Infatino uyobora FIFA ategerejwe mu Rwanda

Yanditswe na Jah d’eau Dukuze
Kuya 16 Gashyantare 2017 saa 02:34
Yasuwe : XX
0

Perezida w’ishyirahamwe ry’umupira w’amaguru ku isi Gianni Infatino, ategerejwe mu Rwanda tariki ya 24 Gashyantare, aho azashyira ibuye ry’ ifatizo ahazubakwa Hotel ya Ferwafa izuzura mu gihe cy’amezi 18 igatwara miliyari zikabakaba enye z’amafaranga y’u Rwanda.

Uyu mugabo uyobora FIFA wanaciye mu Rwanda ubwo harimo hakinwa igikombe cya Afurika gihuza abakinnyi bakina imbere mu bihugu, CHAN, biteganyijwe ko azagera i Kigali mu ijoro ryo kuwa gatanu tariki ya 24 Gashyantare, aho azaba ari umushyitsi mukuru mu birori byo gutangiza umushinga wo kubaka Hotel ya Ferwafa n’ibiyishamikiyeho, bizakorwa kuwa Gatandatu tariki 25 Gashyantare.

Infantino yifotozanya n'abakinnyi ba Gabon ubwo yarimo yiyamaza akaza mu Rwanda muri CHAN 2016

Aganira n’urubuga rwa Ferwafa, Perezida w’ishyirahamwe ry’umupira w’amaguru mu Rwanda, Nzamwita Vincent De Gaulle, yatangaje ko ari iby’agaciro kanini kuba u Rwanda rugiye kwakira Perezida wa FIFA i Kigali, cyane ko bigaragaza ko yakunze iki gihugu.

Yongeyeho ko bazakora ibishoboka byose ngo bungukire muri uru ruzinduko rwa Infantino bityo bikazatuma umupira w’u Rwanda uryoha kurushaho.

Nzamwita yakomeje agira ati "Ibi byose tubikesha Perezida wa Repubulika Paul Kagame ukunda ruhago kandi akagira uruhare runini ngo tugere ku bintu byiza, harimo n’uku gusurwa kwa perezida wa FIFA. Reka rero dukore cyane bishoboka kugirango tube twagera ku cyerekezo dushaka kuganamo."

Hotel ya Ferwafa yateje ibibazo hambere bikanarangire uwari Umunyamabanga Mukuru wa Ferwafa Me Olivier Mulindahabi asezerewe nyuma yo gufungwa, ni umwe mu mishinga ya FIFA igamije gufasha ibihugu biri mu nzira y’amajyambere kugira ibikorwa remezo bibafasha kuzamura urwego rw’imikinire, ndetse bikaba byabazanira inyungu bitewe n’uko bikoreshejwe.

Biteganyijwe ko FIFA izatanga 65% bya miliyari eshatu na miliyoni 85 zizagenda kuri iyi hoteli, aho igice gisigaye cy’aya mafaranga kizava mu nguzanyo muri banki zitandukanye. Iyi hoteli niyuzura izajya yakira ikipe y’igihugu ndetse n’ay’ibihugu biba byasuye u Rwanda mu gihe binateganyijwe ko izafasha Ferwafa kwinjiza amafaranga.

De Gaulle uyobora Ferwafa(iburyo) yizeye ko uruzinduko rwa Infantino(ibumoso) ruzagira ikintu kinini rusigira ruhago nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza