Inama y’igitaraganya yiga ku hazaza ha Gicumbi FC ishobora gusiga ikuweho amaboko

Yanditswe na Manzi Rema Jules
Kuya 19 Ukuboza 2016 saa 12:55
Yasuwe :
0 0

Nyuma y’ubuzima buteye inkeke abakinnyi ba Gicumbi FC babayemo muri iki gihe aho no kubona ibyo kurya ari ingorabahizi, ubuyobozi bw’iyi kipe bwasabye gukorana inama n’ubw’Akarere kuri uyu wa Mbere tariki 19 Ukuboza ishobora kuza gufatirwamo imyanzuro ikomeye ku hazaza hayo.

Amakuru IGIHE ikesha umwe mu bakinnyi ba Gicumbi FC utashatse ko amazina ye ajya hanze ni uko kuwa Gatandatu tariki 17 Ukuboza ubwo iyi kipe yari imaze gutsindwa na Bugesera FC ibitego 2-1 mu Bugesera, abayobozi begereye abakinnyi bababwira ko udafite umuryango i Gicumbi yaba yitahiye kuko nta mikoro yo kubatunga mu mwiherero ahari, bababwira ko bazabatumaho ubushobozi bwabonetse.

Mu kiganiro IGIHE yagiranye n’Umunyamabanga w’iyi kipe, Dukuzumuremyi Antoine yahakanye aya makuru ariko yemeza ko kuri ubu Gicumbi FC iri mu bibazo bikomeye kuko nta mafaranga na make isigaranye yo kugurira abakinnyi ibyo kurya ku buryo ubu batunzwe n’abafana bari kubashyira ibijumba, umuceri, ibishyimbo, n’ibindi biribwa.

Ati “Komite yabonye amafaranga atangiye kuyishirana kandi n’amafaranga yo ku Karere atakiboneka kandi n’uburyo twari twashyizeho bwo kuyakura mu baturage bwaranze. Gusa twari kumwe n’abafana ubu guhera kuwa Gatandatu nibo bari kuzana ibyo gutunga abakinnyi, barabikora ku bwitange ntiwakwemeza ko bizagumaho.”

Dukuzumuremyi yavuze ko nyuma yo kubona ko amikoro ashize kandi abakinnyi bataguma kubaho batarya, bandikiye Akarere basaba ko bakorana inama yiga ku mibereho ya Gicumbi FC niba gakomeza kuyibera umuterankunga cyangwa niba kayikuraho amaboko noneho hakajya hafatwa umwanzuro ku hazaza hayo.

Ati “Twirwanagaho muri komite y’ikipe harimo abantu nka batatu cyangwa bane bamfashaga gutunga ikipe ariko kuba nta mafaranga y’Akarere aboneka baribaza bati ’ese tuzakomeza gutunga ikipe y’Akarere cyangwa y’abaturage nta n’umwe ugira icyo ashyiramo bizagenda gute?’”

Iyi nama iteganyijwe kuri uyu wa Mbere saa munani, byitezwe ko Akarere kaza kwemeza niba kazongera inkunga kahaga iyi kipe ikava kuri miliyoni 10 ikiyongera cyangwa niba na yo kayihagarika kuko mu bayobozi bako na bo batavuga rumwe ku kamaro Gicumbi FC ifite aho bamwe basanga amafaranga yashyirwa mu bindi ariko hakaba abandi bashyigikiye ko ikomeza kubaho.

Dukuzumuremyi avuga ko nibamara kumva uruhande Akarere gahagazeho aribwo bamenya niba Gicumbi FC izakomeza kubaho nubwo kuri we asanga n’iyo kakuramo amafaranga yako bashobora kwifashisha abakunzi bayo basanzwe igakomeza kubaho n’iyo yabaho nabi kuko hari abayikunda by’ukuri.

Mu mpera z’umwaka ushize w’imikino Akarere ka Gicumbi kari kagaragaje igisa no kwikuraho iyi kipe kayiha abaturage ngo abe aribo bayitunga. Umunyamabanga wayo avuga ko uko bari babiteganyije bitakunze kuko abayobozi b’imirenge bari bemeye ko bazashishikariza abaturage babo gutanga amafaranga nyuma bamwe barirukanwe abandi barimurwa abashya babasimbuye ntibabishyiramo imbaraga.

Kugeza ku munsi wa cyenda wa shampiyona Gicumbi FC iri mu murongo utukura ku mwanya wa 15 n’amanota ane gusa ikurikiwe na Pépinière ya nyuma ndetse bigoye ko aya makipe azakomeza gukina icyiciro cya mbere niba nta gihindutse ku kibazo cy’amikoro ahuriyeho.

Muri iyi minsi, abakinnyi ba Gicumbi FC batunzwe n'ibiryo bagemurirwa n'abafana b'ikipe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza