Katauti ari mu bakinnyi bambuwe ubwenegihugu bw’u Rwanda bashobora kubusubizwa

Yanditswe na Tombola Felicie
Kuya 16 Gicurasi 2017 saa 06:47
Yasuwe :
0 0

Ikigo cy’Abinjira n’Abasohoka mu gihugu cyatangiye gusuzuma ubusabe bwa bamwe mu bakinnyi barimo Katauti Ndikumana wakiniye Ikipe y’Igihugu, Amavubi, bahawe ubwenegihugu bakaza kubwamburwa nyuma y’isezererwa ry’u Rwanda mu marushanwa Nyafurika.

Muri Kanama 2014 u Rwanda rwari rwabonye itike yo gukina igikombe cya Afurika cyabereye muri Guinea Equatorial, muri Mutarama 2015; rwaje gusezerewa na Congo kuri mpaga bitewe n’uko Daddy Birori yakoreshaga amazina abiri mu byangombwa yari afite mu Mpuzamashyirahamwe y’Umupira w’Amaguru muri Afurika (CAF). Mu ikipe y’igihugu yitwaga Daddy Simeon Birori naho muri AS Vita yo muri Repubulika Iharanira Demokarasi ya Congo akitwa Tady Etekiama Agiti.

Kuva icyo gihe hatangiye inkubiri yo kwambura ubwenegihugu bamwe mu bakinnyi babuhawe mu buryo butemewe n’amategeko.

Mu bagizweho ingaruka harimo na Ndikumana Hamad Katauti, uzwi muri ruhago y’u Rwanda kuva mu myaka yo hambere. Uyu yamenyekanye by’umwihariko mu 1998 akinira Rayon Sports, aza no kujyana n’ikipe y’igihugu muri CAN ya 2004 yabereye muri Tunisia.

Mu 2014, u Rwanda rumaze gusezererwa na Congo, FERWAFA ibinyujije mu kanama kashyizweho n’inama y’inteko rusange, ku ikubitiro yari yashyize hanze urutonde rw’abakinnyi barenga 25, batacyemerewe gukina nk’Abanyarwanda, banakumirwa kongera gukandagiza ikirenge mu ikipe y’igihugu, Amavubi kuko babonye ibyangombwa mu buryo bunyuranye n’amategeko.

Icyemezo cyo kwambura abakinnyi b’abanyamahanga ubwenegihugu kikimara gufatwa, benshi muri bo bahise bagaragaza ko batacyishimiye, bitabaza inzego zitandukanye bireba.

Hamad Katauti wakiniye Amavubi imikino 51 we yanandikiye Perezida Paul Kagame amusaba gusubizwa ubwenegihugu n’uburenganzira bwo gukina nk’Umunyarwanda.

Umukozi mu Kigo cy’Abinjira n’Abasohoka mu gihugu, Uhagarariye Ishami rishinzwe gutanga Ubwenegihugu, Rwamwaga Vincent, yatangaje ko ikibazo cy’abakinnyi bambuwe ubwenegihugu kiri kigwaho.

Ati “Itegeko rigomba kubahirizwa, hari irigena imitangire y’ubwenegihugu, umuntu agiye kurirenga yaba abusanije naryo kandi ntawe uri hejuru y’amategeko. Nta muntu wigeze yamburwa ubwenegihugu, bariya bakinnyi abo muzi bari barabuhawe ariko rimwe na rimwe ugasanga byakozwe hari itegeko birengangije.”

Yakomeje agira ati “Nyuma yaho byaje kugaragara ko kuba barakiniye igihugu nk’inshingano zikomeye, muri iki gihe tugezemo bari gushyirwa ku rutonde kugira ngo babwemerewe mu nzira nyayo noneho ijyanye n’amategeko. Ubusabe buri gusuzumwa ubu burimo ubwa Katauti n’abandi bakinnyi barindwi.”

Rwamwaga yatangaje ko uhawe ubwenegihugu aba afite uburenganzira nk’undi Munyarwanda wese.

Ati “Abandi bose baba barakiniye nk’ikipe y’igihugu bizwi, bose ntabwo bahejwe, baza bagasaba neza mu buryo bwemewe kuko tuba tuzi yuko bigeze kugirira igihugu akamaro.”

Muri Werurwe 2017, Umuyobozi w’Ishyirahamwe ry’Umupira w’Amaguru mu Rwanda (FERWAFA), Nzamwita Vincent de Gaule, yatangaje ko Amavubi atigeze ajya muri iri rushanwa ahubwo ari abanyamahanga bagiyeyo.

Aya magambo yasamiwe hejuru na bamwe mu bahoze muri iyi kipe barimo Karekezi Olivier na Katauti Ndikumana bagaragaje ko bidakwiye gutangazwa n’umuyobozi wirengagije ukuri nkana. Nyuma y’amasaha make yahise yisegura avuga ko ari ikibazo cy’ururimi ahubwo azirikana akazi bakoze.

Ndikumana Hamad ni myugariro ufite amateka ahambaye; nk’umukinnyi yanyuze mu makipe arimo Rayon Sports na Espoir FC mu Rwanda, akina mu Bubiligi, Chypre n’u Burundi muri Vital’O. Kuri ubu ni umutoza wungirije muri Musanze FC.

Katauti ari mu bakinnyi umunani bashobora gusubizwa ibyangombwa
Ndikumana Hamadi Katauti na Olivier Karekezi bakiniye Amavubi muri CAN ya 2004 yabereye muri Tunisia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244