Marines 1-1 AS Kigali: Penaliti itavuzweho rumwe yabujije intsinzi abanyamujyi

Yanditswe na Jah d’eau Dukuze
Kuya 16 Gashyantare 2017 saa 06:59
Yasuwe :
0 0

AS Kigali yabuze amahirwe yo gufata umwanya wa kabiri by’agateganyo muri shampiyona y’icyiciro cya mbere, nyuma y’aho penaliti yo ku munota wa nyuma w’umukino yatumye Marines iyishyura igitego yari yatsinze hakiri kare.

Umunsi wa 17 wa shampiyona, ni wo wakinwaga kuri uyu wa kane, imikino ubusanzwe yari kuba mu mpera z’icyumweru, gusa bikarangira yimuriwe kuwa Kane kubera imikino mpuzamahanga izabera i Kigali. Kuri stade Umuganda, ikipe ya Marines yahakiriraga AS Kigali mu mukino utitabiriwe cyane n’abatuye mu mujyi wa Rubavu.

Byari ibyishimo kuri Marines nyuma yo gutsinda ku munota wanyuma

AS Kigali, ni yo yatangiye isatira cyane ndetse igenda irema uburyo bwabyara igitego itabyaje umusaruro. Ntabwo byasabye umwanya munini wo gutegereza ku basore ba Eric Nshimiyimana, dore ko ku munota wa 12 gusa Iradukunda Eric umaze iminsi yitwara neza, yazaga kuyitsindira igitego ku ishoti ridakomeye yateye ku mupira wari uvuye muri Corner gusa ugashobora kurenga umunyezamu Ingabire Aime Regis.

Iminota yakurikiye y’igice cya mbere, amakipe yombi yakomeje gusatirana, gusa As Kigali aba ari yo ibona uburyo bukomeye bwo gutsinda, ubwo Mubumbyi Bernabe yacengaga abinyuma ba Marines gusa yatera ishoti umunyezamu Regis agashobora kuwugarura, maze igice cya mbere kikarangira ari icyo gitego 1-0.

Mu gice cya kabiri cy’umukino, ikipe ya As Kigali nubundi ni yo yaremye amahirwe menshi yo gutsinda ibifashijwemo n’abasore bayo nka Mubumbyi Bernabe, Sebanani Emmanuel Crespo wagiye mu kibuga asimbuye ndetse na Ndahinduka Michel Bugesera, aho buri umwe yagiye abona amahirwe arenze amwe yo gutsinda igitego ariko ntibayabyaze umusaruro.

Ikipe ya Marines na yo yanyuzagamo igasatira, yaje kubona uburyo bukomeye ku munota wa 81, ubwo Dusenge Bertin yateraga ishoti rikomeye umunyezamu Batte agakoraho gato ugakubita umutambiko w’izamu wo hejuru ukagaruka mu kibuga.

Mu gihe byagaragaraga ko umukino ushobora kuba urangiye As Kigali yegukanye intsinzi, ikipe ya Marines yaje kubona Coup Franc ku munota wa gatandatu w’inyongera, iterwa neza igana mu rubuga rw’amahina, abakinnyi ba As Kigali bagundagurana n’aba Marines, biza kurangira Kayumba Sotel mu gukiza izamu ashota umukinnyi wa Marines ku gatuza, umusifuzi yemeza ko ari penaliti.

Iyi penaliti itavuzweho rumwe, yaje kwinjizwa neza na Dusenge Bertin, bityo umukino uhita unasorezwaho ku gitego 1-1. As Kigali yagumye ku mwanya wa gatatu n’amanota 33 mu gihe Marines na yo yagumye ku mwanya wa 12 n’amanota 18.

Mu yindi mikino, igitego Mirafa wa Police yitsinze cyatumye ikipe ye itsindirwa mu Bugesera 1-0 mu gihe Peter Otema yafashije Musanze gukura intsinzi kuri Pepiniere ayatsindira igitego rukumbi cyabonetse mu mukino wabereye ku Ruyenzi. Ibitego bya Masudi Abdallah na Uwimbabazi Jean Paul byatumye Kirehe itsindira Sunrise iwayo 2-0.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244