Ivan Minnaert yanenze imitoreze ya Masoudi wa Rayon Sports

Yanditswe na Kanamugire Emmanuel
Kuya 1 Ukuboza 2016 saa 07:26
Yasuwe :
0 0

Umubiligi wahoze atoza Rayon Sports, Ivan Jacky Minnaert, yanenze uburyo Masoudi Djuma wamusimbuye akinishamo iyi kipe aho asanga kwitwara neza kwayo ari ukubera abakinnyi bamwe na bamwe atari akazi k’umutoza.

Ivan Minnaert yatoje Rayon Sports amezi ane asezera muri Gashyantare nyuma y’imikino itatu ya shampiyona yari amaze gukina, atsinda ibiri anganya umwe, agenda avuze ko bitewe no kudahemberwa ku gihe.

Yahise yerekeza muri AFC Leopards yo muri Kenya ntibyamuhira, kuko yahise yirukanwa nyuma y’amezi arindwi kubera umusaruro mubi wari ugiye gutuma iyi kipe ikundwa kurusha izindi muri iki gihugu imanuka mu cyiciro cya kabiri.

Nyuma yo kwirukanwa muri Nzeri yagarutse mu Rwanda aho kuva ubwo ari mu biganiro na Rayon Sports kugira ngo ayibere ushinzwe gucuruza izina ryayo nubwo avuga ko bisa n’ibitagishobotse.

Aganira na IGIHE yagize ati “Ibiganiro ntabwo ari ibintu byoroshye. Tuzareba niba bishobotse nkore kandi nibyanga nshakire ahandi. Gusa nagize ibihe bibi mu mateka yanjye nk’umutoza muri AFC Leopards ku buryo ntifuza kongera gufata ibyemezo bihutiyeho.”

Uyu mutoza kuri ubu ukunze kugaragara ku mikino itandukanye ya Rayon Sports abajijwe uko abona iyi kipe itaratsindwa ndetse itaraninjizwa igitego muri shampiyona yavuze ko nubwo bamwe bibeshya ko ari uko ikomeye atari ko bimeze.

Ati “Imikino iracyahari, si byinshi nabivugaho. Nk’uko n’abantu babizi, uburyo ikipe ikina bitandukanye n’uko nayikinishaga. Iratsinda byoroshye abantu bakibwira ko ari yo ikomeye ariko ni urwego rw’abo bahangana ruri hasi.”

“Ikindi imikino ya Rayon Sports itsindwa n’abakinnyi ku giti cyabo si nk’ikipe, ntiwakwizera ko bizaguma gutyo rero.”

Aracyafite inzozi zo gutoza Amavubi

Ivan avuga ko ashaka gutoza ikipe y’igihugu kandi abifashijwemo n’abafana n’abayobozi b’igihugu yizera ko bazi umupira kandi babona ibyo yafasha bizashoboka.

Ati “Ngaruka mu Rwanda intego yanjye ntiyari ukugaruka muri Rayon Sports gusa. Intego y’ibanze yari ukuba umutoza w’ikipe y’igihugu. Ndabizi neza ko uburyo ntozamo bwagira icyo bufasha mu kuzamura urwego rw’ikipe ndetse no gusubira ku myanya myiza ku rutonde rwa FIFA.”

“Nubwo hari abantu bagiye bagerageza kwanduza izina ryanjye bibwira ko ari abahanga ndetse bazi uko umupira ukinwa n’uko bategura ikipe ariko ibi kubikora si ugukopera ibyo abandi bakora gusa ngo wumve ko wabimenye. Benshi muri bo nta byangombwa byo gutoza bagira, ni za ‘licence A’ usanga barakuye mu bihugu nka Zambia cyangwa ngo bakoze amahugurwa ya FIFA y’ibyumweru bibiri, iki ni cyo kibazo gikomeye cy’abatoza bo muri Afurika.”

Ivan Jacky Minnaert aracyafite inzozi zo gutoza Amavubi

Umuyobozi w’Ishyirahamwe ry’umupira w’amaguru mu Rwanda, Nzamwita Vincent de Gaulle aherutse gutangaza ko ubu nta mutoza Amavubi akeneye kuko nta marushanwa afite, akazamubona muri Kamena 2017 ubwo amarushanwa yo gushaka itike y’igikombe cya Afurika cy’abakina imbere mu bihugu- CHAN 2018 bizaba bitangiye.

Icyo gihe nabwo amahirwe menshi ahari ni uko iyi kipe yahoze itoza na Jonnathan Mckinstry wirukanwe muri Kanama uyu mwaka, ishobora kuzahabwa umutoza ukomoka mu Budage nk’uko Nzamwita yatangaje ko bagiranye amasezerano n’Ishyirahamwe ry’umupira w’amaguru muri iki gihugu kugira ngo ribafashe gushaka uwaza kuyobora Amavubi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza