Moussa Camara yakomorewe agaruka mu myitozo ariko akatwa umushahara

Yanditswe na Manzi Rema Jules
Kuya 15 Gicurasi 2017 saa 11:03
Yasuwe :
0 0

Ruhatizamu wa Rayon Sports Moussa Camara yarangije ibihano yari yahawe byo guhagarikwa imikino ibiri ariko akatwa igice cy’umushahara azira ko yatorotse ikipe akajya i Dudai gushaka indi nta ruhushya.

Camara yatorotse mu kwezi gushize ajya muri Leta Zunze Ubumwe za Abarabu amarayo iminsi 13 agiye mu igeragewa mu ikipe ya Didda Al Fujairah FC ariko nta ruhushya yahawe na Rayon Sports agifitiye amasezerano.

Aho agarukiye, tariki 9 Gicurasi 2017, yahise ahagarikwa kutazakina imikino ibiri yose y’igikombe cy’Amahoro bakinnye na Musanze FC, kuri ubu akaba yagarutse muri bagenzi be ariko akatwa umushahara nk’uko Umunyamabanga wa Rayon Sports, Gakwaya Olivier, yabitangarije IGIHE.

Yagize ati “Ubu yagarutse kuko yari yahanwe kudakina imikino ibiri no gukatwa ½ cy’umushahara.”

Ubusanzwe Rayon Sports yahanishaga abakinnyi guhagarikwa imikino gusa ariko kuri ubu hiyongereyeho gukatwa amafaranga ahanini kubera intera ibibazo byo gutoroka bigenda bifata; Moussa yabikoze nyuma gato ya Kwizera Pierrot .

Moussa ashobora no kugaragara ku mukino w’ikirarane Rayon Sports ifitanye na Mukura VS kuri uyu wa Gatatu kuri Stade ya Kigali i Nyamirambo, umukino isabwa gutsinda igahita yegukana igikombe cya shampiyona y’uyu mwaka.

Si Camara gusa wagarutse muri iyi kipe ya Masoudi Djuma, na myugariro Ange Mutsinzi Jimmy wari wavunikiye ku mukino wa shampiyona wa Musanze FC yatangiye imyitozo kimwe na Rwatubyaye Abdul.

Moussa Camara ashobora kugaragara ku mukino wo kuwa Gatatu Rayon Sports icakirana na Mukura VS

Indi nkuru bifitanye isano: Moussa Camara yagarutse mu Rwanda, Rayon Sports imwakiriza ibihano


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza