José Reyes wamamaye muri Arsenal yitabye Imana afite imyaka 35

Yanditswe na Eric Tony Ukurikiyimfura
Kuya 1 Kamena 2019 saa 03:35
Yasuwe :
0 0

Uwahoze ari umukinnyi w’ikipe ya Arsenal mu Bwongereza, José Antonio Reyes w’imyaka 35, yitabye Imana kuri uyu wa Gatandatu aguye mu mpanuka y’imodoka nk’uko byemejwe n’ikipe ya Seville yo muri Espagne ibinyujije ku rubuga rwa Twitter.

Uyu munya-Espagne yageze muri Arsenal avuye muri La Liga muri Mutarama 2004, ndetse yari umwe muri ‘Invincibles’, Arsenal yatwaye igikombe cya shampiyona 2003/04 idatsinzwe.

Nyuma y’aho yatijwe muri Real madrid, atwarana na yo igikombe cya La Liga mu mwaka w’imikino 2006/07.

Seville yavuze ko ‘Ibabajwe n’urupfu rw’uyu munyabigwi’ ivuga ko “ari umwe mu bakinnyi bavuka muri Espagne bayigiriye akamaro mu mateka yayo.”

Arsenal na yo yatangaje ko yababajwe n’urupfu rw’uyu mukinnyi.

Thierry Henry wakinannye na Reyes hagati ya 2004-2007, yihanganishije umuryango we, avuga ko yari umukinnyi mwiza ndetse uzi kubana na bagenzi kurusha abandi.

Ikipe yakiniraga ya Extremadura na yo yashyize ubutumwa bw’akababaro kuri Twitter, imenyesha urupfu rw’uyu mukinnyi ko ‘Yaguye mu mpanuka y’imodoka’.

Reyes yakinnye umukino we wa nyuma ubwo ikipe yatsindaga Alcorcon igitego 1-0 mu mukino wabaye tariki ya 18 Gicurasi. Ikipe iri mu cyiciro cya kabiri muri Espagne biteganyijwe ko izakina na Cadiz ku Cyumweru.

José Reyes yatangiye gukina umupira w’amaguru afite imyaka 16 mu mwaka w’imikino 1999-2000, aba umukinnyi muto ukiniye Seville mu mateka yayo.

Nyuma yo kuva muri Arsenal mu 2007, yatwaye Europa League inshuro ebyiri ari kumwe n’ikipe ya Atlético Madrid ndetse n’inshuro eshatu ari muri Seville.

Muri Mutarama uyu mwaka nibwo yerekeje muri Extremadura mu gihe mu mwaka ushize byavugwaga ko ashobora kuzana na Unai Emery muri Arsenal nk’umutoza.

Ubwo yageraga muri Arsenal mu 2004, yari yaguzwe miliyoni £17, muri Gicurasi 2005 aba umukinnyi wa kabiri wahawe ikarita itukura ku mukino wa nyuma wa FA Cup ubwo ikipe ye yatsindaga Manchester United kuri penaliti.

Yakiniye Arsenal kandi mu mukino wa nyuma wa UEFA Champions League ya 2006, ikipe ye itsindwa na FC Barcelone ibitego 2-1.

José Antonio Reyes wamamaye muri Arsenal yitabye Imana afite imyaka 35

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza