Kwamamaza

Indege yari itwaye ikipe yo muri Brazil yakoze impanuka, 76 bahasiga ubuzima (Amafoto)

Yanditswe kuya 29-11-2016 saa 12:49' na Manzi Rema Jules


Indege yari itwaye abagenzi 81 barimo n’abakinnyi b’ikipe ya Chapecoense FC yo muri Brazil yakoreye impanuka mu Mujyi wa Medellin muri Colombia, abagera kuri 76 bahasiga ubuzima, batanu bararokoka.

Nk’uko ikinyamakuru DailyMirror kibitangaza iyi mpanuka yabaye ahagana saa 10:15 z’ijoro muri Colombia, yatewe no kubura k’umuriro muri iyo ndege.

Iyi ndege yari irimo abagenzi 72 ndetse n’abakozi icyenda b’indege, yari itwaye abakinnyi 22 ba Chapecoense berekeza muri Colombia aho yagombaga guhura na Atlético Nacional kuri uyu wa Gatatu ku mukino wa nyuma wa Copa Sudamericana (irushanwa rihuza amakipe yo muri Amerika y’Epfo).

Yabonye itike yo gukina umukino wa nyuma cyumweru gishize nyuma yo gusezerera San Lorenzo yo muri Argentine.

Ishyirahamwe ry’umupira w’amaguru muri Amerika y’Epfo (CONMEBOL) ryatangaje ko uyu mukino wasubitswe kubera iyi mpanuka.

Ubuyobozi bw’ikibuga cy’indege cya Jose Maria Cordova de Rionegro, aho yagombaga kururukira kuri Twitter bwagize buti “Bidasubirwaho indege nomero CP2933 yari itwaye ikipe ya Chapecoense yakoze impanuka ariko birashoboka ko hari abayirokotse.”

Nyuma basohoye irindi tangazo rigira riti “Ubufasha bwose bushoboka bwateguwe kuko hari abagera kuri batandatu bashobora kuba barokotse.”

Biravugwa ko ikirere kitameze neza mu gace impanuka yabereyemo cyatumye kuhagera bisaba gukoresha inzira z’ubutaka gusa.

Hagati aho icyizere cyo gusanga abarokotse bakiri bazima cyiyongereye kuko iyi ndege itigeze ifatwa n’umuriro nk’uko bikunze kugenda iyo zikoze impanuka.

Mu itangazo iyi kipe yashyize hanze yatangaje ko itaramenya umubare w’abakinnyi ndetse n’abayobozi bayo bashobora kuba barokotse iyi mpanuka.

Chapecoense ni ikipe ikomoka mu Mujyi wa Chapeco, yashinzwe mu 1973 ikaba yarazamutse mu cyiciro cya mbere muri 2014 uyu mwaka ikaba iri ku mwanya wa cyenda muri shampiyona isigaje umunsi umwe igasoza.

Ikipe ya Chapecoense FC ubwo bari mu nzira berekeza muri Colombia
Iyi ndege yakoze impanuka ikomeye yahitanye abagera kuri 76
Ibice by'ibirango by'ikipe ya Chapecoense FC bigaragara ahabereye impanuka
Meya w'Umujyi wa Medellin, Fico Gutierrez agera ahabereye impanuka
Myugariro Alan Ruschel ari mu bahise bajyanwa kwa muganga
Abaganga bari bategereje gutanga ubutabazi bw'ibanze ku bakomerekeye muri iyi mpanuka
Abashaka kugera ahabereye impanuka barakoresha inzira yo hasi kubera ko ikirere kimeze nabi
Inzego z'ubutabazi zahise zigera ahabereye impanuka
Iyi kipe yari yabonye itike yo gukina umukino wa nyuma isezereye San Lorenzo yo muri Argentine
Umubare w'abakinnyi n'abayobozi b'ikipe ya Chapecoense FC barokotse iyi mpanuka nturamenyekana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved