsi 10 yo kubanza guhindura amazamu, guca imiferege y’amazi ndetse no kugitsindagira nk’uko Ndungutse yabibwiye IGIHE.

Ati “Twemeranyijwe ko uriya mukino wo ku Cyumweru utazabera i Nyagatare tukareba ahandi dukinira ariko banatubwira ibyo bavuga ko dukwiye gukosora, si ibintu bikomeye cyane n’ubu abakozi barimo bishobora kurangira vuba. Nyuma y’iminsi icumi, akanama gashinzwe gusuzuma ibibuga kazagaruka kureba uko bihagaze ku buryo indi mikino itaha tuzayacyirira mu rugo.”

Uretse Sunrise FC yahawe iminsi 10 yo gukemura ibyagawe ku kibuga cyayo, Umuyobozi w’Amagaju FC na yo ifite ikibazo nk’iki yari ku cyicaro cya Ferwafa yitwaje impapuro zigaragaza ko nta bushobozi iyi kipe ifite bwo kujya yakirira imikino i Huye ndetse asaba ko icyemezo cyasubirwaho ariko ntiyakirwa asabwa kugaruka kuri uyu wa Gatanu.

Aganira na IGIHE yagize ati “Icyanzanye hano, turashaka gusaba ko twakoroherezwa tukajya dukinira iwacu. Ni amafaranga menshi atari ateganyijwe yaba yiyongereyeho kujya gukinira i Huye kandi nta bafana twaba dufite. Kugeza ubu ntituzi ibyo banenze ikibuga cyacu ariko nibabitubwira ibishoboka twabikosora.”

Yakomeje agira ati “Icyo birengagiza ni uko hari n’andi makipe afite ibibuga bibi no kurusha icyacu kandi n’akinira ku byiza mwibuke ko nta kipe n’imwe mu Rwanda yiyubakiye ikibuga. Baduhe amahirwe abana bacu bakine umupira, uko amahirwe yagiye agera ku yandi makipe akubakirwa ibibuga wenda natwe azatugeraho.”

Shampiyona y’u Rwanda iratangira kuri uyu wa Gatanu saa kumi n’ebyiri, Rayon Sports icakirana na Police FC kuri Sitade ya Kigali.

Indi mikino iteganyijwe ku munsi wa mbere wa Shampiyona:

Ku wa Gatandatu, tariki ya 15 Ukwakira 2016

- Pépinière FC vs Mukura (Ruyenzi, 15:30)

- Etincelles FC vs Gicumbi FC (Umuganda, 15:30)

- Bugesera FC vs Kiyovu SC (Bugesera, 15:30)

Ku Cyumweru tariki ya 16 Ukwakira 2016

- Marines FC VS Espoir FC (Umuganda, 15:30)

- Sunrise FC vs AS Kigali (Kicukiro , 15:30)

- Kirehe FC vs Musanze FC (Kirehe; 15:30)

Iki nicyo kibuga Sunrise FC yasabwe gutsindagira ikazajya icyakiriraho imikino ya shampiyona
I Nyagisenyi barasaba ko niba ikibuga ari kibi baterwa inkunga bakubakirwa nk'uko n'andi makipe byagiye bigenda
Ibaruwa Sunrise FC yahawe na Ferwafa iyisaba kujya kuvugura ikibuga cyayo mu gihe kitarenze iminsi 10
Ibaruwa ikipe y'Amagaju yandikiye Ferwafa isaba gukomorerwa ikajya yakirira imikino yayo i Nyagisenyi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved