Messi yafashije FC Barcelone kwegukana igikombe cya shampiyona ya Espagne

Yanditswe na Eric Tony Ukurikiyimfura
Kuya 28 Mata 2019 saa 10:38
Yasuwe :
0 0

Igitego kimwe cyatsinzwe na Lionel Messi nyuma yo kwinjira mu kibuga mu gice cya kabiri asimbuye, cyahesheje FC Barcelone kwegukana igikombe cya 26 cya shampiyona ya Espagne, La Liga, itsinze Levante igitego 1-0 kuri uyu wa Gatandatu.

Mu gihe FC Barcelone ikomeje kwitegura umukino ubanza wa ½ cya UEFA champions League izakiramo Liverpool ku wa Gatatu, yari yaruhukije abakinnyi batandukanye barimo na Lionel Messi wasimbuye Coutinho mu gice cya kabiri, agatsinda ku munota wa 62 nyuma yo gucenga ba myugariro babiri ba Levante.

Mu gice cya mbere cy’umukino, Barcelone yahushije uburyo butandukanye burimo ubw’ishoti ryatewe na Philippe Coutinho, umupira ukurwamo n’umunyezamu wa Levante mu gihe na Gérard Piqué yananiwe gufungura amazamu ku mupira watewe na Clément Lenglet, uyu myugariro awukozeho ujya hanze.

José Luis Morales na Enis Bardhi bashoboraga kwishyurira Levente ariko, uburyo bagerageje burimo n’umupira wa Bardhi wagaruwe n’izamu, ntibwagira icyo butanga.

Barcelone iracyafite amahirwe yo kwegukana ibikombe bitatu uyu mwaka, aho ifite umukino wa nyuma wa Copa del Rey izahuramo na Valence tariki ya 25 Gicurasi mu gihe muri UEFA Champions League izahura na Liverpool muri ½ .

Igikombe iyi kipe yaraye yegukanye, ni icya 10 cya shampiyona kuri Lionel Messi ndetse kikaba icya 34 amaze gutwarana na yo kuva atangiye kuyikinira mu 2004 avuye mu ishuri ryayo rya ruhago (La Masia).

Barcelone yegukanye shampiyona y’uyu mwaka, ifite amanota 83 mu gihe hasigaye imikino itatu ngo igere ku musozo. Atlético Madrid ya kabiri n’amanota 74 yo yaraye itsinze Real Valladolid igitego 1-0 mu gihe Real Madrid ya gatatu n’amanota 65 ikina na Rayo Vallecano kuri iki Cyumweru.

Lionel Messi yafashije ikipe ye kwegukana shampiyona nyuma yo gutsinda igitego asimbuye
FC Barcelone yegukanye igikombe cya munani cya La Liga mu myaka 11, icya 26 cya shampiyona muri rusange
Byari ibyishimo kuri Gérard Piqué
Busquet na Messi ni bamwe mu babanje ku ntebe y'abasimbura mu gihe FC Barcelone yitegura kwakira Liverpool
Messi amaze gutsinda ibitego 46 akinira FC Barcelone muri uyu mwaka w'imikino
Messi yatsinze igitego nyuma y'iminota 17 yari amaze mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza