Masoudi Djuma usobanura 2016 nk’umwaka udasanzwe, yashimiye Minnaert yasimbuye

Yanditswe na Manzi Rema Jules
Kuya 1 Mutarama 2017 saa 11:29
Yasuwe : XX
0

Umutoza wa Rayon Sports Masoudi Djuma uvuga ko umwaka wa 2016 wamubereye igitangaza yashimiye Umubiligi Ivan Jacky Minnaert yahoze yungirije muri iyi kipe, wasezeye bikamuhesha amahirwe yo kwigaragaza no kugera ku nzozi ze zo kuba umutoza mukuru.

Masoudi Djuma yagizwe umutoza wa Rayon Sports wungirije mu ntangiriro z’Ukuboza 2015 aje gufatanya na Ivan Minnaert wari umutoza mukuru.

Nyuma y’amezi atatu gusa, Ivan yaje gusezera avuga ko ubuyobozi butamworohereza mu kazi ke ndetse n’ibibazo by’amikoro make y’iyi kipe atari agishoboye kwihanganira yerekeza muri Kenya gutoza AFC Leopards.

Ubuyobozi bwa Rayon Sports bwafashe umwanzuro wo kugirira icyizere Masoudi nk’umwe mu banayikiniye uzi neza n’ibibazo byayo kuva kera, atoza imikino ya shampiyona yari isigaye ndetse n’iy’igikombe cy’Amahoro, yaje no kwegukana atsinze APR FC 1-0 ku mukino wa nyuma.

Uyu mugabo kuri ubu wahawe amasezerano nk’umutoza mukuru, ashoje umwaka wa 2016 ikipe ye ihagaze ku mwanya wa mbere ku rutonde rw’agateganyo rwa shampiyona y’icyiciro cya mbere mu Rwanda.

Masoudi Djuma atangaza ko umwaka ushize wamubereye mwiza ku buryo bukomeye by’umwihariko agashimira Ivan wasezeye muri Rayon Sports.

Ati “Ndashimira Imana kuba narasoje umwaka wa 2016 neza. Wagenze neza, naje mu Rwanda ndi umutoza wungirije, ndashimira Ivan Minnaert wavuye muri Rayon Sports akansigira ikipe nkatwara igikombe bakampa n’amasezerano."

Nyuma yo gufata Rayon Sports nk’umutoza mukuru muri Gashyantare 2016, muri shampiyona gusa Masoudi amaze gutoza imikino 29 aho yatsinze 19 anganya umunani atsindwa ibiri.

Umukino wa mbere yatoje yahuye na Espoir FC banganya 1-1 kuri Stade ya Kigali i Nyamirambo, nyuma anyagira Musanze FC 3-0, Amagaju FC 2-0 na Marines 3-0.

Ikipe yatsinze ku buryo bworoshye kuva abaye umutoza mukuru ni Amagaju FC yanyagiye ibitego 6-0 i Nyamirambo tariki 15/06/ 2016.

Ikipe ya mbere yamutsinze ni AS Muhanga 1-0 yari yaramaze no kumanuka mu cyiciro cya kabiri no ku munsi wa nyuma wa shampiyona 2015/2016 asubirwa na Musanze FC yamutsinze 2-0 ari nayo iheruka kubikora kuko ageze ku munsi wa 11 wa shampiyona 2016/2017 ataratsindwa na rimwe.

Ikipe iheruka kumukuraho inota ni Mukura VS banganyije 1-1 i Huye mu mukino wavuzwemo amaroz, inkuru yasakaye ku Isi yose.

Kuri Masoudi 2016 ntisize gusa abaye umutoza udashidikanywaho wa rayon Sports kuko yanabashije kubona impamyabumenyi ya Licence A y’ubutoza itangwa na CAF.

Ikindi Masoudi yatowe nk’umutoza wigaragaje ndetse utanga icyizere muri shampiyona y’u Rwanda ubwo Ferwafa yahembaga abakinnyi n’abatoza bahize abandi mu mwaka wa shampiyona ushize nyuma y’uko yari afashije iyi kipe kurangiza ku mwanya wa kabiri, ayihesheje igikombe cy’Amahoro ndetse n’itike yo kuzasohokera igihugu mu mikino Nyafurika y’amakipe, Orange CAF Confederations Cup.

Masoudi ashimira Ivan wagiye akamusigira Rayon Sports nk'umutoza mukuru
Masoudi Djuma yageze muri Rayon Sports aje kungiriza Umubiligi Ivan Minnaert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza