Kiyovu Sports yambuwe uburenganzira bwo kugura no kugurisha abakinnyi

Yanditswe na Eric Tony Ukurikiyimfura
Kuya 21 Mutarama 2020 saa 07:23
Yasuwe :
0 0

Binyuze muri Komisiyo yaryo y’imyitwarire, Ishyirahamwe ry’Umupira w’Amaguru mu Rwanda (FERWAFA), ryambuye ikipe ya Kiyovu Sports uburenganzira bwo kugura no kugurisha abakinnyi mu yandi makipe mu gihe cyose itarishyura Casa Mbungo André wahoze ari umutoza wayo.

Muri Kanama 2017 nibwo Casa Mbungo André yagizwe umutoza mukuru wa Kiyovu Sports, ariko atandukana nayo mu Ugushyingo 2018 nyuma yo kumara amezi atatu adahabwa umushahara bumvikanye.

Mu Ukwakira uwo mwaka, uyu mutoza yari yandikiye ubuyobozi bw’iyi kipe ibaruwa y’integuza ko mu minsi 30 azasezera ku kazi niba nta gikozwe.

Nyuma y’uko Casa Mbungo areze Kiyovu Sports muri FERWAFA, tariki ya 16 Gicurasi 2019, Komisiyo ishinzwe gukemura amakimbirane yategetse iyi kipe kumwishyura miliyoni 6.5 Frw.

Uyu mutoza yandikiye FERWAFA ayisaba kumufasha kumwishyuriza Kiyovu Sports, itabikora, hagafatirwa amafaranga yayo FERWAFA ifite cyangwa ikihanangirizwa hashingiwe ku ngingo ya 61 igika cyayo cya b na c cy’amategeko agenga imyitwarire mu mupira w’amaguru mu Rwanda.

Tariki ya 7 Nyakanga 2019, Komisiyo y’imyitwarire yahaye Kiyovu Sports igihe cy’inyongera kitarengeje iminsi 60 ngo ibe yamaze kwishyura Casa Mbungo, inibutswa ko nitabikora izabuzwa kugura cyangwa kugurisha abakinnyi.

Urucaca rwajuririye iki cyemezo, ariko tariki ya 8 Ukwakira 2019 Komisiyo y’Ubujurire muri FERWAFA isanga nta shingiro bufite mu gihe tariki ya 4 Mutarama 2020, uhagarariye umutoza Casa Mbungo André, yasabye FERWAFA gushyira mu bikorwa ibikubiye mu ngingo ya 35 y’amategeko agenga umupira w’amaguru kuko Kiyovu Sports yaryumyeho.

Iyi ngingo iteganya ko ‘’iki gihano cyambura ikipe uburenganzira bwo gukura no kohereza abakinnyi mu yandi makipe mu gihe cyose impamvu yatumye iki gihano gitangwa itaravaho.’’

Nyuma yo guterana ku wa Gatandatu tariki ya 18 Mutarama 2020, Komisiyo y’imyitwarire muri FERWAFA, yemeje koi bi bihano bishyirwa mu bikorwa mu gihe Kiyovu Sports itarishyura Casa Mbungo André.

Kiyovu Sports iherutse gusinyana na AZAM Bakhresa Group amasezerano y’ubufatanye afite agaciro ka miliyoni 132 Frw mu gihe cy’imyaka ine.

Iyi kipe kuri ubu iri ku mwanya wa gatanu n’amanota 26 muri Shampiyona, iheruka gusinyisha abakinnyi barimo Habamahoro Vincent wavuye muri AFC Leopards muri Kenya n’Umunya-Cameroun Mbazo ’o Nkoto Karim, bombi baguzwe mbere y’uko hafatwa iki cyemezo.

Kiyovu Sports yafatiwe ibihano byo kutongera kugura cyangwa kugurisha abakinnyi mu gihe itarishyura Casa Mbungo wahoze ari umutoza wayo
Casa Mbungo André yishyuza Kiyovu Sports miliyoni 6.5 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza