Masoudi ahangayikishijwe n’abakinnyi be batazagaragara yesurana na Pépinière

Yanditswe na Manzi Rema Jules
Kuya 7 Mutarama 2017 saa 03:20
Yasuwe : XX
0

Rayon Sports yitegura gukina na Pépinière FC ku munsi wa 12 wa shampiyona ifite ikibazo cyo kuba ba myugariro bayo babiri basanzwe babanza mu kibuga barimo Irambona Eric na Munezero Fiston batemerewe gukina uyu mukino kubera amakarita atatu y’umuhondo bafite.

Mu gihe Rayon Sports ikomeje kugorwa n’imvune z’abakinnyi b’inyuma, Irambona Eric ukina inyuma ku ruhande rw’ibumoso na Munezero Fiston ukina mu mutima w’ubwugarizi, bari mu bamaze gukina imikino myinshi muri iyi kipe kuva shampiyona yatangira ntibemerewe gukina umunsi wa 12 kuri iki Cyumweru kubera amakarita y’umuhondo.

Mu kiganiro na IGIHE, Umutoza Masoudi Djuma yavuze ko bigoye gukina adafite aba bakinnyi basanzwe bamufasha cyane ariko yongeraho ko muri Rayon Sports afite benshi bashobora guhindurirwa imyanya ku buryo nta kibazo byateza.

Ati “Simba nifuza gukina ntafite ikipe yanjye yose ariko kuba barabonye amakarita atatu atabemerera gukina uyu mukino ntibivuga ko ikibazo cyavutse. Haracyari Nova Bayama, Ishimwe Issa Zappy, Mugisha François, Nzayisenga Jean d’Amour ndetse n’abandi bakinnyi bamwe na bamwe dushobora guhindurira imyanya.”

Kuri aba bakinnyi hiyongeraho Manzi Thierry na Senyange Yvan, bavunitse ndetse bititezwe ko bazagaruka vuba mu kibuga.

Rayon Sports iyoboye shampiyona n’amanota 29, irusha APR FC abiri, igiye guhura na Pépinière FC yari imaze igihe isa n’iyasenyutse ndetse iminsi ibiri iheruka ikaba yaratewe mpaga kuko itabashaga kugera ku kibuga.

Iyi kipe imaze kubona inota rimwe gusa mu mikino 11 yari yagize ikibazo cyo guhagarikirwa ikibuga na Ferwafa ivuga ko ari kibi kidakwiye gukinirwaho shampiyona ariko mu biganiro byahuje ubuyobozi bwayo, Akarere ka Kamonyi kabamo ikibuga cyo ku Ruyenzi ndetse na Ferwafa kuwa Gatatu tariki 4 Mutarama bemeje ko ikomeza gukina ibindi bibazo bikazakemurwa nyuma.

Kuri aba bakinnyi ba Rayon Sports bahagaritswe kuri uyu munsi hiyongeraho Mwiseneza Daniel (Mukura VS), Mbonyingabo Regis (Etincelles FC) na Nyandwi Sadam utagaragaye ku mukino ikipe ye ya Espoir Fc yatsinzemo Kiyovu Sports kubera amakarita atatu.

Uko amakipe azahura ku munsi wa 12 wa shampiyona:

Kuwa Gatanu

- SC Kiyovu 1-2 Espoir Fc

Kuwa Gatandatu

- APR FC vs AS Kigali (Stade de Kigali, 15:30)
- Bugesera Fc vs Kirehe Fc (Nyamata, 15:30)
- Amagaju Fc vs Musanze Fc (Nyamagabe, 15:30)
- Police Fc vs Sunrise Fc (Kicukiro, 15:30)

Ku Cyumweru, tariki ya 8 Mutarama 2017

- Etincelles vs Marines Fc (Stade Umuganda, 15:30)
- Rayon Sports vs Pépinière Fc (Stade de Kigali, 15:30)
- Gicumbi Fc vs Mukura VS (Stade de Gicumbi, 15:30)

Munezero Fiston ntabwo yemerewe gukina uyu mukino kubera amakarita atatu y'umuhondo
Rayon Sports izakina na Pépinière FC idafite bamwe mu bakinnyi bayo bakomeye
Irambona Eric (imbere) umaze iminsi afasha Rayon Sports nawe ntazagaragara ku mukino wa Pépinière FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza