Jimmy Mulisa utoza APR FC yasabiye abakoresha amarozi mu mupira ibihano

Yanditswe na Manzi Rema Jules
Kuya 19 Ukuboza 2016 saa 09:57
Yasuwe : XX
0

Ikibazo cy’ikoreshwa ry’amarozi mu mupira w’amaguru mu Rwanda ni kimwe mu byavuzwe cyane mu mpera z’icyumweru dushoje bitewe n’ibyagaragaye ku mukino wabaye ku wa Gatanu i Huye hagati ya Mukura VS na Rayon Sports, byatumye abatoza batandukanye bamagana iyi myizerere ndetse bamwe basaba Ishyirahamwe ry’umupira w’amaguru guhagurukira iki kibazo.

Ni ibintu bisanzwe bivugwa ko haba abakinnyi n’abatoza bamwe na bamwe mu Rwanda, intsinzi zabo bazikesha imbaraga z’amarozi ariko akenshi ntibihabwa agaciro kabone n’iyo ibisa n’ibimenyetso biba byagaragajwe.

Ku wa Gatanu tariki 16 Ukuboza, abafana batari bake ba Rayon Sports n’aba Mukura VS bari bambariye kureba amakipe yabo aconga ruhago dore ko umukino ubahuza ari umwe mu inyura amaso y’abayireba ariko ibyo babonye bitandukanye cyane n’ibyari byabazinduye.

Intambara no gushwana by’abakinnyi byavuye ku kantu katamenyekanye neza rutahizamu wa Rayon Sports Mussa Camara yakuye mu izamu rya Mukura arakirukankana agashyira abatoza be.

Ku barebaga ibi n’uburyo abakinnyi ba Mukura babyitwayemo n’ibindi byari byabaye mbere ubwo Nahimana Shassir yakuraga ikindi kintu mu izamu rya Mukura akakijugunya inyuma umwana utoragura imipira akagisubizamo, abafana ba Rayon Sports bakamwirukankana ndetse bikarangira akuwe ku kibuga n’abasifuzi, benshi bemeje ko ari ibimenyetso by’amarozi ahora avugwa muri uyu mukino watwaye imitima ya benshi.

Ku batoza b’andi makipe nabo babonye ibi, babyamaganiye kure bavuga ko Ferwafa yakabaye ikurikirana iki kibazo ndetse ababifatiwemo bagahanwa by’intangarugero.

Jimmy Mulisa utoza APR FC, wakinnye mu Rwanda, i Burayi no muri Aziya nk’uwabigize umwuga, yemera ko amarozi akoreshwa ariko ko ntaho yageza umupira w’u Rwanda.

Ubwo yari amaze gutsinda Kiyovu Sports igitego 1-0, abajijwe n’abanyamakuru icyo avuga ku byagaragaye i Huye yagize ati “Njyewe ntacyo mbivugaho, ntekereza muri Ferwafa hari komite ibishinzwe.”

“Mu by’ukuri biriya bintu isura biri guha umupira wacu ntabwo ari nziza. Wenda ikintu nasaba abayobozi ngira ngo nabo barabibonye, byaba byiza habayeho guhanwa kugira ngo bitazongera kubera ko nanjye narabibonye ku mbuga nkoranyambaga ntabwo ari ibintu bitanga isura nziza ku gihugu no ku mupira wacu.”

Si Mulisa wenyine wavuze ko amarozi ari ikibazo muri ruhago kuko na Seninga Innocent utoza Police FC, yavuze ko kwanga gukoresha amarozi ari byo byatumye asezera mu mupira nk’umukinnyi ubwo yari muri AS Kigali.

Kugeza ubu nyuma y’iminsi itatu iki kibazo kibaye, ntabwo Ishyirahamwe ry’umupira w’amaguru mu Rwanda riragira icyo rikivugaho, kuko twagerageje kuvugisha umuyobozi waryo ntibyadukundira.

Jimmy Mulisa asaba ko abakoresha amarozi bajya bahanwa by'intangarugero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza