Kwamamaza

Jacques Tuyisenge, Umunyarwanda rukumbi warokoye ikipe ye mu bakina hanze

Yanditswe kuya 31-10-2016 saa 13:28' na Manzi Rema Jules


Uretse rutahizamu Jacques Tuyisenge wa Gor Mahia wafashije ikipe ye kwitwara neza imbere ya Mathare United bayitsinda ibitego 2-1, andi makipe akinamo Abanyarwanda yaba ayo muri Afurika n’izo ku mugabane w’u Burayi ntabwo yabashije kwitwara neza mu mikino ya shampiyona yo mu mpera z’iki cyumweru.

Jacques Tuyisenge wari umaze imikino 14 adatsinda igitego ariko agakomeza kugirirwa icyizere n’umutoza, kuri iki Cyumweru yafashije iyi kipe ikomeje kurwanira igikombe cya shampiyona kwitwara neza atsinda igitego kimwe muri bibiri batsinze Mathare United.

Ni igitego cyaje gizanga icyari cyatsinzwe na Francis Kahata mu gice cya mbere.

Nyuma y’imikino 28, Gor Mahia ni iya kabiri n’amanota 51, inyuma ya Tusker FC ifite 55 mu gihe hasigaye imikino ibiri irimo n’uwa nyuma aya makipe yombi azahuramo tariki 19 Ugushyingo 2016.

AS Vita Club ya Sugira yatsinzwe na DCMP ya Kasirye na Diarra

Mu gihe Sugira Ernest yari amaze iminsi afasha ikipe ye aho rukomeye, kuri iki Cyumweru imbere ya DCMP ya Davis Kasirye na Ismaila Diarra bahoze bakinira Rayon Sports, ntibyamworoheye kuko ikipe ye yatsinzwe ibitego 2-0 kuri stade des Martyrs.

Nubwo aba basore babiri babicaga bigacika umwaka ushize muri shampiyona y’u Rwanda, ntabwo bigeze bagaragara muri 11 babanje mu kibuga kuri uyu mukino. Sugira umaze gutsindira AS Vita Club ibitego bitatu yari yahawe amahirwe yo kubanza mu kibuga ariko aza gusimburwa na Birori Dady ku munota wa 65.

KAC Kénitra ya Bayisenge Emery yasubiye ku mwanya wa nyuma

Myugariro w’Amavubi, Bayisenge Emery werekeje muri Maroc mu ikipe ya KAC Kénitra uyu mwaka avuye muri APR FC, ntabwo akomeje guhirwa kuko ikipe ye itari kwitwara neza, ku buryo ubu yasubiye ku mwanya wa nyuma.

Ni nyuma yo gutsindwa na Olympique Club de Khouribga ibitego 3-1 kuri iki Cyumweru.

Iyi kipe imaze gutsinda umukino umwe gusa kuva shampiyona yatangira, aho ifite amanota ane mu mikino itandatu imaze gukina. Irushwa amanota 10 na Ittihad Tanger ya mbere.

I Burayi, mu cyiciro cya gatatu muri Slovakia, Topoľčany ya Kalisa Rachid, Ombolenga Fitina na Iranzi Jean Claude ntiyabashije kwikura imbere ya Zlaté Moravce-Vrablé kuko yayitsinze 1-0.

MFK Topvar Topoľčany yari imaze imikino itanu yitwara neza ahanini ibifashijwemo na Iranzi, yagize icyuho cy’uyu mukinnyi kuri ubu uri mu Rwanda aho yari yaje gushyingiranwa n’umugore we Uwera Aline.

Mu banyarwanda bakina hanze, Jacques Tuyisenge niwe wafashije ikipe ye gutsinda muri shampiyona
Emery Bayisenge n'ikipe ye bageze ku mwanya wa nyuma
Ikipe ya Iranzi Jean Claude uri mu Rwanda nayo yatsinzwe mu mpera z'iki cyumweru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved