Masoudi Djuma muri APR FC ?

Yanditswe na IGIHE
Kuya 4 Ukwakira 2017 saa 08:06
Yasuwe :
0 0

Umutoza wa APR FC Jimmy Mulisa ntarongererwa amasezerano mashya nubwo shampiyona yatangiye none byatangiye no guhwihwiswa ko ashobora gusezererwa vuba agasimbuzwa Masoudi Djuma wahoze atoza Rayon Sports.

Mulisa yahawe gutoza APR FC umwaka ushize wa shampiyona asimbuye Kanyankore Gilbert. Mu mikino ya shampiyona n’amarushanwa Nyafurika ya CAF Champions League yatoje, yatsinze15, anganya umwe, atsindwa ine.

Umwaka we wa mbere muri iyi kipe imenyereye kwegukana ibikombe ntiwamuhiriye, anatakaza igikombe cya shampiyona yari imaze imyaka itatu yikurikiranya ; cyegukanywe na mukeba, Rayon Sports ariko yabashije gutwara icy’Amahoro atsinze Espoir FC y’i Rusizi ku mukino wa nyuma.

Nyuma yo kwitwara nabi mu mikino ibanziriza shampiyona ntabashe kwegukana igikombe cy’irushanwa ry’Agaciro akanatsindwa na Rayon Sports ku mukino w’igikombe kiruta ibindi “Super Cup 2017”, byatumye amakuru atangira gucicikana ko ashobora kwirukanwa agasimbuzwa Masoudi udafite ikipe atoza.

Nubwo bivugwa ko uyu mutoza ari mu biganiro n’ubuyobozi bwa APR FC ndetse ashobora gushyira umukono ku masezerano vuba, Umunyamabanga w’iyi kipe, Kalisa Adolphe, yabihakaniye IGIHE.

Abanje guseka, yagize ati “Sibyo nta biganiro turimo nawe.”

Jimmy Mulisa urimo gutoza APR FC nta masezerano afite, we kuri uyu wa Kabiri yatangaje ko ibyo kuvuga ko ashobora gusezerewa nawe yabyumvise ariko azabyakira mu gihe bizaba ari byo abafana n’abayobozi bifuje.

Yagize ati “Mu by’ukuri n’uyu munsi nabyutse abantu bampamagara bambwira ibintu byinshi cyane ngo bimeze gutya na gutya ariko hari ibintu byo hanze ntakunda kujyamo …APR FC ni ikigo wenda niba abafana ari cyo bifuza [ko nirukanwa] bafite ubuyobozi, umuntu ukuriye abafana uvugana n’ubuyobozi ndumva bavugana na bo bakumva ibyo bifuza.”

Mu kiganiro gito Masoudi Djuma yagiranye na IGIHE, we yatangaje ko ari umutoza uri ku isoko ukeneye akazi kandi yiteguye kuba yagakora igihe kabonekera ariko ntiyahamije niba hari ibiganiro arimo na APR FC.

APR FC yatangiye shampiyona neza itsinda Sunrise FC ibitego 2-0, iri kwitegura umukino wa kabiri aho izasura Marinse FC kuwa 13 Ukwakira mbere yo kwisobanura na AS Kigali tariki 20 Ukwakira.

Umutoza wa APR FC Jimmy Mulisa bivugwa ko ashobora gusimburwa na Massoudi Djuma
Jimmy Mulisa na Massoudi Djuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza