Jimmy Mulisa yavuze icyo atekereza kuri Mukunzi Yannick werekeje muri Rayon Sports

Yanditswe na Manzi Rema Jules, Mukwaya olivier
Kuya 1 Nzeri 2017 saa 03:46
Yasuwe :
0 0

Nyuma yo gutsinda Etincelles FC mu irushanwa ry’Intsinzi Tournament ryateguwe n’Akarere ka Rubavu, umutoza wa APR FC Jimmy Mulisa yatangaje ko yifuriza amahirwe Yannick Mukunzi werekeje muri Rayon Sports, ashimangira ko nta cyuho cye kizagaragara.

Mu buryo bwatunguranye cyane, kuri uyu wa Kane nibwo byatangajwe ko Yannick Mukunzi wari umwe mu bakinnyi ngenderwaho ba APR FC n’Ikipe y’igihugu Amavubi, yerekeje muri Rayon Sports nyuma yo kutumvikana ku masezerano mashya n’ikipe y’Ingabo z’Igihugu yari amaze guhesha ibikombe bitatu bya shampiyona.

Kuri uyu wa Kane nimugoroba amaze gutsinda Etincelles FC igitego 1-0 mu irushanwa ribanziriza shampiyona, Umutoza Jimmy Mulisa yatangaje ko yifuriza uyu mukinnyi amahirwe ku mahitamo yakoze ariko arema abafana agatima ko nta cyuho cye kizagaragara muri APR FC.

Yagize ati “Ni amahitamo ye, gusa ndamwifuriza amahirwe masa. Yannick twarabanye ni umukinnyi mwiza ariko nubwo agiye ndacyeka nta cyuho nzagira ku mwanya yakinagaho kuko hari abandi bakinnyi mfite kandi nabo ni abahanga.’’

Mu kiganiro cya mbere yagiranye n’itangazamakuru nyuma y’imyitozo yo kuri uyu wa Gatanu, Yannick yatangaje ko icyemezo yafashe kimushimishije cyane kuko agiye gukinira ikipe nziza kandi yiteguye kuyifasha gutwara ibikombe, agashimisha abafana.

Yagize ati “Ubu ndi mu ikipe nishimiye, ni icyemezo nafashe nagitekerejeho neza. APR FC twaraganiriye ariko muri njye numvaga igihe kigeze ko najya kureba n’uko ahandi bimeze ngakomeza kugira ubwo bunararibonye kandi Rayon Sports ni ikipe nziza nahoze nifuza kuzakinira.”

Uyu mukinnyi ubaye uwa gatanu uvuye muri APR FC ajya muri Rayon Sports mu myaka ibiri ishize nyuma ya Rwatubyaye Abdoul, Rwigema Yves, Rutanga Eric, Nova Bayama, yashimangiye ko ashimira cyane ikipe yakiniraga n’abafana bayo ariko ababwira ko ubu bagiye kujya bahangana kandi igihe cyose azabatsinda nta kizamubuza kubyishimira.

Yannick ashobora kugaragara bwa mbere akinira Rayon Sports kuri uyu wa Gatandatu mu mukino wa gicuti izakina na Villa SC ariko akazatangira gukina mu marushanwa hagati ya tariki 9 Nzeri na 16 Nzeri 2017 mu ryateguwe n’Agaciro Development Fund azanahuriramo na APR FC ndetse tariki 23 Nzeri i Rubavu akazongera guhura n’iyi kipe mu irushanwa ry’igikombe kiruta ibindi mu Rwanda.

Olivier Karekezi yishimiye igurwa rya Yannick yemeza ko ari umwe mu bakinnyi beza bari mu Rwanda
Rwatubyaye Abdoul wari umaze igihe mu mvune yagarutse mu myitozo
Rutanga Eric wavuye muri APR FC nawe mu myitozo
Yannick Mukunzi mu myitozo ya Rayon Sports
Yannick aganira na Usengimana Faustin bahoze bakinana muri APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza