Ibyo wamenya kuri Rurangirwa wifuza guhindura Ferwafa nka Ferwacy y’amagare

Yanditswe na Manzi Rema Jules
Kuya 1 Ukuboza 2017 saa 05:47
Yasuwe :
0 0

Kuwa Kabiri w’iki Cyumweru ubwo akanama gashinzwe gutegura amatora ya Perezida w’Ishyirahamwe ry’umupira w’amaguru, Ferwafa, kakiraga amadosiye y’abifuza kwiyamamaza; hakiriwe batatu barimo na Rurangirwa Louis, izina rikomeye muri siporo y’u Rwanda ariko rimaze igihe risa n’iryazimye.

Rurangirwa watunguranye atanga ibyangombwa byo kwiyamamariza uyu mwanya, kuri uyu wa Gatanu yaganiriye na IGIHE atangaza impamvu n’intego zatumye yifuza kuyobora Ferwafa.

Uyu mugabo yatangiye kugana inzira ya ruhago mu 1998 ari umutoza w’ikipe ya EAV Kabutare azamura abakinnyi batandukanye barimo Gasana Mémé, Ntare Freddy, Niyibizi Suleiman n’abandi.

Mu 2000 nibwo yakoze amahugurwa y’ubusifuzi atangira gusifura mu cyiciro cya kabiri azamurwa mu cya mbere mu 2006 ahita aba n’umusifuzi mpuzamahanga wa FIFA. Yasezeye iby’ubusifuzi mu 2011 kubera ikibazo cy’imvune yo mu ivi.

Rurangirwa wari waranakinnye Basketball muri APR BBC, nyuma ya Jenoside yakorewe Abatutsi mu 1994, amaze gusezera ubusifuzi yagiye kwiga ubutoza bw’imikino Ngororamubiri ndetse mu 2011 atorerwa kuribera Perezida wungirije.

Iri shyirahamwe ryaje kubamo ibibazo by’ubwumvikane buke, ricikamo ibice ndetse bamwe mu bayobozi barimo na Rurangirwa batabwa muri yombi n’inzego z’umutekano ariko baza kurekurwa.

Ikiganiro IGIHE yagiranye na Rurangirwa wifuza kuyobora Ferwafa

IGIHE: Igitekerezo cyo kuba wayobora Ferwafa cyakujemo ryari?

Rurangirwa: Ni igitekerezo maranye igihe kirekire kuko hari intambwe umupira wacu utarageraho. Nibyo hari intambwe yatewe ariko nkatwe twawubayemo imyaka myinshi tubona ko hakenewe izindi mbaraga, hari byinshi byo gukosora. Niyo mpamvu nifuje kuba natanga uwo musanzu ndamutse ngiriwe icyizere.

IGIHE: Ni ikihe cyuho wabonaga mu miyoborere y’umupira w’amaguru wumva uzaziba?

Rurangirwa: Icyuho gikomeye kiri mu misifurire n’iterambere ry’umupira w’abana n’uw’abagore. Mpereye mu misifurire, byakunze kuvugwa ko hari ikibazo cy’imishahara y’abasifuzi itinda kandi amafaranga aba yatanzwe na FIFA ukaba wakwibaza impamvu batayahabawa.

Ibi bigira ingaruka ku basifuzi ubwabo n’amakipe kuko nibwo usanga binubira buri munsi imisifurire mibi. Sinavuga ko basifura nabi kuko badafite ubushobozi ahubwo biterwa n’uko benshi baba badatuje. Gukora ukamara amezi atatu utarahembwa bishobora no gutuma bashaka inzira za bugufi zo kubona amafaranga yo gukoresha mu ngo zabo.

Ikindi, umupira utubakiye ku bana bakiri bato nta cyerekezo waba ufite, nibwo mubona Amavubi aza akitwara neza umwaka umwe indi itatu akabura. Murabyibuka mu minsi yashize ku rutonde rwa FIFA twari mu bihugu 70 bya mbere ku Isi none tugeze mu 120, biteye isoni. Ntibiterwa n’uko abakinnyi ari abaswa ahubwo nta gahunda iteguye tugira.

IGIHE: Hari abavuga ko waje kwiyamamaza bisa no kurangiza umugenzo, ni ko biri?

Rurangirwa: [Aseka] Ntabwo naza kwiyamamaza nshaka guta umwanya. Mfite intego yo guteza umupira imbere kandi ndamutse ngiriwe icyizere ngatorwa, mwabona itandukaniro. Umupira nawubayemo imyaka irenga 17, yaba abayobora ubu n’abazaza gutora baranzi, bazi ubushobozi bwanjye. Ikindi kuba naravuye mu busifuzi nkiri wa muntu wizerwa, ntirukanywe ngo natse ruswa, nabyo ni ikintu gikomeye.

IGIHE: Ni iyihe sura wifuza ko Ferwafa wazaba uyobora yaba ifite?

Rurangirwa: Mu kuri urebye Ferwafa ntabwo ikigaragara neza kubera ibibazo bitandukanye byagiye bibamo. Njye nagize amahirwe yo kwiga ibijyanye no kumenyekanisha no gucuruza umupira, hari ibintu mbona nakora kandi ikongera kugaragara neza. Nk’urugero mujya mubona Ishyirahamwe ry’umukino wo gusiganwa ku magare [Ferwacy] uburyo rikora ibintu byaryo neza.

Mubona uburyo amarushanwa ritegura abaterankunga baba barwanira kuyafata ndetse Ferwacy ikagera ubwo ivuga iti turakira uwujuje ibintu runaka naho twe mu mupira abaterankunga baba bawuhunga, mwibaza ko ari ukubera iki? Burya nta muntu ufite amafaranga ye wakwifuza kuyashyira mu kintu kidafite ejo hazaza.

Njye icya mbere nakora ni ukwegera Ferwacy nkabasaba inama, uko bategura ibintu byabo, uko babicuruza mbese byaba ari nk’urugendoshuri. Mwabona Ferwafa ihinduka ikamera nka Ferwacy, igakorera ku murongo. Tugashaka abaterankunga ku buryo mu gihe buri kipe yabonaga miliyoni 10 ku mwaka aya yaboneka ahubwo ku kwezi kumwe.

Rurangirwa avuga ko mu gihe kwiyamamaza bizaba byatangiye tariki 12 Ukuboza 2017 azafata umwanya we agaragariza imigabo n’imigambi abanyamuryango ba Ferwafa ari nabo batora akaba afite icyizere ko bazahitamo uzagaragaza intego nziza kurusha abandi yaba we cyangwa umwe hagati ya Rwemarika Félicité na Nzamwita Vincent De Gaulle bahanganye.

Rurangirwa arifuza kuyobora Ferwafa ikamera nka Ferwacy
Rurangirwa arifuza kuyobora Ferwafa ikamera nka Ferwacy

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza