Jimmy Mulisa yagaragaje uko afata Espoir FC ikomeje gutitiza amakipe

Yanditswe na Manzi Rema Jules
Kuya 28 Ukuboza 2016 saa 08:30
45 31

Jimmy Mulisa utoza APR FC yitegura kwerekeza i Rusizi aho izasura Espoir FC ku munsi wa 11 wa shampiyona uzakinwa kuri uyu wa Gatanu, yatangaje ko iyi kipe igomba kubahwa kubera uburyo irimo kwitwara by’umwihariko akaba asanga itazamworohera ku kibuga cyayo.

APR FC ya kabiri ku rutonde rwa shampiyona n’amanota 24 irushwa abiri na Rayon Sports ya mbere, kuri uyu wa Gatanu tariki 30 Ukuboza irasura Espoir FC ya gatanu kugeza ubu n’amanota 20 itaratsindwa na rimwe.

Uyu mukino ukomeye kurusha iyindi izaba ku munsi wa 11, uzabera kuri Stade ya Rusizi, ikibuga kiri mu bikunze kugora amakipe akomeye kuko uyu mwaka Rayon Sports yahakuye inota rimwe ihanganyirije 0-0, Mukura vs ihatsindirwa 2-0 ndetse umwaka ushize APR FC ikaba yarahatsindiwe 1-0.

Umutoza wa APR FC Jimmy Mulisa ugiye gukinira bwa mbere kuri iki kibuga yatangaje ko yakurikiranye imikino itandukanye y’iyi kipe ndetse mu byo ari yasabye abakinnyi be birimo kwitanga cyane niba bashaka amanota atatu.

Ati “Espoir FC narayibonye ni ikipe nziza. Ku kibuga cyayo n’imbere y’abafana bayo ntabwo byoroshye gusa natwe nitwe dufite igikombe giheruka kandi tugomba kurwanira kucyisubiza. Tuzajyayo dushaka gutsinda.”

Mulisa ufite ibibazo by’imvune ku bakinnyi nka Twizerimana Onesme, Blaise Itangishaka na Maxime Sekamana avuga ko abandi bahari bameze neza ndetse akurikije ibyo bari kumwereka mu myitozo afite icyizere ko amanota atatu APR FC imaze imyaka ibiri itabasha gukura i Rusizi azayabona.

Imikino yose y’umunsi wa 11 wa shampiyona iteganyijwe:

-  Mukura VS vs Amagaju FC (Stade Huye, saa 15:30)

-  Sunrise FC vs Gicumbi FC (Nyagatare, saa 15:30)

-  Marines FC vs Pépinière FC (Umuganda, saa 15:30)

-  AS Kigali vs Etincelles (Nyamirambo, saa 15:30)

-  Espoir FC vs APR FC (Rusizi, saa 15:30)

-  Musanze FC vs Bugesera FC (Nyakinama, 15:30)

-  Police FC vs Kiyovu Sports (Kicukiro,saa 15:30)

-  Kirehe FC vs Rayon Sports (Kirehe, saa 15:30)

Abakinnyi bakoze imyitozo y'uburyo butandukanye
Abafana bari benshi ku kibuga cya Ferwafa bareba imyitozo y'ikipe yabo mbere yo kwerekeza i Rusizi

Itangishaka Blaise yari ku kibuga yaje kureba bagenzi be
Jimmy Mulisa yishimiye uko abakinnyi bitwaye mu myitozo y'uyu munsi
Mwiseneza Djamal (iburyo) wamaze igihe mu mvune nawe yagarutse mu kibuga
Umutoza Wungirije muri APR FC, Yves Rwasamanzi, atanga amabwiriza ku bakinnyi
Nyuma y'imyitozo, abayobozi bakuru ba APR FC baganirije abakinnyi b'ikipe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE