Kiyovu Sports yanganyije na APR FC iyibuza kwanikira Rayon Sports (Amafoto)

Yanditswe na Eric Tony Ukurikiyimfura
Kuya 30 Mata 2019 saa 08:33
Yasuwe :
0 0

Umukino w’umunsi wa 25 wa shampiyona wahurije Kiyovu Sports na APR FC kuri Stade ya Kigali, warangiye amakipe yombi anganyije ubusa ku busa, ikipe y’Ingabo z’u Rwanda itakaza amahirwe yo gukomeza kwakinira Rayon Sports bahanganiye igikombe, aho kuri ubu harimo ikinyuranyo cy’amanota ane.

Kiyovu Sports yari yakiriye uyu mukino wimuriwe amasaha n’ikibuga ugatangira saa 17:30 kubera ko wabaye mu mibyizi.

Nyuma y’uko yari idafite abakinnyi batanu igenderaho biganjemo abafite imvune, umutoza wa Kiyovu Sports, Kirasa Alain, yakoze impinduka enye, yitabaza abakinnyi bakiri bato nka Ngarambe Ibrahim, Ishimwe Saleh, Nsanzimfura Keddy na Karera Hassan utarakinnye umukino uheruka kubera ikarita itukura yahawe.

N’ubwo APR FC yatangiye isatira kuko Ndoli Jean Claude yakuyemo umupira wari winjiranywe na Omborenga Fitina mu rubuga rw’amahina, amakipe yombi nta buryo bukomeye bugana mu izamu yabonye mu minota 40 ibanza y’umukino yaranzwe n’amakosa menshi. Habonetsemo amakarita ane y’umuhondo.

Mbere y’uko igice cya mbere kirangira, Kiyovu Sports yahushije igitego cyabazwe ku mupira winjiranywe mu rubuga rw’amahina na Nizeyimana Jean Claude bakunze kwita Rutsiro, ashatse kuroba Kimenyi Yves awukoraho gato ukomeza imbere y’izamu.

Uyu mukinnyi n’ubundi yongeye kubona uburyo bwiza nk’ubu igice cya kabiri kimaze iminota mike gitangiye, awutanze kuri Nsanzimfura Keddy akoraho gato uca ku ruhande rw’izamu.

Nshuti Dominique Savio winjiye mu kibuga asimbura Nkinzingabo Fiston, yagerageje guhindura umukino wa APR FC, aho yanabonye uburyo bwiza bwo gutsinda ku mupira yahawe na Muhadjiri, umunyezamu Ndoli Jean Claude atabara ikipe ye.

Nsanzimfura na Kalisa Rachid bagerageje amashoti ku ruhande rwa Kiyovu Sports umupira ukagarurwa n’umutambiko w’izamu mu gihe Bonane Janvier yashoboraga gutsinda mu minota y’inyongera, Kimenyi Yves ashyira umupira muri koruneri.

Umukino warangiye amakipe yombi anganyije ubusa ku busa, APR FC itakaza amahirwe yo kongera ikinyuranyo hagati yayo na Rayon Sports izakira Espoir FC ku wa Kane. APR FC ifite amanota 58 ku mwanya wa mbere, aho irusha amanota ane Rayon Sports ya kabiri. Kiyovu Sports yo yagumye ku mwanya wa gatanu n’amanota 39.

Undi mukino wabaye kuri uyu wa Kabiri warangiye Gicumbi FC yari ku kibuga cyayo, itsinze AS Kigali igitego 1-0 cyatsinzwe na Ahishakiye Nabil mu gice cya mbere cy’umukino. Gicumbi yahise igira amanota 26 ku mwanya wa 12, ikomeza kugira icyizere cyo kuguma mu cyiciro cya mbere dore ko yashyizemo ikinyuranyo cy’amanota atandatu ugereranyije n’amakipe ari munsi y’umurongo utukura.

Abakinnyi babanje mu kibuga:

Kiyovu SC: Ndoli Jean Claude, Ahoyikuye Jean Paul, Karera Hassan, Rwabuhihi Aimee Placide, Ishimwe Saleh, Ngarambe Ibrahim, Kalisa Rachid (c), Nsanzimfura Keddy, Serumogo Ally, Herron Berrian na Nizeyimana Jean Claude.

APR FC: Kimenyi Yves, Omborenga Fitina, Imanishimwe Emmanuel, Rugwiro Herve, Buregeya Prince, Mugiraneza Jean Baptiste (c), Nshimiyimana Imran, Buteera Andrew, Nkinzingabo Fiston, Hakizimana Muhadjiri na Danny Usengimana.

Gahunda y’umunsi wa 25 wa shampiyona

Ku wa Kabiri tariki ya 30 Mata

  • Gicumbi FC 1-0 AS Kigali FC
  • SC Kiyovu 0-0 APR FC

Ku wa Gatatu tariki ya 1 Gicurasi

  • Police FC vs Sunrise FC (Stade de Kigali, 15h30)
  • Amagaju FC vs Mukura VS (Nyagisenyi, 15h30)
  • Kirehe FC vs Marines FC (Kirehe, 15h30)
  • Bugesera FC vs AS Muhanga (Stade Mumena, 15h30)

Ku wa Kane tariki ya 2 Gicurasi

  • Musanze FC vs Etincelles FC (Stade Ubworoherane, 15h30)
  • Rayon Sports FC vs Espoir FC (Stade de Kigali, 15h30)
Abakinnyi 11 ba Kiyovu Sports babanje mu kibuga
Abakinnyi 11 ba APR FC babanje mu kibuga
Igice cya mbere cyaranzwe n'amakosa menshi
Kalisa Rachid nyuma yo gukinirwa nabi na Migi
Ishimwe Saleh yagiye abakinnyi bo hagati ba APR FC barimo Imran
Danny Usengimana yasubiraga inyuma gushaka umupira
Nkinzingabo Fiston na Kalisa Rachid mu kirere batanguranwa umupira
Hakizimana Muhadjiri yiruka ku mupira
Nkinzingabo ntiyahiriwe n'umukino w'uyu munsi
Danny Usengimana umaze kubanza mu kibuga inshuro ebyiri yirukanga ku mupira
Ndoli Jean Claude wahuraga na APR FC yakiniye, yari ahagaze neza
Kiyovu Sports yashakaga gukina buri mupira muri uyu mukino
Mangwende akinirwa nabi na Kalisa Rachid
Ndoli asaba abakinnyi bagenzi be guhagarara neza
Umukino wabonetsemo amakarita atanu y'umuhondo
Usengimana mu kirere atanga umupira Ahoyikuye Jean Paul
Rwabuhihi Placide ni umwe mu bitwaye neza muri uyu mukino

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza