Imvune ya Muhadjili itumye yiyongera ku bakinnyi ba APR FC batazahura na Rayon Sports

Yanditswe na Jean de Dieu Dukuze
Kuya 12 Mutarama 2017 saa 10:57
Yasuwe : XX
91 55

Umukinnyi wa APR FC wo hagati usatira izamu Hakizimana Muhadjili yaraye agiriye imvune ikomeye mu myitozo igiye gutuma amara igihe kinini hanze y’ikibuga bivuze ko azasiba imikino isigaye mu gice kibanza cya shampiyona, harimo n’uwo ikipe ye izahura na Rayon Sports mu cyumweru gitaha.

Muhadjili, yagize imvune kuri uyu wa gatatu ubwo yari mu myitozo y’ikipe ya APR FC gusa akaza kugongana na myugariro Herve Rugwiro byatumye akurwa ku kibuga atwawe mu ntoki, ikintu cyateye ubwoba abakunzi b’iyi kipe bari bitabiriye imyitozo.

Twizerimana Onesme na we amaze iminsi yaravunitse

Nkuko tubikesha urubuga rwa Internet rw’iyi kipe, nyuma y’ibi uyu mukinnyi yahise ajyanwa kwa muganga acishwa mu cyuma, ni ko gusanga igufwa ry’ikirenge ryatandukanye bityo baza kumushyiraho sima kugira ngo igufwa rifatane, ahemejwe ko azamara ibyumweru bitandatu hanze y’ikibuga.

Hakizimana Muhadjili iyi kipe yakuye muri As Kigali, agiye mu mubare w’abandi bakinnyi ba APR FC bamaze iminsi baravunitse, barimo Onesme Twizerimana na we bazanye bavuye muri As Kigali, hakabamo Sekamana Maxime watangiye imyitozo yoroheje ariko na we utazahita agaruka mu kibuga, ndetse n’umunyezamu Ntaribi Steeven uzamara icyumweru hanze nyuma yo kuvunikira mu mukino wa As Kigali.

Ikipe ya APR FC iza ku mwanya wa kabiri muri shampiyona, ifite umukino wa shampiyona kuri uyu wa Gatanu uzayihuriza i Rubavu na Marines, ni mbere yo kwakira mukeba Rayon Sports ku munsi wa shampiyona uzakurikira, hazaba ari tariki ya 21 Mutarama 2017. Uyu mukino ukaba ufite agaciro kuri aya makipe yombi, aho uzerekana aho shampiyona y’uyu mwaka izerekeza.

Uko umunsi wa 13 uteganyijwe muri shampiyona

Kuwa gatanu tariki ya 13/1/2016

  • Marines Fc APR FC Umuganda (15.30)

Kuwa gatandatu tariki ya 14/1/2016

  • As Kigali vs Kiyovu Kigali Stadium (15.30)
  • Sunrise F vs Mukura Vs&L Kicukiro (15.30)
  • Pepinieres vs Bugesera Ruyenzi (15.30)
  • Espoir vs Police Rusizi (15.30)

Ku cyumweru tariki ya 15/1/2016

  • Rayon Sports vs Etincelles Kigali Stadium (15.30)
  • Musanze vs Gicumbi Fc Nyakinama (15.30)
  • Kirehe vs Amagaju Fc Kirehe (15.30)
Muhadjili agiye kumara hafi amezi abiri ari hanze y'ikibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE