Imizigo y’umutoza ihora iteguye, ndamutse nirukanwe nta kundi- Jimmy Mulisa

Yanditswe na Manzi Rema Jules
Kuya 20 Werurwe 2017 saa 12:03
Yasuwe :
1 0

Umutoza wa APR FC, Jimmy Mulisa nyuma yo kunganya na Pépinière FC iri ku mwanya wa nyuma muri shampiyona, yatangaje ko n’ubwo ikipe ye itari gutanga umusaruro, agiye gukomeza gukora ibishoboka byose kugira ngo ibintu bigaruke ku murongo ariko ngo biramutse byanze agasezererwa yiteguye kubyakira.

APR FC ntiyorohewe n’ibihe bibi irimo byo kutabona intsinzi muri iki gihe aho mu mikino umunani iheruka gukina yatsinze rimwe. Ibintu byakomeje kuzamba ubwo kuri iki Cyumweru yanganyaga na Pépinière FC ya nyuma muri shampiyona 1-1 kandi nabwo mu buryo bugoranye.

Aganira n’itangazamakuru nyuma y’umukino, umutoza Jimmy Mulisa yabajijwe niba uko kwitwara nabi bidashobora gutuma asezererwa muri iyi kipe amazemo amezi ane gusa avuga ko biramutse bibaye azabyakira.

Yagize ati “Icyo navuga ni uko mfite amasezerano. Ndacyakomeza gukora. Hagize ikiba, akenshi bavuga y’uko suitcases (imitwaro) y’umutoza ihora iteguye, bibaye nta kundi.”

Uyu mutoza yanavuze ko bitoroshye gukomeza guhatana n’abandi mu rugamba rwo gushaka igikombe cya shampiyona kuri iyi kipe y’Ingabo z’u Rwanda ariko yongeraho ko ataratakaza icyizere kuko ibihe bibi barimo n’amakipe bahanganye bishobora kuyabaho.

Ati “Amahirwe yacu arimo aragabanuka ariko imikino iracyahari. Ntabwo turamenya uko bizarangira, wenda n’amakipe duhanganye ashobora kujya mu bibazo nk’ibi turimo. Ni ukwiha icyizere tugakomeza gukora tukareba.”

Kugeza ku munsi wa 21 wa shampiyona, Rayon Sports ifite ibirarane bitatu niyo ikiyoboye urutonde rw’agateganyo n’amanota 43 irusha APR FC ya kabiri amanota abiri ikaba yaramaze gukina imikino yayo yose. Police FC iri ku mwanya wa gatatu n’amanota 40 mu mikino 21, ikaba ikurikirwa na AS Kigali ifite 39 n’ibirarane bibiri.

APR FC isigaje gukina imikino icyenda kugira ngo shampiyona irangire, irimo Etincelles FC, Sunrise FC, Kiyovu Sports, Police FC, Espoir FC, AS Kigali, Marines FC, Rayon Sports ndetse na Bugesera FC.

Ku rundi ruhande, Rayon Sports iracyafite imikino 12 irimo uwa Bugesera FC, AS Kigali, Sunrise FC, Amagaju FC, Gicumbi FC, Mukura VS, Musanze FC, Kirehe FC, Pépinière FC, Etincelles, APR FC ikazasoza isura Kiyovu Sports.

Mulisa avuga ko biramutse bibaye ngombwa ko yirukanwa azagenda kuko imizigo y'umutoza ihora iteguye
Jimmy Mulisa areba abakinnyi ba Pépinière FC bishimira igitego
Ibya APR FC byongeye guhumira ku mirari ubwo yanganyaga na Pépinière FC ya nyuma muri shampiyona
Jimmy Mulisa (hagati) n'abatoza bamwungirije ntiborohewe no kuba ikipe ya APR FC ikomeje kwitwara nabi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza