Imbamutima z’abafana barebeye Arsenal vs Chelsea muri Camp Kigali, bamwe bagatahana ibihembo (Amafoto)

Yanditswe na Ntare Julius
Kuya 30 Gicurasi 2019 saa 12:25
Yasuwe :
0 0

Umukino wa nyuma wa Europa League waraye uhuje Chelsea FC na Arsenal FC kuri uyu wa Gatatu, werekanywe muri Camp Kigali n’uruganda rwenga ibinyobwa bisembuye n’ibidasembuye ‘Skol Brewery Ltd Rwanda’, ku bufatanye n’Ikigo cy’Igihugu cy’Iterambere ‘RDB’.

Abafana b’aya makipe yombi n’abandi baje kuharebera umukino bagaragaje ibyishimo bitandukanye bitewe n’ikipe buri umwe yari ashyigikiye.

Ni ibirori byatangiye kare, mbere y’umukino, aho abari baje kurebera uyu mukino muri Camp Kigali babanje gususurutswa n’umuhanzikazi Marina mu ndirimbo zitandukanye.

Abitabiriye uyu mukino ntibishwe n’inyota kuko bafataga ku binyobwa bya Skol ndetse bahabwa n’amahirwe yo kwegukana ibihembo bitandukanye binyuze mu kwemeza uko umukino uza kurangira haba mu gice cya mbere cyangwa mu mukino wose.

Nyirarukundo Julienne, Iradukunda Régis, Tuyizere Xavier, Kwitonda Valens na Eric batsindiye ibihembo birimo imyambaro ya Arsenal na furari z’iyi kipe yamamaza ubukerarugendo bw’u Rwanda, nyuma y’uko babaye bamwe mu banyamahirwe bavuze ko igice cya mbere kirangira amakipe yombi anganya ubusa ku busa.

Mutabazi Emile yatsindiye itike yo kujya gusura Pariki y’Akagera, ashyikirizwa icyapa cya Visit Rwanda n’Umuyobozi Mukuru wa RDB, Claire Akamanzi mu gihe Ngiruwonsanga Théogène wari ugize amahirwe yo guhabwa itike yo gusura Pariki ya Nyungwe, yabuze, amahirwe ye ahabwa Ndwanyishyaka Théogène washyikirijwe icyapa cya Visit Rwanda na Minisitiri w’Ubucuruzi n’Inganda, Soraya Hakuziyaremye.

Umufana watomboye igihembo cy’umunsi ni umwe mu bavuze ko umukino urangira ari ibitego 4-1, wabaye Dukuze Joel wahawe itike y’indege yo gusura Emirates Stadium ikiniraho Arsenal, ashyikizwa igihembo cye n’umuyobozi wa ‘Skol Brewery Ltd Rwanda’ Ivan Wullfaert.

Abafana ba Chelsea ni bo batahanye ibyishimo kuko ikipe yabo yatsinze Arsenal ibitego 4-1, yegukana Europa League ku nshuro ya kabiri nyuma yo gutwara iya 2013.

Umuhanzikazi Marina nyuma yo gutaramira abaje kureba uyu mukino yahise aza kwicara imbere yihera ijisho umukino
Umuhanzi Tizzo umwe mu bagize itsinda rya Active nawe yari yitabiriye ibi birori
Abafana ba Chelsea batangiye kubyina guhera ku gitego cya mbere
Hagiye hatsindirwa ibihembo bitandukanye
Umuyobozi Mukuru wa RDB, Clare Akamanzi yarebeye umukino wa Chelsea FC Vs Arsenal FC muri Camp Kigali
Ngiruwonsanga Theogene yatsindiye itike yo gusura Parike ya Nyungwe ashyikirizwa igihembo na Minisitiri w'Ubucuruzi n'inganda, Soraya Hakuziyaremye
Mutabazi Emille yatsindiye itike yo kujya muri Parike y'Akagera ashyikirizwa ikirango cya Visit Rwanda n'Umuyobozi wa RDB Claire Akamanzi
Ryari ijoro ry'ibyishimo ku bafana ba Chelsea
Hari amahema ya Skol arimo ibinyobwa ndetse n'ibyo kurya by'ubwoko bwose byaramiraga abitabiriye ibi birori
Ntabwo wari umugoroba mwiza ku bakunzi ba Arsenal
Nyuma y'uko Chelsea ibonye igitego cya kane abafana bayo bikoreye intebe n'ameza
Abarashi bari bahangayikishijwe n'imikinire y'ikipe yabo
Ibi birori byari byitabiriwe n'abafana benshi b'amakipe atandukanye
Kimwe mu byokezo byamaze benshi isari
Abafana ba Manchester United bari bitabiriye umukino bahisemo kujya inyuma ya Chelsea kuko badacana uwaka na Arsenal
Igitego cya kane cyashenguye benshi
Wari umugoroba mwiza ku bafana ba Chelsea
Rwarutabura utajya utangwa n'ibirori ahora afana ikipe yose yambara nka Rayon Sports
Abashengurwaga n'agahinda basomaga kuri Skol ikabahoza amarira
Umwe mu bafana ba The Blues nyuma y'umukino
Hakurikiyeho umwanya wo gutsindira ibihembo
Dukuze Joel niwe wabaye umufana w'umunsi nyuma yo kuraguza umutwe ko Chelsea itsinda Arsenal ibitego 4-1 ahita atsindira itike y'indege yo gusura stade ya Arsenal , Emirates Stadium
Ibiranga Dukuze Joel ugiye kwerekeza Emirates stadium
Ivan Wullfaert yashimishijwe cyane n'umubare munini w'abafana baje kwitabira ibi birori

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza