Ferwafa yatangiye urugendo rwo gusohoza isezerano yahaye Abanyarwanda mu 2017

Yanditswe na Manzi Rema Jules
Kuya 11 Mutarama 2017 saa 10:45
Yasuwe :
0 0

Ishyirahamwe ry’Umupira w’Amaguru mu Rwanda (FERWAFA), ryatangiye gutoranya abana b’abahungu batarengeje imyaka 15 bazajya mu ikipe y’igihugu y’iki cyiciro bikaba ari mu rwego rwo kubaka Amavubi azahangana n’andi makipe akomeye mu myaka iri imbere.

Mu kiganiro n’abanyamakuru gisoza umwaka wa 2016, Ferwafa igaragaza ibyo yakoze na gahunda ifite mu 2017, Perezida wayo Nzamwita Vincent de Gaulle yatangaje ko igihe kigeze kugira ngo u Rwanda rugire ibyiciro byose by’ikipe y’igihugu guhera ku bana batarengeje imyaka 15, 17 na 20 ndetse ahiga ko bitarenze 2018 bizaba byamaze gushyirwa mu bikorwa.

Yagize ati “Mu makipe y’igihugu azajya yitabira amarushanwa ya FIFA tugomba gushyiramo abana batarengeje imyaka 17, 20 na 23. Tugomba kwicarana n’abatekinisiye bakaduha raporo yabo mu makipe tuzandikisha ariko nzi neza ko umwaka wa 2018 ibyiciro byose tuzaba tubifite.”

“ Aya marushanwa y’abana nagenda neza uyu mwaka dushobora gutangira kwandikisha amakipe yose dufite. Uretse umupira w’amaguru wo ku mucanga niwo tutagira.”

Iyi gahunda yo gutoranya abana batarengeje imyaka 15 bafite impano muri ruhago yatangiriye i Rubavu kuri Stade Umuganda kuri uyu wa Kabiri tariki 10 Mutarama 2017.

Muri uyu muhango uzanakomereza mu bindi bice by’igihugu, Nzamwita yatangaje ko bizatuma igihugu kigira abana benshi bafite impano mu mupira w’amaguru ndetse n’abandi wasangaga batagira ababakurikirana kandi bawukunda bakazagira ayo mahirwe.

Ati “Intego nyirizina y’aya majonjora ni ukubaka ikipe y’abahungu batarengeje imyaka 15 kimwe n’iy’abakobwa yashyizweho mu kwezi gushize. Aya makipe yombi azitabira amarushanwa atandukanye kugira ngo barusheho kugaragaza ubuhanga bwabo bitume turushaho kugira amakipe y’igihugu akomeye mu bagabo no mu bagore.”

Gutoranya abahungu b’iki cyiciro bije nyuma y’ukwezi, abakobwa bari muri iyi myaka batoranyijwe ndetse n’Ikipe y’Amavubi y’abagore U-15 ikaba yaramaze gushyirwaho.

Ferwafa kandi igiye gutangiza shampiyona y’abatarengeje imyaka 15 izitirirwa Umukuru w’Igihugu, Paul Kagame ikazajya ihuza ibigo by’amashuri guhera muri Gashyantare uyu mwaka.

Nk’uko Ferwafa ibitangaza abazaba bemerewe gukina iri rushanwa ni abana bavutse nyuma ya 2002 gusa rikazajya rikinwa mu mwaka w’amashuri.

Amashuri ari mu murenge umwe azajya abanza guhatana abakinnyi bigaragaje bashyirwe hamwe bahatane ku rwego rw’Akarere nyuma bakomereze no ku rw’intara, ababashije gutsinda bose bakazahurizwa mu ishuri ry’icyitegererezo rizashyirwa i Huye mu mpera z’uyu mwaka.

Igikorwa cyo gutoranya abana batarengeje imyaka 15 bafite impano muri ruhago cyatangiriye i Rubavu kuri Stade Umuganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza