Gicumbi FC ishobora gukurikira Pépinière FC mu gusezera muri shampiyona

Yanditswe na Manzi Rema Jules
Kuya 27 Ukuboza 2016 saa 12:02
Yasuwe : XX
0

Nyuma y’uko Pépinière FC isezeye muri shampiyona y’icyiciro cya mbere mu Rwanda kubera icyemezo cya Ferwafa cyo kuyihagarikira ikibuga, Gicumbi FC zihuje ikibazo nayo ishobora gufata umwanzuro nk’uyu niramuka idakomorewe ngo yemererwe kongera gukinira imbere y’abafana bayo.

Kuva shampiyona y’uyu mwaka yatangira, Gicumbi FC ntabwo irakinira ku kibuga cyayo cyahagaritswe n’Ishyirahamwe ry’umupira w’amaguru mu Rwanda rivuga ko kitujuje ibisabwa.

Mu nama iherutse guhuza abayobozi b’abakipe na Ferwafa tariki 21 Ukuboza 2016 yigaga ku bibazo bitandukanye biri mu mupira w’amaguru mu Rwanda, byari byemejwe ko ku munsi ukurikiye hoherezwa intumwa zishinzwe kureba ubuziranenge bw’ibibuga zigasura icya Gicumbi FC n’icya Pépinière FC ariko ntibyakozwe.

Nyuma y’aho Pépinière FC imenyesheje Ferwafa ko itagishoboye kwitabira shampiyona ndetse igafata umwanzuro wo gusezera, Umunyamabanga wa Gicumbi FC Antoine Dukuzumuremyi yatangarije IGIHE ko na bo bashobora gufata umwanzuro nk’uyu ariko bagiye kubanza gutegereza niba bizagera tariki 8 Mutarama 2017 bakomorewe kuko ari nabwo bagomba kuzaba bakira umukino.

Ati “Mbere na mbere birababaje kubona bigeze aho abanyamuryango batangira kwikura muri shampiyona kubera ibyemezo bya Ferwafa. Ikibuga cya Pépinière FC si kibi kurusha ibya Sunrinse FC n’ibindi bikinirwaho shampiyona kandi ku Ruyenzi hanabereye imikino myinshi kugera ku munsi wa munani nta kibazo cyari kigeze kiba.”

“Natwe dutegereje ko badusura nk’uko babidusezeranyije gusa ntitunumva impamvu bageze ubu bataraza nyamara mu nama twari twakoze bari bemeye ko badusura ku munsi ukurikira.”

Nibakomeza kudufungira ikibuga tuzafata undi mwanzuro ushobora no kuba gusezera…

Dukuzumuremyi avuga ko kujya gukinira hanze y’abafana babo byabahombeje amafaranga atari make by’umwihariko bikaba byaratumye Gicumbi FC idashobora kugera ku ntego zayo zo gushimisha abatuye Akarere ari na yo ntandaro y’amikoro make n’umusaruro utari mwiza irimo kugira muri iki gihe.

Ati “Gicumbi FC ni ikipe iriho kugira ngo ishimishe abatuye Akarere kacu. Kuba itagikinira aho bayireba kandi nta kibazo ikibuga cyacu gifite ni ikibazo gikomeye. Ni nabyo bituma tutitwara neza uko byakagombye. …turaba dutegereje turebe ko bizagera igihe tuzakirira umukino wa Mukura VS, gusa nibakomeza kubyanga tuzafata undi mwanzuro ushobora no kuba gusezera na twe, nubwo atari cyo twifuza.”

Ikibuga cya Gicumbi FC cyafungiwe rimwe n’ibindi by’Amagaju FC na Sunrise FC mbere y’uko shampiyona itangira nyuma y’aho akanama k’intumwa za Ferwafa kari kemeje ko ibyo bibuga bitujuje ibisabwa ngo byakire imikino ya shampiyona ariko ibindi byaje gufungurwa hasiraga icy’i Gicumbi.

Iyi kipe kugeza ubu iri ku mwanya wa 15 muri shampiyona n’amanota ane mu mikino 10, ku munsi wa 11 tariki 30 izaba yasuye Sunrise FC tariki 8 Mutarama yakire Mukura VS ari nabwo itegereje kuzaba yamenye niba izasubira gukinira mu rugo bitaba ibyo igafata umwanzuro wundi.

Umunyamabanga wa Gicumbi FC avuga ko ikibuga cyabo aatari kibi kurusha ibindi birimo ibyemerewe kwakira shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza