Masoudi Djuma yasabye inkunga y’amasengesho kubera ibibazo byugarije Rayon Sports

Yanditswe na Manzi Rema Jules
Kuya 26 Ukuboza 2016 saa 09:28
45 31

Umutoza wa Rayon Sports FC, Masoudi Djuma yasabye abakunzi b’iyi kipe n’abandi babishoboye kuyisengera kubera ibibazo biyugarije bishingiye ku mvune z’urudaca zikomeje kwibasira ba myugariro bayo.

N’ubwo ku mukino wo kuwa Gatandatu w’icyumweru gishize Rayon Sports iheruka gukina yanyagiyemo Musanze FC ibitego 4-1, abakunzi b’iyi kipe bagataha bishimiye kwisubiza umwanya wa mbere ku rutonde rwa shampiyona, siko byari bimeze ku mutoza Masoudi Djuma, wari umaze kuvunikisha Mugisha François Master, umwe muri ba myugariro yagenderagaho muri iyi minsi.

Iyi kipe y’i Nyanza isigaranye Fiston Munezero gusa, myugariro umwe rukumbi ushobora gukina.

Masoudi wahize ko uyu mwaka ashaka gutwara igikombe cya shampiyona ndetse kugeza ku munsi wa 10 akaba ataratsindwa na rimwe yagaragaje ko afite ikibazo gikomeye muri ba myugariro bavunika umusubizo.

Masoudi yagize ati “Mudusabire ku Mana kuko dufite ibibazo mu bwugarizi. Buri munsi turwaza umukinnyi, buri munsi kandi ugasanga ni ahantu hamwe gusa mu bwugarizi… dufite n’ubwoba ko n’abandi bazavunika kuko ni ikibazo. Mwabonye ko twakinishije Niyonzima Olivier Sefu mu mutima w’ubwugarizi.”

Kugeza ubu ba myugariro ba Rayon Sports bavunitse barimo Manzi Thierry wari usanzwe abanza mu kibuga afatanya na Munezero Fiston akaba ashobora no kutazagaruka mbere y’uko uyu mwaka w’imikino urangira. Ange Mutsinzi wari waje kumusimbura nawe yavunikiye ku mukino wa gicuti Rayon Sports yakinnye na Esperance FC ndetse na Mugisha François Master wari usigaye nawe yavunikiye ku mukino wa Musanze FC ndetse igihe azamara hanze ntikiramenyekana.

Ikibazwa n’abakunzi ba Rayon Sports ndetse na Masoudi avuga ko kimuyobera ni uburyo umukinnyi wese ashyize mu bwugarizi asohoka yavunitse hakaba bamwe babihuza n’ibibazo by’amarozi bimaze iminsi bivugwa ko mu makipe amwe n’amwe mu Rwanda ko hari abakinnyi bajya baroga bagenzi babo baba bahanganiye imyanya n’ubwo ibihamya bikomeza kubura.

Munezero Fiston niwe myugariro muzima usigaye muri Rayon Sports
Mugisha François Master nawe yiyongereye ku rutonde rwa ba myugariro ba Rayon Sports bafite imvune
Masoudi Djuma yasabye abafana ba Rayon Sports kuyiragiza Imana
Manzi Thierry (uwa gatatu ibumoso) wari waje gufana bagenzi be bakina na Musanze FC, ashobora kutazagaruka mu kibuga uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE