Ni iki cyatumye Kwizera Olivier yerekeza muri Bugesera FC?

Yanditswe na Ishimwe Israel
Kuya 13 Ukwakira 2016 saa 12:33
Yasuwe :
0 0

Umuzamu Kwizera Olivier wavuye muri APR FC akerekeza muri Bugesera FC yahishuye ko nta gahunda yari afite yo kujya mu makipe yo hanze ya Kigali mbere y’uko umutoza Mashami Vincent amwihamagarira akamusobanurira ko amushaka kugira ngo bafatanye muri gahunda afite zo kugeza iyi kipe ku ruhando rw’ahatanira ibikombe.

Kwizera Olivier wari umaze imyaka ibiri muri APR FC, aho yanatwaye ibikombe bibiri bya shampiyona, kuri ubu ni umukinnyi wa Bugesera FC imaze imyaka ibiri ivuye mu cyiciro cya kabiri.

Kujya muri iyi kipe ngo cyari icyemezo gikomeye ku we kuko bitari gushoboka iyo umutoza Mashami Vincent atamuhamagara ngo bicarane abimwumvishe.

Aganira na IGIHE yagize ati “ Mashami ni umutoza twakoranye cyane haba muri APR FC no mu ikipe y’Igihugu Amavubi. Niwe wampamagaye turaganira anyereka gahunda afite muri Bugesera FC ansaba ko naza tugafatanya. Birumvikana kuva mu ikipe ya mbere mu gihugu ukajya mu ikipe itamenyerewe hari uko abantu babifata ariko njye nabonye ifite intego nziza nemera kwirengagiza ibyo byose.”

Kwizera Olivier ahamya ko kuba yaragiye mu ikipe idafite amateka nk’aya APR FC yahozemo ari amahirwe yo kwemeza abashidikanya ku buhanga bwe kuko intego afite ari uko Bugesera FC ariyo kipe izarangiza shampiyona y’uyu mwaka itsinzwe ibitego bike no kwegukana kimwe mu bikombe bibiri bikinirwa mu Rwanda.

Uyu muzamu w’imyaka 21 washakishwaga na Baroka FC yo muri Afurika y’Epfo, akaza kubura ibyangombwa, yavuze ko nta masezerano afitanye na APR FC avuga ko yagiye muri Bugesera FC yigurishije.

Ati “Naje muri Bugesera FC ndi umukinnyi wigenga, nta yindi kipe mfitanye nayo amasezerano. Umwaka nurangira nzatekereza aho ngomba kujya cyangwa ngume hano nibiba byagenze neza. APR FC ni mu rugo kuba nazasubirayo birashoboka ariko n’indi kipe yose nakumvikana nayo nakina nta kibazo.”

Kwizera yanatangaje ko umukino wa mbere wa shampiyona, Bugesera FC izakina na Kiyovu Sports kuri uyu wa Gatandatu ugomba kubabera intangiriro nziza za shampiyona bashimisha abafana.

Kwizera Olivier yiteguye gufasha umutoza Mashami Vincent kugera ku ntego zo gutwara igikombe
Kwizera Olivier ahamya ko atakiri umukinnyi wa APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza