Imyitozo y’Amavubi yitegura CECAFA yitabiriwe n’abakinnyi umunani gusa (Amafoto)

Yanditswe na Manzi Rema Jules
Kuya 26 Ugushyingo 2017 saa 01:25
Yasuwe :
0 0

Ikipe y’igihugu Amavubi yatangiye imyitozo yitegura CECAFA izabera muri Kenya ariko yakozwe n’abakinnyi umunani barimo barindwi ba Rayon Sports n’uwa Kiyovu Sports gusa.

Muri iyi CECAFA 2017 izatangira tariki ya 3 kugeza kuya 17 Ukuboza, u Rwanda ruri mu itsinda A hamwe na Kenya, Zanzibar, Tanzania na Libya rukahura bwa mbere na Kenya mu mukino ufungura irushanwa.

Kuri iki Cyumweru nibwo umutoza Antoine Hey yakoresheje imyitozo ya mbere kuri Atade Amahoro igaragaramo abakinnyi umunani barimo Ndayishimiye Eric ‘Bakame’, Rutanga Eric, Manzi Thierry, Usengimana Faustin, Mukunzi Yannick, Niyonzima Olivier ‘Sefu’ na Manishimwe Djabel bose ba Rayon Sports na Mbogo Ally wa Kiyovu Sports.

Aganira n’abanyamakuru nyuma y’imyitozo, Hey yavuze ko abandi bakinnyi bagomba kwitabira umwiherero nyuma y’imikino ya shampiyona yo kuri iki Cyumweru, bagakomeza imyitozo izajya ikorwa mu gitondo na nimugoroba mbere yo gufata indege berekeza muri Kenya kuwa Gatanu.

Uyu mutoza yashimangiye ko CECAFA azayikoresha mu kureba no kumenyereza abakinnyi agomba kuzakoresha mu gikombe cya Afurika cy’abakina imbere mu bihugu byabo, CHAN 2018, izabera muri Maroc muri Mutarama, ari nayo mpamvu yahisemo kudahamagara abakinnyi bakina hanze y’u Rwanda.

Yagize ati “Intego dufite ni ugushaka umusaruro mwiza muri Kenya kugira ngo twiyongerere icyizere mbere yo kwitabira CHAN 2018 muri Maroc. Kuba dufite CHAN mu minsi mike kandi ikaba ariryo rushanwa rya kabiri rikomeye muri Afurika, rizanyura ku matareviziyo mpuzamahanga, tugomba kujyana ikipe yiteguye guhangana n’ibihugu nka Nigeria. Niyo mpamvu twahisemo gutangira gutegura ikipe kare.”

Muri CHAN 2018 izatangira tariki ya 13 Mutarama kugeza kuya 4 Gashyantare, u Rwanda ruri mu itsinda C hamwe na Libya, Nigeria na Equatorial Guinea.

Abakinnyi 23 bahamagawe kwitegura CHAN 2018:

Abanyezamu: Kimenyi Yves (APR Fc), Nzarora Marcel (Police Fc) na Eric Ndayishimiye (Rayon Sports Fc)

Ba Myugariro: Rugwiro Herve (APR Fc), Omborenga Fitina (APR Fc), Imanishimwe Emmanuel(APR FC), Manzi Thierry (Rayon Sports), Usengimana Faustin (Rayon Sports), Rutanga Eric (Rayon Sports), Kayumba Soter (AS Kigali), Iradukunda Eric (AS Kigali) na Mbogo Ally (SC Kiyovu).

Abakina hagati: Bizimana Djihad (APR Fc), Hakizimana Muhadjiri (APR Fc), Nshimiyimana Amran (APR Fc), Mukunzi Yannick (Rayon Sports), Manishimwe Djabel (Rayon Sports), Niyonzima Ally (AS Kigali) na Niyonzima Olivier Sefu (Rayon Sports).

Ba Rutahizamu: Nshuti Innocent (APR Fc), Sekamana Maxime (APR Fc), Mico Justin (Police Fc) na Biramahire Abeddy (Police Fc).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza